སྐྱབས་རྗེ་རིན་པོ་ཆེ་དགོན་ནང་ཞབས་སོར་འཁོད་པ།

སྤྱི་ལོ ༢༠༢༤ ཟླ ༩་ཚེས་༩ ཉིན་སྐྱབས་རྗེ་རྫོགས་ཆེན་ཡིད་བཞིན་ནོར་བུ་དགོན་ནང་ཞབས་སོར་འཁོད་ཡོད།

སྤྱི་ཚེས་༡༣ ཉིན་ཞོགས་པ་དུས་ཚོད་༩ ཐོག་དགེ་འདུན་པ་རྣམ་ཀྱིས་སྒོ་ཆེན་གཡས་གཡོན་ནས་གཙུག་ལག་ཁང་བར་དུ་ཕྱག་ཏུ་དར་དཀར་དང་མེ་ཏོག་སྣ་མང་། འཕན་གདུགས་རྒྱལ་མཚན། སིལ་སྙན། རོལ་མོ། རྒྱ་གླིང་དང་། དུང་དཀར་ཆེ་ཆུང་སོགས་མཆོད་ཆས་སྣ་ཚོགས་ཐོགས་ཏེ་སེར་འཕྲེང་སྟར་སྒྲིག་གིས་ཕེབས་བསུ་རྒྱ་གང་ཆེ་ཞུས། རིན་པོ་ཆེ་བཞུགས་ཁྲི་ལ་འཁོད་རྗེས་ཚོགས་ཆེན་དབུ་མཛད་ནས་བཀྲ་ཤིས་བརྒྱད་པས་སྣ་དྲངས་ཏེ་ཆོ་ག་གསུང་འདོན་དང་། དེ་ནས་རིན་པོ་ཆེས་བཀའ་ཆོས་དང་བཀའ་དབང་གནང་ཞིང་། དབང་སྐུར་ཟབ་མོ་ཐོབ་པའི་བཀའ་དྲིན་གཏང་རག་དང་། བསྟན་དང་འགྲོ་བའི་དོན་དུ་ཡུན་རིང་བཞུགས་ཕྱིར་དགོན་གཞུང་ནས་བརྟན་བཞུགས་བསྟར་འབུལ་ཞུས། སྐབས་འདིར་རིན་པོ་ཆེ་དགོན་ནང་ཕེབས་ཏེ་བཀའ་དབང་དང་། མཁན་སློབ་རྒན་གྲས་ཁག་ལ་རྫོགས་ཆེན་སེམས་ཁྲིད་འབོག་རྒྱུ། སྐུ་ཚབ་གསར་བསྐོ། དགེ་འདུན་པ་ཡོངས་ལ་ལུགས་གཉིས་ལམ་སྟོན་ཟབ་མོ་བཅས་གནང་ཡོད་པ་རེད་འདུག

རྡོ་རྗེ་སློབ་དཔོན་ཁྲི་འདོན་མཛད་སྒོ།

སྤྱི་ལོ ༢༠༢༤ ཟླ ༧་ཚེས ༡༦ བོད་རབ་གནས་ཤིང་འབྲུག་ལོའི་སྤྲེལ་ཟླའི་ཚེས ༡༠ ཉིན་མ་ཧཱ་གུ་རུའི་ཚོགས་འབུམ་ཉིན་ཐ་མར་རྡོ་རྗེ་སློབ་དཔོན་གྱི་ཁྲི་འདོན་མཛད་སྒོ་ཞིག་སྤེལ་ཡོད། དེ་ཉིན་རྡོ་རྗེ་སློབ་དཔོན་ལྔ་ཁྲི་འདོན་བྱས། འབྲས་ལྗོངས་ནས་གསུམ་དང་། འབྲུག་ནས་གཉིས་བཅས་ཡིན། འབྲས་ལྗོངས་ནས་བླ་མ་བསམ་གཏན། མིག་དམར་ཚེ་རིང་། ཉི་མ་འོད་ཟེར། འབྲུག་ནས་ཀརྨ་ཤེས་རབ། ཉི་མ་ཚེ་རིང་བཅས། ཚེས་༡༠ ཉིན་རྒྱབ་དུས་ཚོད ༡་ སྐར་མ་༣༥ ཐོག་བཤད་གྲྭའི་འདུ་ཁང་ནས་ཚུར་སྤོས་སྣེའི་གདན་ཞུས་ཏེ་བགེགས་སྤྲད་ཁྲུས་གསོལ་བྱས་རྗེས། རིམ་པས་གདུང་སྲས་ཨོ་རྒྱན་རིག་འཛིན་མཆོག་ནས་བླ་ཞུ་གསོལ། ལས་ཐོག་མཁན་པོ་འཇམ་དཔལ་བསྟན་འཛིན་མཆོག་ནས་རྡོ་རྗེ་སློབ་དཔོན་གྱི་ལག་ཁྱེར་ཕུལ་རྗེས་བཞུགས་ཁྲི་ལ་མངའ་གསོལ་གནང་ནས་སྐུ་གསུམ་མནྟྲལ་ཕུལ། རིམ་པས་དགེ་འདུན་པ་དང་མང་ཚོགས་ནས་མཇལ་དར་ཕུལ་རྗེས་བཀྲ་ཤིས་བདེ་ལེགས་ངང་མཐའ་གྲུབ། ཉེ་བའི་ཆར་བླ་མ་རྡོ་རྗེ་སློབ་དཔོན་མངའ་གསོལ་གནང་བ་ཐེངས་གཉིས་པ་དེ་ཡིན། སྤྱི་ལོ ༢༠༡༢ ལོར་མཁན་པོ་འཇིགས་མེད་དང་། བླ་མ་རྡོ་རྗེ་རྣམ་དག་གཉིས་ལ་བླ་མའི་ཕྱག་ཁྱེར་ཕུལ་ཡོད་པ་བཅས།

