རྫོགས་ཆེན་སྐུ་ཞབས་དགེ་མང་སྐུ་རབས་བཞི་པ་འཇིགས་མེད་ཀུན་བཟང་།
བོད་རབ་བྱུང་བཅུ་དྲུག་པའི་ཤིང་ཡོས། སྤྱི་ལོ་༡༩༧༥ ལོར་ ཡབ་འབར་ཆུང་དཔོན་མཐུ་སྟོབས་མགོན་པོ་དང་། ཡུམ་རིགས་བཟང་མ་རྡོ་རྗེ་ལྷ་མོ་གཉིས་ཀྱི་སྲས་སུ་སྐུ་འཁྲུངས་བ་བཞིན། པདྨའི་རྒྱལ་ཚབ་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ལ་མི་ཉག་རྒྱལ་དབང་ཉི་མ་ནས་དགེ་མང་ཡང་སྲིད་ངོས་འཛིན་དགོས་ཚུལ་ཡང་ཡང་ཞུས་ཏེ།
སྤྱི་ལོ་༡༩༣༡པ་སྟེ་རབ་བྱུང་བཅུ་དྲུག་པའི་སྐྱེས་བདག་ཅེས་པ་ལྕགས་མོ་ལུག་གི་ལོའི་བོད་ཟླ་དྲུག་པའི་འཕེལ་ཕྱོགས་ཀྱི་ཚེས་བཞིའི་ཉི་ཤར་འབྲུག་གི་སྔ་ཆ་ལ། ཡབ་རྣལ་འབྱོར་གྱི་དབང་ཕྱུག་གྲུབ་པའི་རིག་འཛིན་གྲགས་པ་རྒྱལ་མཚན་དང་ཡུམ་རིག་བཟང་གི་མཁའ་འགྲོ་མ་དཀར་ལྡོག་ལྷ་མོ་གཉིས་ཀྱི་སྲས་སུ་སྐུ་
ཁྱེའུ་རིག་འཛིན་ཆེན་མོ་དཔའ་བོ་ལས་རབ་རྩལ་ནི། མཚན་གཞན་རིག་རྩལ་ཐོགས་མེད་གླིང་པ། ཞེས་ཀྱང་ཞུ། ཕྱི་ལོ་དུས་རབས་བཅོ་བརྒྱད་པའི་ནང་མདོ་དབུས་སྐོར་གསུམ་དུ་ཕྱེས་པའི་མདོ་སྨད་སྡེ་དགེའི་ཡུལ་གྱི་བྱེ་བྲག་ཆེ་ཡོ་ཞེས་པའི་འབྲོག་སྡེ་ཆེན་པོ་ཞིག་ཏུ་རིགས་རུས་མཐོ་ཞིང་བཙུན་པ་ཇིང་གིར་གནམ་གྱི་རྒྱལ་པོའི་རིགས་སུ་རབ་བྱུང་བཅུ་གཉིས་པའི་ཤིང་ཡོས་༼༡༧༣༥༽ལོར་འཁྲུངས། སྐུ་བྱིས་པའི་དུས་ནས་སྔོན་གནས་རྗེས་སུ་དྲན། ཡི་གེ་འབྲི་ཀློག་སོགས་སློབ་གཉེར་མ་དགོས་པར་མཁྱེན། དགུང་ལོ་བདུན་གྱི་དུས་གཏེར་སྟོན་རཏྣ་གླིང་པ་ཡིན་པར་སྐྱེ་བ་དྲན་ཅིང་གཏེར་གྱི་བརྡ་ཡིག་ཀློག་པ་དང་། ཆོས་འཆད་ཤེས། དགུང་ལོ་བཅུ་ནས་ཉི་སྤྲུལ་རིན་པོ་ཆེས་རྗེས་སུ་བཟུང་