ཧཱུྃ༔ བཞེངས་ཤིག་པདྨ་འབྱུང་གནས་མཁའ་འགྲོའི་ཚོགས༔ དགོངས་ཤིག་ཕྱོགས་བཅུ་དུས་གསུམ་བདེ་གཤེགས་རྣམས༔ རྗེ་བཙུན་ཆེན་པོ་པདྨ་ཐོད་ཕྲེང་རྩལ༔ རིག་འཛིན་མཁའ་འགྲོའི་གནས་ནས་གཤེགས་སུ་གསོལ༔ དབུ་སྐྲ་མཛེས་པའི་ཐོར་ཚུགས་ཤིགས་སེ་ཤིག༔ རིན་ཆེན་རྒྱན་ཆ་མང་པོ་སི་ལི་ལི༔ དུར་ཁྲོད་རུས་པའི་རྒྱན་ཆ་ཁྲོ་ལོ་ལོ༔ སྒྲ་དང་རོལ་མོ་མང་པོ་འུ་རུ་རུ༔ ཡི་དམ་ལྷ་ཚོགས་ཧཱུྃ་སྒྲ་དི་རི་རི༔ མཁའ་འགྲོ་སྡེ་ལྔས་གར་བྱེད་ཤིགས་སེ་ཤིག༔ གིང་ཆེན་དཔའ་བོས་བྲོ་བརྡུང་ཁྲབས་སེ་ཁྲབ༔ མ་མོ་མཁའ་འགྲོ་སྤྲིན་ལྟར་ཐིབས་སེ་ཐིབ༔ ཆོས་སྐྱོང་སྡེ་བརྒྱད་ལས་བྱེད་ཁྱུགས་སེ་ཁྱུག༔ ཞུབ་ཆེན་སྟོང་གི་སྒྲ་སྐད་སི་ལི་ལི༔གཡས་ན་ཕོ་རྒྱུད་ཐམས་ཅད་ཤ་ར་ར༔ གཡོན་ན་མོ་རྒྱུད་ཐམས་ཅད་ཤ་ར་ར༔ བར་སྣང་ཐམས་ཅད་དར་གདུགས་ལྷབས་སེ་ལྷབ༔ དྲི་ཞིམ་སྤོས་ཀྱི་ངད་ལྡང་ཐུ་ལུ་ལུ༔ མཁའ་འགྲོ་གསང་བའི་བརྡ་སྐད་དི་རི་རི༔ གིང་ཆེན་དཔའ་བོའི་བཤུག་གླུ་ཀྱུ་རུ་རུ༔ ཧཱུྃ་གི་སྣང་གླུ་མང་པོ་དི་རི་རི༔ ཕཊ་ཀྱི་བརྡ་སྐད་དྲག་པོ་སངས་སེ་སང་༔ བདག་དང་འགྲོ་དྲུག་སེམས་ཅན་ཐམས་ཅད་ལ༔ཐུགས་རྗེས་གཟིགས་ལ་གནས་འདིར་གཤེགས་སུ་གསོལ༔ གནས་འདིར་ཐུགས་རྗེས་དགོངས་ཏེ་གཤེགས་ནས་ཀྱང་༔ བདག་གིས་བྱང་ཆུབ་སྙིང་པོ་མ་ཐོབ་བར༔ བགེགས་དང་ལོག་འདྲེན་བར་ཆད་འདུལ་བ་དང་༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་དུ་གསོལ༔

བྱང་ཆུབ་སེམས་དཔའ་ནི་སྦྱིན་པར་བྱེད་པ་དང་སྦྱིན་པའི་བདག་པོ་མཐོང་ན་སྤྱོད་ལམ་མི་འཆོས་སོ། །ཇི་ལྟར་ན་སྤྱོད་ལམ་མི་འཆོས་ཤེ་ན། གཉའ་ཤིང་གང་ཙམ་དུ་བལྟ་བ་དང་། སྐྱོ་བར་བལྟ་བ་དང༌། སྒྲིམ་པ་མེད་པར་བལྟ་བས་གོམ་པས་བགས་ཀྱིས་དལ་ནས་དལ་ནས་འདོར་ཞིང་འདེབས་པ་མ་ཡིན་ཏེ། དེ་ལྟར་ན་ལུས་ཀྱིས་ཚུལ་འཆོས་པ་མི་བྱེད་དོ། །