སྐུ་ཚབ་མངའ་གསོལ་ཁྲི་འདོན།

སྤྱི་ཟླ་༩ པའི་ཚེས་༡༤ ཉིན་སྐྱབས་རྗེ་རིན་པོ་ཆེ་མཆོག་ནས། སྲས་ཨོ་རྒྱན་རིག་འཛིན་དང། མཁན་པོ་འཇམ་དཔལ་བསྟན་འཛིན་གཉིས་ཁོང་གི་རྒྱལ་ཚབ་ཏུ་མངའ་གསོལ་གསལ་བསྒྲགས་སྤེལ་རྒྱུའི་ཆེད་དུ་ཁྲི་འདོན་མཛད་སྒོ་སྟབས་བདེ་ཞིག་སྤེལ་སོང་། དེ་ཉིན་ཞོགས་པ་དུས་ཚོད་༩ ཕྱེད་ཐོག་སྐྱབས་རྗེ་མཆོག་སྟོན་འཁོར་གཟིམ་ཆུང་ནས་ཆིབས་བསྒྱུར་གྱིས་དགོན་ནང་ཞབས་སོར་འཁོད། དགོན་པས་ཁོང་རྣམ་གཉིས་ལ་ཁྲུས་བཀར་སྒོ་སོགས་ཆོ་ག་ཁག་གསུང་ཤིང་   སྤྲུལ་སྐུ་ཐུབ་བསྟན་དང་། སྤྲུལ་སྐུ་བསོད་ནམས་ཐབས་མཁས་གཉིས་ནས་མནྟལ་ཕུལ་ཤིང་རིམ་པས་དགེ་འདུན་པ་ཡོངས་ནས་ཁ་བཏགས་ཕུལ་སོང་། སྐབས་དེེར་༧སྐྱབས་རྗེ་རིན་པོ་ཆེ་ནས་རྒྱལ་ཚབ་མངའ་གསོལ་དང་འབྲེལ་བའི་བཀའ་སློབ་གནང་དོན།