། སྲིང་རྫོང་འོད་གསལ་སྒྲུབ་སྡེར་ཕེབས། ཉི་སྤྲུལ་རིན་པོ་ཆེས་བཀའ་ཆོས་ཐམས་ཅད་བུམ་པ་གང་བྱོས་ཚུལ་དུ་བསྩལ། སྲིང་རྫོང་དུ་བཞུགས་སྐབས་རང་ཡུལ་ནས་བླ་རྒན་ཆོས་མཆོག་འདས་པ་མངོན་སུམ་དུ་གཟིགས་དེ་ལྟ་བུའི་དགོངས་པ་མང་དུ་བྱུང་། དེ་སྐབས་སྤྱན་རས་གཟིགས་ཀྱིས་དགེ་བསྙེན་ཞི་བའི་གོ་ཆ་དང་། རྡོ་བོད་མཚམས་སུ་བོ་དྷི་རཱ་ཛ་དང་། གུ་རུ་ཆོས་དབང་གི་སྲས་པདྨ་དབང་ཆེན་ཡིན་ཚུལ་སོགས་བྱུང་། རྗེ་ཉིད་ཀྱི་གཏེར་ལུང་ལས་ལང་གྲོ་ལོ་ཙཱ་ཡིན་ཚུལ་དང་གཏེར་གྱི་ཁ་བྱང་ཡང་ཕྱག་ཏུ་སོན། དེ་ནས་རང་ཡུལ་དུ་ཕེབས་པས་ཐོ་བཙམས་པ་དག་ལ་སྲུང་མ་རྣམས་བསྐུལ་ཏེ་མངོན་སྤྱོད་ཀྱིས་བསྒྲལ། སླར་ཡང་སྲིང་རྫོང་དུ་ཕེབས་ནས་བཀའ་འགྱུར་གྱིས་མཚོན་པའི་འབུལ་ཆེན་མཛད་ནས་ཕྱིར་ཕེབས། སླར་ཉི་སྤྲུལ་རིན་པོ་ཆེ་མདོ་སྨད་ཕྱོགས་ལ་ཕེབས་པ་ནས་ཞབས་པད་མཉེས་པ་གསུམ་གྱིས་མཆོད་ནས་བཀའ་ཆོས་བསམ་གྱིས་མི་ཁྱབ་པ་གསན། རྗེ་དེ་ཉིད་ཀྱིས་ཀྱང་དོན་གྱིས་རྒྱལ་ཚབ་ཏུ་དབང་བསྐུར་ཞིང་དོན་རྒྱུད་སྙིང་པོའི་བསྟན་པ་གཏད་པར་མཛད། དེ་ནས་མཚོ་སྔོན་ཕྱོགས་སུ་ཕེབས། དེ་དུས་དམ་ཅན་རྡོ་རྗེ་ལེགས་པས་ཀརྨ་པ་རང་བྱུང་རྡོ་རྗེ་ཡིན་ཟེར་བ་དང་། དམ་ཅན་པུ་ཏྲས་བླ་མ་དམ་པ་བསོད་ནམས་རྒྱལ་མཚན་ཡིན་ཚུལ་ལུང་བསྟན་བྱུང་། དད་ལྡན་འགའ་ལ་རྫོགས་ཆེན་གྱི་ཁྲིད་གནང་བས་ངོ་མཚར་དུ་མ་དང་། མཚོ་སྔོན་པོ་ནས་ཡིད་བཞིན་ནོར་བུ་ཞིག་གཏེར་ནས་བཞེས། རང་ཡུལ་དུ་ཕེབས་ནས་ཕུར་སྒྲུབ་མཛད་པས་ཕུར་པ་རྣམས་ཁྲབ་པ་དང་ལྡིང་བ་སོགས་དང་ཕུར་པ་ཆུང་བ་འགའ་རི་རྩེ་རྣམས་སུ་འཕུར་བ་དང་ཕུར་གཏོར་ལས་མེ་འབར་བ་སོགས་བྱུང་། སྙིགས་དུས་ཀྱི་རྒྱ་འདྲེ་འགོང་པོས་ཚ་དབལ་གཅོག་བྱེད་ཁྲོ་རྒྱལ་ཡཀྴ་མེ་དབལ་གྱི་ཆོས་སྐོར་ཞིག་དངོས་སུ་ཕྱག་ཏུ་བབས། སྐྱེ་བདུན་མྱོང་གྲོལ་གྱི་སྒྲུབ་ཆེན་འཛུགས་པའི་དུས་ཐམས་ཅད་དུ་རིལ་བུ་འཕུར་བ་དང་དྲི་བཟང་འཐུལ་བ་སོགས་གཞན་འགྲན་མེད་པར་བྱུང་། ཉི་སྤྲུལ་སྐུ་རིན་པོ་ཆེ་སྐུ་གཤེགས་ནས་ཀྱང་ཡེ་ཤེས་ཀྱི་སྐུས་ལན་དུ་མར་རྗེས་སུ་བཟུང་ཞིང་ལུང་བསྟན་གདམས་པ་བསྩལ་བ་སོགས་བྱུང་། ཟླ་བའི་སྦམ་ཆེན་ལུང་པ་ནས་གནོན་བྱ་འདྲེ་བདུད་ཀྱི་བླ་རྡོ་དང་། གནོན་བྱེད་གུ་རུའི་ཞབས་རྗེས་རྣམས་ཕྱག་ཏུ་སོན། དེ་ཙམ་ནས་ས་སྐྱ་གོང་མ་རིན་པོ་ཆེ་ངག་དབང་ཀུན་དགའ་བློ་གྲོས་ ཀྱིས་གསུང་གིས་བསྐུལ་ནས་སྡེ་དགེ་ས་དབང་བཟང་པོ་དང་རྗེ་བཙུན་དབྱངས་ཅན་སྒྲོལ་མས་སྡེ་དགེ་རྒྱལ་ཁབ་ཆེན་པོར་གདན་དྲངས་ཏེ་སྡེ་དགེ་རྒྱལ་པོའི་དབུ་བླར་བཀུར། བདུད་འདུལ་ལྷ་ཁང་དུ་འདྲེ་བདུད་ཀྱི་བླ་རྡོ་མནན་པའི་སྟེང་ནས་གུ་རུ་རྡོ་རྗེ་གྲོ་ལོད་ཀྱི་ཞབས་རྗེས་ཀྱིས་མནན། དེའི་སྟེང་དུ་གུ་རུ་སྣང་སྲིད་ཟིལ་གནོན་སྐུ་ཐོག་ཚད་མ་གཅིག་བཞེངས་ནས་རབ་ཏུ་གནས་པ་སོགས་ལུང་དོན་བཞིན་འགྲུབ་པས་མི་ལོ་ཉི་ཤུ་ཚུན་ལ་མཐའ་མིའི་གནོད་པ་མི་འབྱུང་བར་ཞལ་གྱིས་བཞེས། དག་པའི་སྣང་བར་རྔ་ཡབ་དཔལ་རིར་གཤེགས་པས་རྒྱལ་ཡུམ་ཡེ་ཤེས་མཚོ་རྒྱལ་གཤིན་རྗེ་གཤེད་ཀྱི་སྐུར་བཞེངས་ནས་དབང་བསྐུར་ཞིང་། གཤིན་རྗེ་གཤེད་དམར་ཡི་དམ་དུ་སྩལ། ཟབ་གཏེར་དང་དག་སྣང་ཟུང་དུ་འབྲེལ་བའི་གདམས་ཟབ་མང་པོ་ཡི་གེར་འགོད་པར་མཛད་ཅིང་། ས་སྐྱོང་མིའི་བདག་པོའི་བསྟན་སྲིད་ཀྱི་རིམ་གྲོ་འཕྲིན་ལས་བཞི་གང