༡ ངག་གི་ཚུལ་འཆོས།

ངག་གིས་ཚུལ་འཆོས་པར་མི་བྱེད་དོ། །ཇི་ལྟར་ངག་གིས་ཚུལ་འཆོས་པར་མི་བྱེད་ཅེ་ན། བྱང་ཆུབ་སེམས་དཔའ་ནི་རྙེད་པའི་རྒྱུ་རྙེད་པའི་ཕྱིར་གཅོམ་བསྐྱུངས་ཤིང་སྨྲ་བ་མ་ཡིན་འཇམ་པོར་སྨྲ་བ་མ་ཡིན་དགའ་བར་སྨྲ་བ་མ་ཡིན། རྗེས་སུ་འབྲང་བའི་ཚིག་བརྗོད་པ་མ་ཡིན་ཏེ། དེ་ལྟར་ན་ངག་གིས་ཚུལ་འཆོས་པ་མི་བྱེད་དོ། །

༢ ཡིད་ཀྱི་ཚུལ་འཆོས།

ཇི་ལྟར་ན་སེམས་ཀྱིས་ཚུལ་འཆོས་པར་མི་བྱེད་ཅེ་ན། བྱང་ཆུབ་སེམས་དཔའ་ནི་སྦྱིན་པ་བྱེད་པའམ་སྦྱིན་པའི་བདག་པོས་རྙེད་པ་བསྟབས་ན། ཚིག་གིས་འདོད་པ་ཆུང་བར་སྟོན་ཅིང་སེམས་ཀྱིས་འདོད་པ་བསྐྱེད་པ་མ་ཡིན་ནོ། །རིགས་ཀྱི་བུ་འདི་ལྟ་སྟེ། ཚིག་གིས་འདོད་པ་ཆུང་ལ་སེམས་ཀྱིས་རྙེད་པ་འདོད་པ་འདི་ནི་ནང་གི་གདུང་བ་ཡིན་ཏེ། དེ་ལྟར་ན་སེམས་ཀྱིས་ཚུལ་འཆོས་པ་མི་བྱེད་དོ། ། དེ་ལྟར་ན་བྱང་ཆུབ་སེམས་དཔའ་ཚུལ་འཆོས་པ་དང་ཁ་གསག་གི་རྙེད་པ་དང་བྲལ་བ་ཡིན་ནོ། །

༣ གཞོགས་སློང་གི་ཉེས་པ།

ཇི་ལྟར་ན་གཞོགས་སློང་གི་རྙེད་པ་དང་བྲལ་བ་ཡིན་ཞེ་ན། བྱང་ཆུབ་སེམས་དཔའ་ནི་སྦྱིན་པ་བྱེད་པའམ་སྦྱིན་བདག་མཐོང་ན་བདག་གོས་ཀྱིས་ཕོངས་སོ་བདག་ལྷུང་བཟེད་ཀྱི་ཕོངས་སོ། །བདག་ན་བའི་གསོས་སྨན་གྱིས་ཕོངས་སོ་ཞེས་གཞོགས་སློང་མི་བྱེད་ཅིང༌། སྦྱིན་པ་བྱེད་པའམ་སྦྱིན་པའི་བདག་པོ་ལ་མི་སློང་ཞིང་ཚིག་ཏུ་མི་བརྗོད་དེ། དེ་ལྟར་ན་བྱང་ཆུབ་སེམས་དཔའ་གཞོགས་སློང་གི་རྙེད་པ་དང་བྲལ་བ་ཡིན་ནོ། །

༤ ཐོབ་འཇལ་གྱི་རྙེད་པ།

ཇི་ལྟར་ན་ཐོབ་ཀྱིས་འཇལ་བའི་རྙེད་པ་དང་བྲལ་བ་ཡིན་ཞེ་ན། བྱང་ཆུབ་སེམས་དཔའ་ནི་སྦྱིན་པ་བྱེད་པ་དང་སྦྱིན་པ་དག་མཐོང་ན་བདག་ལ་སྦྱིན་པའི་བདག་པོ་ཆེ་གེ་མོ་ཞིག་གིས་དངོས་པོ་ཆེ་གེ་མོ་ཞིག་བྱིན་ཏེ། དེ་ལ་བདག་གིས་ཀྱང་ཕན་པ་ཆེ་གེ་མོ་ཞིག་བྱས་སོ། །འདིས་ཀྱང་བདག་ལ་འདི་ནི་ཚུལ་ཁྲིམས་དང་ལྡན་པར་རིག་སྟེ་མང་དུ་ཐོས་པའོ་འདོད་པ་ཆུང་བའོ་ཞེས་འདི་དང་འདི་བྱིན་ནོ། །བདག་གིས་ཀྱང་དེ་ལ་སྙིང་རྗེ་བའི་སེམས་ཉེ་བར་གཞག་སྟེ་བླངས་སོ་ཞེས་དེ་སྐད་ཀྱི་ཚིག་མི་བརྗོད་དོ། །དེ་ལྟར་ན་བྱང་ཆུབ་སེམས་དཔའ་ཐོབ་ཀྱིས་འཇལ་བའི་རྙེད་པ་དང་བྲལ་བ་ཡིན་ནོ། །