ཡ་དེ་རིང་མང་པོ་ཞུ་ཡ་མེད། དེ་རིང་མཁན་པོ་འཇམ་དཔལ་ལགས་དང་། ཨོ་རྒྱན་རིག་འཛིན་གཉིས་ངའི་ཚབ་ཏུ་མངའ་གསོལ་གནང་ནས་ཁྲི་འདོན་མཛད་སྒོ་སྟབས་བདེ་ཞིག་སྤེལ་བ་ཡིན། དུས་ཚོད་མང་པོ་མེད་རྐྱེན་སྟབས་བདེ་ཞིག་ལས་གྲ་སྒྲིག་པོ་བྱུང་མ་སོང་ཡང་། གང་ལྟར་ངའི་ཚབ་ཏུ་ཁོང་གཉིས་བསྐོས་པ་ཡིན། དགོན་པའི་ལས་དོན་གང་ཡིན་གྱི་འགན་ཆ་ཚང་ཁོང་གཉིས་ལ་སྤྲད་ཚར་བ་ཡིན། ད་ནས་བཟུང་སྟེ་ཁོང་གཉིས་ནས་སྤྱི་ཡོངས་ནས་ལྟ་གི་རེད། ཁྱེད་ཚོ་ཚང་མས་ཁོང་གཉིས་ལ་ཡིད་ཆེས་དང་། རྒྱབ་སྐྱོར་གནང་དགོས། ང་ནང་བཞིན་ཁོང་གཉིས་ལ་བརྩི་བཀུར་གནང་དགོས། ཁོང་གཉིས་ལ་ཇི་ལྟར་རྒྱབ་སྐྱོར་གནང་ན་དེ་བཞིན་ང་ཚོའི་དགོན་པ་ཡར་རྒྱས་སུ་འགྲོ་གི་རེད། དགོན་པ་ཡར་རྒྱས་སུ་འགྲོ་བ་ལ་ཚང་མ་ཐུགས་མཐུན། ཁྲིམས་གཙང་གནང་དགོས་པ་ཧ་ཅང་གལ་ཆེན་པོ་རེད། མཁན་པོ་རྣམ་པ་དང་། སྤྲུལ་སྐུ་རྣམ་པ། སློབ་དཔོན་རྣམ་པ། བླ་མ་རྣམ་པ་དང་། གཞན་གྲྭ་བ་སུ་ཡིན་ཡང་དགོན་པ་དང་། བསྟན་དང་འགྲོ་བའི་དོན་དུ་ཤུགས་རྒྱབ་རོགས། ད་དུང་སྤྲུལ་སྐུ་ཁ་ཤས་ཞིག་ཁྲི་འདོན་གནང་ཡ་ཡོད་དང་། གཙོ་བོ་དང་པོ་ཁྱེད་རང་ཚོས་སློབ་སྤྱོང་མཐར་ཕྱིན་པ་གནང་དགོས། སློབ་སྦྱོར་མཐར་ཕྱིན་སོང་ན་གཞན་གང་ཡང་དཀའ་ལས་ཡོད་མ་རེད། ཁྱེད་རྣམ་པས་འགྲོ་དོན་ཡོང་མིན་གཙོ་བོ་ཁྱེད་རང་ཚོ་ལ་རག་ལས་ཡོད། ཁྱེད་རང་ཚོའི་ཀུན་སྤྱོད་དང་། སློབ་སྦྱོང་ལ་རག་ལས་ཡོད། ང་ཚོའི་ངོས་ནས་རྒྱབ་ནོན་དང་དཔུང་རོགས་གང་དགོས་རྗེས་ནས་རིམ་པས་བྱེད་ཡོང་ཤེས་སོང་ངམ། ད་དེ་བས་ཅང་མེད། ཡ་ད་དེ་ཡིན། ཐུགས་རྗེ་ཆེ།

དེབ་ཕྲེང་བཞི་པ་སྒོར་བུད་འདུག

བོད་རབ་གནས་ཆུ་ཡོས་ས་ཟླའི་ཚེས་༥ ཉིན་འཕགས་ཡུལ་རྫོགས་ཆེན་དགོན་པའི་ལས་ཐོག་མཁན་པོ་འཛམ་དཔལ་བསྟན་འཛིན་འཛིན་མཚོག་འཕགས་ཡུལ་བྱང་ཕྱོགས་དོན་གྲུབ་གླིང་བོད་མིའི་གཞིས་སྒར་སྔ་འགྱུར་རྙིང་མའི་གདན་ས་ཆེན་མོ་འོག་མིན་ཨོ་རྒྱན་སྨིན་གྲོལ་གླིང་གི་མཁན་ཆེན་རིན་པོ་ཚེའི་བླ་བྲང་དུ་སྨིན་གླིང་མཁན་ཆེན་ངག་དབང་མཁྱེན་རབ་རྒྱ་མཚོ་མཆོག་སྙུན་འདྲི་ལ་ཆེད་བཅར་ཞུས་འདུག

རིན་པོ་ཆེ་མཆོག་སྐུ་ཚེ་མི་འགྱུར་བཅོམ་ལྡན་ཚེ་མཐའ་ཡས་པའི་ངོ་བོར་བརྟན་པོར་བཞུགས་པའི་རྟེན་འབྲེལ་དུ་མགོན་པོ་ཚེ་དཔག་ཏུ་མེད་པའི་ཞལ་ཐང་སྤུས་ལེགས་ཤིག་འབུལ་ལམ་ཞུས།

སླད་བསྟན་པན་སྤྱི་དང་བྱེ་བྲག་གི་ཆེད་དུ་ཐུགས་བཞེད་མཐའ་དག་གེགས་མེད་ཡིད་བཞིན་དུ་འགྲུབ་པའི་རེ་སྨོན་བཅས་ཞུས་ཡོད་པའི་གནས་ཚུལ་དུ།