་ལ་གང་འཚམས་ཀྱིས་དུས་ཀུན་ཏུ་བསྒྲུབ་པར་མཛད་པས་ཐུབ་བསྟན་ནོར་བུ་གླིང་གི་དགོན་པ་རྟེན་བརྟེན་པ་དང་བཅས་གསར་འདེབས་གནང་ནས་དགེ་འདུན་འདུ་བའི་སྒོ་སྦྱར་བ་སོགས་མཛད་ནས་བདག་རྐྱེན་ཚད་མེད་པའི་སྲི་ཞུ་ཕུལ། སྡེ་དགེ་ས་སྐྱོང་དབང་མོར་སྲིད་སྤེལ་གྱི་ཟ་ཡིག་བསྲེགས་ཐལ་ཕུལ་བར་བདུད་རྩིའི་བཅུད་དུ་འཁྱིལ་བའི་དགེ་མཚན་མངོན་དུ་གྱུར། འདི་སྐབས་ས་སྐྱོང་ཆེན་མོའི་རྒྱལ་བུར་བླ་བསླུ་མཛད་པས་མར་གྱི་བླ་ལུག་ལ་བལ་དངོས་སུ་སྐྱེ་བ་བྱུང་། སླར་ཡང་བོད་ཡུལ་དབུས་ལྗོངས་སུ་བྱོན། ཤཱཀྱ་མུ་ནེའི་ཐུགས་ཀ་ནས་དེ་བཞིན་གཤེགས་པའི་རིང་བསྲེལ་ཞིག་ཕྱག་ཏུ་བབས། བསམ་ཡས་མཆིམས་ཕུར་རྩ་གསུམ་སྒྲུབ་པའི་གདམས་སྐོར་སོགས་དགོངས་གཏེར་དུ་བབས། སྲིང་མོ་རྫོང་ཕུག་ནག་བདེ་བ་ཆེན་པོ་ནས་ཨ་མྲྀཏ་དང་། དབུ་རུ་སྟོང་ཏི་སྒྲོ་བྲག་ནས་རཏྣ་གླིང་པས་ཡང་གཏེར་སྦས་པའི་གུ་རུའི་སྐུ་ཚབ་པདྨ་གུ་རུ་སོགས་སྤྱན་དྲངས། འདམ་རྒྱལ་ཆེན་བཅོ་བརྒྱད་སོགས་དམ་ལ་བཏགས་ནས་རང་གནས་སུ་ཕེབས། སྔ་ཕྱི་ཀུན་ཏུ་ས་གནད་གསོ་བ་དང་ས་དམིགས་གཟེར་གང་ཆེ་རྣམས་སུ་དམ་སྲི་འགོང་པོ་མནན་པའི་ལས་ལ་སྦྱར་བའང་མང་དུ་མཛད་ཅིང་། ཁྱད་པར་དུ་གཞི་བདག་དཀར་ཕྱོགས་སྐྱོང་བ་རྣམས་ལ་དམ་ཚིག་བསྒྲགས་ཤིང་བསྟན་འགྲོའི་ཕན་བདེ་སྒྲུབ་པའི་གཉེར་གཏད་ཅིང་གཟེངས་བསྟོད་པ་དང་ནག་ཕྱོགས་འབྱུང་པོ་རྣམས་བཀའ་ནན་རབ་ལྗིད་ཀྱིས་ཟིལ་གྱིས་མནན་ནས་དམ་ལ་བཏགས། རྒྱ་འདྲེ་དམ་སྲིའི་རིགས་རྣམས་གནས་ནས་སྐྲད་པ་སོགས་ཀྱི་ཕྱིར་མེ་ལུག་ཕྱི་ལོ་ ༡༧༨༧ བོད་ཟླ་ལྔ་པ་ནས་རི་འགྲིམས་མཛད་ནས་རྒ་སྟོད་ཚུན་ཞབས་ཀྱིས་བཅགས་ནས་བསྟན་འགྲོའི་བདེ་ཐབས་མང་དུ་བསྒྲུབས། སྐབས་དེ་ཙམ་ནས་རྗེ་འདིས་བླ་ཆེན་འབྱོར་ལྡན་ཇི་སྙེད་ཀྱི་ཐུགས་མཚོར་ནམ་ཡང་ཤར་མ་མྱོང་བའི་ཐུགས་བསྐྱེད་ཀྱི་ལྷག་བསམ་ཟླ་བ་ཚེས་པ་ལྟ་བུ། སྤྱིར་གསང་ཆེན་སྔ་འགྱུར་འདི་ཀུན་མཁྱེན་ཉི་མའི་གཉེན་གྱིས་བསྟན་པ་ཐམས་ཅད་ཀྱི་ཉིང་ཁུ་ཡིན་ཡང་། གསར་ལུགས་རྣམས་རང་ཕྱོགས་འདེགས་པའི་དབང་ཆ་རྟག་ཆོད་ཀྱིས་རྙིང་རྒྱུད་རྣམས་དབྱེན་བཅོས་ཏེ་མ་བུ་སོ་སོར་ཡ་བྲལ་བ་ལྟར་གྱུར་པས་དཔེ་རྒྱུན་རྣམས་དཀོན་པ་དང། རྒྱུན་ཡོད་པ་རྣམས་ཀྱང་ཚང་མིན་སྣ་ཚོགས་ཡི་གེ་དག་པོ་མི་འོང་བར་འདུག་པ་སོགས་ལ་གཟིགས་ནས། སྤྱིར་རྒྱལ་བའི་བསྟན་པ་རིན་པོ་ཆེ་ལ་གཅེས་སྤྲས་སུ་བྱ་བ་དང་། ཡང་སྒོས་སྔ་འགྱུར་གསང་ཆེན་རྡོ་རྗེ་ཐེག་པའི་ཆོས་ཚུལ་མི་ཉམས་ཤིང་གོང་ནས་གོང་དུ་འཕེལ་རྒྱས་སུ་འབྱུང་བའི་སླད་དུ། དངུལ་སྲང་སྟོང་ཕྲག་ལྷག་པའི་དངོས་རྫས་གསེར་དངུལ་རྟ་ནོར་སོགས་རྩལ་སྤྲུགས་སུ། ལྷ་ལྕམ་ངང་འབྱུང་རྒྱལ་མོའི་རྣམ་འཕྲུལ་སྡེ་དགེ་དཔོན་མོ་ཚེ་དབང་ལྷ་མོ་ལ་ཕུལ་ནས་རྙིང་མའི་རྒྱུད་འབུམ་རིན་པོ་ཆེ་པར་དུ་བརྐོ་དགོས་ཚུལ་བཀའ་ནན་ཟློག་ཏུ་མེད་པས་ནན་ཞུ་ཕུལ་བ་བཞིན། ས་སྐྱོང་དབང་མོ་ཡང་དགྱེས་བཞིན་དུ་གནང་ནས། རབ་བྱུང་བཅུ་གསུམ་པའི་ཤིང་སྟག་ ༡༧༩༤ ལོའི་བོད་ཟླ་ ༢ ཚེས ༣ ནས་མགོ་བརྩམས་ཏེ་ཐོག་མཐའ་བར་གསུམ་གྱི་བྱ་བ་མཐའ་དག་ས་རྟའི་ ༡༧༩༨ བར་སྔ་ཕྱི་ལོ་ངོ་ལྔར་བསྒྲུབས་པས་ལེགས་གྲུབ་མཛད་དེ་གསང་ཆེན་བསྟན་པའི་ཞབས་འདེགས་འགྲན་ཟླ་དང་བྲལ་བ་མཛད།