ཨེ་མ་ཧོ།། དབྱངས་ཅན་ལྷ་མོ་ཡི་སྤྲུལ་པ།།

སྦྲག་མདར་མཁར་ཆེན་གྱི་རྒྱུད་འཁྲུངས།།

མཛེས་སྡུག་ཡིད་འཕྲོག་ཀྱི་ལྷ་མོ།

ཨ་མ་མཚོ་རྒྱལ་རང་མཁྱེན་ནོ།།

  མངའ་བདག་འཇམ་དབྱངས་ཀྱི་ཐུགས་གཅེས།།

རྒྱལ་སྲས་པད་འབྱུང་གི་གཟུང་མ།། 

རྒྱ་བོད་ཡོངས་གྲགས་ཀྱི་མཁའ་འགྲོ།།

ཨ་མ་མཚོ་རྒྱལ་རང་མཁྱེན་ནོ།།

རྒྱ་བོད་པཎ་གྲུབ་ཀྱི་བློ་གྲོས།།

བོད་ཡུལ་མདོ་སྔགས་ཀྱི་བསྟན་པ།། 

བཀའ་བསྡུ་གསལ་བྱེད་ཀྱི་སྒྲོན་མེ།།

ཨ་མ་མཚོ་རྒྱལ་རང་མཁྱེན་ནོ།།

སྨིན་གྲོལ་ལམ་ཆེན་ལས་སྟེར་བའི།།

ཕུང་ཁམས་བསྐྱེད་རིམ་ཉིད་མངོན་གྱུར།

ཁྱོད་ནི་རྣམ་སྨིན་གྱི་རིག་འཛིན།།

ཨ་མ་མཚོ་རྒྱལ་རང་མཁྱེན་ནོ།།

རྩ་ཐིག་རླུང་སེམས་ལ་དབང་བསྒྱུར།།

དགའ་བཞིའི་བདེ་སྟོང་ཉིད་མངོན་གྱུར།།

ཁྱེད་ནི་ཚེ་དབང་གི་རིག་འཛིན།།

ཨ་མ་མཚོ་རྒྱལ་རང་མཁྱེན་ནོ།།

བརྗོད་བྲལ་བདེ་གཤེགས་ཀྱི་སྙིང་པོ།།

སྤྲོས་བྲལ་མི་རྟོག་པའི་ལྟ་བ།།

འགྱུར་མེད་ཕྱག་ཆེན་གྱི་རིག་འཛིན།།

ཨ་མ་མཚོ་རྒྱལ་རང་མཁྱེན་ནོ།།

ཀ་དག་ལྷ་ལམ་གྱི་དཀྱིལ་འཁོར།།

ལྷུན་གྲུབ་འོད་གསལ་གྱི་རོལ་པ།། 

ཅིར་སྣང་ཆོས་ཟད་དུ་སོང་ན།།

ཨ་མ་མཚོ་རྒྱལ་རང་མཁྱེན་ནོ།

ཁྱེད་ནི་སྟོང་ཉིད་ཀྱི་མཁའ་འགྲོ།།

མ་འགགས་སྙིང་རྗེ་ཡི་རང་བཞིན།།

ལུས་སྲོག་གཅེས་བྲལ་གྱི་གདེང་ལྡན།།

ཨ་མ་མཚོ་རྒྱལ་རང་མཁྱེན་ནོ།།

ཐེག་པ་མཐའ་དག་ལ་མཁས་ཤིང་།།

ལྟ་སྒོམ་སྤྱོད་འབྲས་ལ་མངའ་བརྙེས།།

ཤེས་བྱ་ཀུན་མཁྱེན་གྱི་རྒྱལ་མོ།།

ཨ་མ་མཚོ་རྒྱལ་རང་མཁྱེན་ནོ།།

གངས་ཅན་རྒྱལ་བློན་དང་དབང་ཆེན།། 

ཉེར་ལྔ་ལྷ་མི་ཡི་གཙུག་རྒྱན།།

ཡུམ་ཆེན་ཤེས་རབ་ཀྱི་ཕར་ཕྱིན།།

ཨ་མ་མཚོ་རྒྱལ་རང་མཁྱེན་ནོ།།

བདག་འདྲ་ལས་ངན་གྱི་སེམས་ཅན།།

ཅི་བྱས་ངན་སོང་གི་ས་བོན།།

བྱས་པ་དོན་མེད་དུ་སོང་ན།།

ཨ་མ་མཚོ་རྒྱལ་རང་མཁྱེན་ནོ།།

དུས་གསུམ་ཀུན་མཁྱེན་གྱི་བླ་མར།།

བདེན་གཉིས་དམ་ཆོས་འདྲར་ཞུས་ཀྱང་།།

ལག་ལེན་ཚུལ་བཞིན་དུ་མ་ཐེབ།།

ཨ་མ་མཚོ་རྒྱལ་རང་མཁྱེན་ནོ།།

ད་དུང་ནམ་འཆི་ནི་ཆ་མེད།།

བར་དོའི་འཇིགས་སྐྲག་དེ་མྱོང་ན།།

མི་འཇིགས་གདེངས་ཚོད་འདྲ་མ་བྱུང་།།

ཨ་མ་མཚོ་རྒྱལ་རང་མཁྱེན་ནོ།།

སྒྱུ་ལུས་སྣང་སྟོང་གི་བསྐྱེད་རིམ།།

བརྗོད་པ་གྲགས་སྟོང་གི་རང་སྒྲ།། 

དྲན་རྟོགས་རིག་སྟོང་གི་རང་བཞིན།།

ཨ་མ་མཚོ་རྒྱལ་དང་གཉིས་མེད།།

ཡེ་ཤེས་ཆེ་བརྙེས་སུ་ཤོག་ཅིག།།

ཅེས་པ་འདི་ཡང་རིག་འཛིན་སྟག་ཤམ་རྡོ་རྗེས་མཛད་པའོ།།།དགེའོ།།དགེའོ།།དགེའོ།།།།

ལས་སྨོན་རྟེན་འབྲེལ་དཔག་བསམ་ལྗོན་ཤིང་གི་སྟེང་ན། །

རྒྱ་གར་ཤར་གྱི་རྨ་བྱ་གཞོན་ནུ་ཡང་ཕེབ་བྱུང་། །

རྨ་བྱའི་གདུགས་བསྐོར་དམ་པའི་ཆོས་ཕྱོགས་ལ་བསྒྱུར་དང་། །

གཞོན་པ་ང་ཚོས་ཐར་པའི་ལམ་སྣ་ཞིག་ཟིན་ཡོང་། །

བསོད་ནམས་དཔྱིད་ཀྱི་རྒྱལ་མོ་ཤིང་རྟ་ལ་ཕེབ་དང་། །

ལྷོ་མོན་ཤིང་ལོའི་ཚལ་གྱི་ཁུ་བྱུག་གི་གསུང་སྙན། །

ཡ་གི་དྲི་ཟའི་བུ་མོའི་གླིང་བུ་ལས་སྙན་པས། །

དབྱར་གསུམ་ནམ་ཟླ་སྤྲོ་བའི་རྟེན་འབྲེལ་ལ་ཡག་བྱུང་། །

འདིར་འདུས་ལས་སྨོན་མཐུན་པའི་རྡོ་རྗེ་ཡི་སྤུན་གྲོགས། །

ང་ཚོའི་བླ་མ་བཞུགས་པའི་ཆོས་གྲལ་ལ་ཕེབ་དང་། །

སྨིན་གྲོལ་བདུད་རྩི་འཐུང་བའི་དགའ་སྟོན་གྱིས་ངང་ནས། །

ཉམས་དགའ་གླུ་རུ་ལེན་པའི་ཁྱད་ཆོས་ཞིག་ཡོད་དོ། །

བདེ་ཆེན་འཕོ་འགྱུར་མེད་པའི་བཞུགས་གྲལ་གྱི་དབུས་ནས། །

ལྷ་དང་བླ་མའི་ཞལ་རས་མ་བསྒོམས་ཀྱང་མཐོང་བྱུང་། །

མ་དང་མཁའ་འགྲོའི་སྙིང་ཏིག་འོད་གསལ་གྱི་ཐེག་པས། །

འཇའ་ལུས་ཆོས་སྐུ་འགྲུབ་པའི་དངོས་གྲུབ་ཅིག་ཞུའོ། །

  རིག་འཛིན་འཇིགས་གླིང་ནས།