༢༠༢༣/༥/༢༤ ཉིན།

ཕྱི་ཟླ་༠༢ པའི་ཚེས་ས་༨ ནས་༡༢ བར་ཉི་གྲངས་༤ ༧སྐྱབས་རྗེ་རྫོགས་ཆེན་རིན་པོ་ཆེའི་སྐུ་སྲས་ཨོ་རྒྱན་རིག་འཛིན་ལགས་དང་། མཁན་པོ་འཇམ་དཔལ་བསྟན་འཛིན་ལགས་རྣམ་གཉིས་གྲུབ་དབང་རྒྱལ་བ་རྫོགས་ཆེན་དགོན་དང་། རྫོགས་ཆེན་བླ་བྲང་གི་ཚབ་བྱས་ནས། (more…)

སྐྱབས་རྗེ་རྫོགས་ཆེན་རིན་པོ་ཆེའི་བཀའ་དགོངས་ལྟར་༢༠༢༢/༡/༣༠ ཉིན་ནས་བཟུང་༧སྐྱབས་གཅིག་འཁོར་ལོའི་མགོན་པོ་རིགས་དང་དཀྱིལ་འཁོར་ཀུན་གྱི་སྤྲོ་གཞི་མཚུངས་མེད་བླ་མ་དམ་པ་རྡོ་གྲུབ་ཆེན་ཡིད་བཞིན་དབང་གི་རྒྱལ་པོ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨྲོས་ན་འཇིགས་མེད་ཐུབ་བསྟན་འཕྲིན་ལས་དཔལ་བཟང་པོ་གང་གི་ས་ལམ་གྱི་བར་ཆད་ཞི་ཞིང་། བསྟན་དང་འགྲོ་བའི་དོན་ཐུགས་ལ་གང་བརྣགས་པ་ཐམས་ཅད་གེགས་མེད་ཡིད་བཞིན་དུ་འགྲུབ་པ་དང་། འབྲེལ་ཐོག་ལྟོས་བཅས་རྣམས་ཀྱི་སྐྱེ་རྒྱུད་དུ་བསགས་པའི་དམ་ཚིག་ཉམ་ཆགས་བྱང་ཞིང་རྣམ་མཁྱེན་རྒྱལ་བའི་གོ་འཕང་རིན་པོ་ཆེ་ཐོབ་ཆེད་འདི་ག་འཕགས་ཡུལ་གྲུབ་དབང་རྒྱལ་བ་རྫོགས་ཆེན་དགོན་པའི་དགེ་འདུན་

པ་གྲངས་༢༡ རེ་ཉིན་ལྟར་རེ་མོས་ཀྱིས་གཏེར་ཆེན་ཀརྨ་གླིང་པའི་ཟབ་གཏེར་དུ་སྤྱན་དྲངས་པའི་ཟབ་ཆོས་ཞི་ཁྲོ་དགོངས་པ་རང་གྲོལ་ལས་ཐོས་གྲོལ་གྱི་ལྷ་ཞལ་ཕྱེས་ཏེ་ཞེ་དགུའི་རིང་དགོངས་རྫོགས་མཆོད་འབུལ་ཚོགས་དང་འཚོགས་མུས་ཡིན་པ་རེད།

༄༅། །ཨོ་རྒྱན་མཚོ་སྐྱེས་རྡོ་རྗེ་བསམ་བཞིན་མི་ཡི་ཤ་ཚུགས་སུ་བྱོན་པ། གསང་ཆེན་སྔ་འགྱུར་རྙིང་མའི་བསྟན་པ་རིན་པོ་ཆེ་སྤྱི་དང་། ཁྱད་པར་དཔལ་གསང་བ་སྙིང་ཐིག་གི་བསྟན་པའི་སྲོག་ཤིང་གཅིག་པུར་གྱུར་པ། མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན། ༧སྐྱབས་རྗེ་དམ་པ་རྡོ་གྲུབ་སྐུ་འཕྲེང་བཞི་པ་འཇིགས་མེད་ཐུབ་བསྟན་འཕྲིན་ལས་དཔལ་འབར་མཆོག །བོད་རབ་གནས་ལྕགས་གླང་ལོའི་མགོ་ཟླ་བའི་ཚེས་༢༣(2022/01/25) ཉིན་སྐུ་ཞི་བར་གཤེགས་པའི་ཡིད་སྐྱོའི་གནས་ཚུལ་ཐོན་པ་ནི་སྔ་འགྱུར་བ་སྤྱི་བྱེ་བྲག་ཀུན་ལ་ཚབ་མཚོན་མེད་པའི་གྱོང་ཁ་དང་། བཟོད་ཐབས་བྲལ་བའི་ཡིད་སྐྱོའི་གནས་སུ་གྱུར་ཀྱང་བྱ་ཐབས་བྲལ། (more…)