ཨ་མཚར་པོ་ཅི་འདྲ་ཚོར་བར་འདུག།

ཚིག་གིས་སྦོས་པའི་སྟོན་པ་དེ།།

རྩོད་དུས་ཁྲོམ་པ་བསྙོན་བསྙོན་བྱེད།།

ལབ་དུས་དྲེད་མོས་ལབ་ལབ་བྱེད།།

ཉལ་དུས་མི་ཆེན་ཉལ་ཉལ་བྱེད།།

འགྲོ་དུས་ཧོར་དམག་འགྲིམ་འགྲིམ་བྱེད།།

དེས་གེགས་དང་གོལ་ས་ཅི་ཆོད་ཨང་།།

སྤྱིར་ཁམས་གསུམ་སེམས་ཅན་སོ་སོར་གོལ།།

སོ་སོ་སྐྱེ་བོ་ལས་ལ་གོལ།།

ཉན་རང་ཞི་བའི་གནས་ལ་གོལ།།

དགེ་བཤེས་ཟ་བའི་ཐབས་ལ་གོལ།།

སྟོན་པ་ཚིག་གི་རྫོང་ལ་གོལ།།

དགེ་སློང་ཟ་རྒྱུའི་ནང་དུ་གོལ།།

རྣལ་འབྱོར་སྨྱོན་པའི་གསེབས་ཏུ་གོལ།།

སྒོམ་ཆེན་སྟོང་ལྟ་ཧད་པོས་གོལ།།

དེ་བཞིན་ཐམས་ཅད་གོལ་ཚབས་ཆེ།།

བུ་སྙན་བརྒྱུད་མཁའ་འགྲོའི་ཁ་རླངས་ལ།།

གོལ་ས་ཡོད་སྙམ་བདུད་ཡིན་ཏེ།།

རས་ཆེན་དྲུང་དུ་ཞི་བ་འོད།།

གེགས་ལ་ཤོར་ན་བསླུས་པ་ཡིན།།

དམར་ཁྲིད་ལག་ལེན་མངོན་སུམ་ལ།།

གོལ་ས་བྱུང་ན་བདེན་པ་མེད།།

བུ་གོལ་སའི་སློབ་གཉེར་མ་སེམས་པར།།

རྩེ་གཅིག་ཏུ་སྒོམ་དང་མྱུར་དུ་གསལ།།

ཁོང་ནི་མང་ཡུལ་གུང་ཐང་རྔ་རྩ་རུ་ཡབ་མི་ལ་ཤེས་རབ་རྒྱལ་མཚན་དང་། ཡུམ་མྱང་ཚ་དཀར་རྒྱན་གཉིས་ཀྱི་སྲས་སུ་རབ་བྱུང་དང་པོའི་ལྕགས་འབྲུག་ལོར༼འདས་ལོ1584༽སྐུ་འཁྲུངས། ཆུང་དུས་སུ་ཡབ་གཤེགས་ཏེ་རང་ཁྱིམ་གྱི་ནོར་རྫས་ཕ་ཚན་གྱིས་བདག་ཏུ་བཟུང་བས་ སྡུག་མང་པོ་མཐོང་། དེའི་འཁོན་ལན་སློག་པར་མཐུ་བསླབས་ནས་མི་མང་པོ་བསད། སླད་ནས་སྡིག་པ་ལ་འགྱོད་དེ་ཆོས་བྱེད་པར་ལྷོ་བྲག་ཏུ་ཕེབས་ཏེ་མར་པ་ལོ་ཙྭ་དང་ མཇལ།དབང་དང་མན་ངག་རྫོགས་པར་གསན། དེ་ནས་སྐྱིད་གྲོང་སོགས་སུ་སྒྲུབ་པ་སྙིང་པོར་མཛད་པས་གྲུབ་པའི་ས་མཐོར་གཤེགས། རས་ཆུང་བ་སོགས་སློབ་མ་གྲགས་ཅན་མང་པོ་བྱུང་། དགུང་ལོ་བརྒྱད་ཅུ་གྱ་བཞི་པ་རབ་བྱུང་གཉིས་པའི་ཆུ་ཡོས་ལོར༼འདས་ལོ1668༽སྐུ་གཤེགས་སོ།།