གཞན་ཡང་རྗེ་ཉིད་ཀྱི་དགོངས་གཏེར་སྐོར་རྣམས་འདབ་གཏེར་དུ་བཞུགས་པར་དགོངས་པའི་ཚེ་ས་སྐྱོང་དབང་མོ་འདི་ཉིད་ཀྱི་སྲི་ཞུ་དང་བཅས་ཐུགས་སྣ་བསྲིངས་དགོས་ཚུལ་གསོལ་བ་བཏབ་པ་བཞིན་གནང་ནས་ལུང་ཟིན་ཆོས་ཀྱི་བདག་པོ་རྣམས་ལ་རྒྱ་ཆེར་སྤེལ་བར་མཛད་པ་ཡིན་ནོ། །ཡང་གཏེར་སྟོན་འདིས་གཏེར་ནས་བཏོན་པའི་ནད་བརྒྱ་སྔགས་གཅིག་གི་སྐོར་ཞེས་པ་དེའི་མཇུག་བྱང་དུ། འཇམ་དབྱངས་མི་ཕམ་རྣམ་རྒྱལ་གྱིས་ཞེས་པ་འདི་ནི་སྤྲུལ་པའི་གཏེར་སྟོན་ཆེན་པོ་དཔའ་བོ་ལས་རབ་རྩལ་གྱི་གཏེར་ཁ་ལས་བྱུང་བ་ལགས་ཏེ། གཞན་རྡོ་རྗེ་གླིང་པ་སོགས་ཀྱི་གཏེར་ཁ་དུ་མ་ནས་བྱུང་བ་རྣམས་ཚིག་མང་ཉུང་ཅི་རིགས་སུ་འདུག་ཀྱང་དོན་གཅིག་པར་བྱོན་པ་ལས། འདིར་ལས་རབ་རྩལ་གྱི་གཏེར་མ་འདི་ཚིག་དོན་ལེགས་འདུས་སུ་འདུག་པས་དེ་ཉིད་གཙང་མར་བཀོད་པའོ། །ཞེས་གསུངས་པས་གཏེར་སྟོན་འདི་བའི་གཏེར་ཡིག་རྣམས་ཀུན་གྱིས་ཚད་འཛིན་གནང་ས་ཞིག་ཀྱང་ཡིན་པར་ངེས། གཞན་ཡང་ངོ་མཚར་བའི་མཛད་པ་མཐའ་ཡས་པ་ཡོད་ཀྱང་ཞིབ་པ་རྣམ་ཐར་ལས་ཤེས་པར་བྱའོ། །དེ་ལྟར་བསྟན་པ་དང་སེམས་ཅན་གྱི་དོན་རྒྱ་ཆེར་མཛད་ནས་རེ་ཞིག་གདུལ་བྱའི་ཡུལ་དེ་ཙམ་དུ་གཟིགས་ནས་ཆོས་དབྱིངས་བདེ་བ་ཆེན་པོའི་རང་བཞིན་དུ་གཤེགས། །
སྐུ་ཕྲེང་གཉིས་པ་ཁྱེའུ་རིག་འཛིན་ཆེན་མོ་འགྲོ་འདུལ་འཕྲིན་ལས་རྡོ་རྗེ། སྐུ་ཕྲེང་གསུམ་པ་ཁྱེའུ་རིག་འཛིན་ཆེན་མོ་ནམ་མཁའ་དྲི་མེད་དཔལ། སྐུ་ཕྲེང་བཞི་པ་ཁྱེའུ་རིག་འཛིན་ཆེན་མོ་ཐུབ་བསྟན་འཕྲིན་ལས་ནོར་བུ། སྐུ་ཕྲེང་ལྔ་པ་ཁྱེའུ་རིག་འཛིན་ཆེན་མོ་རིག་འཛིན་ཆོས་ཀྱི་དབང་ཕྱུག་འཕྲིན་ལས་རབ་རྒྱས་བཅས་ད་ལྟའི་བར་སྐུ་རབས་ལྔ་ཙམ་བྱོན་ཟིན་པ་དེ་དག་གི་རྣམ་ཐར་ལོ་རྒྱུས་སྐོར། སྐུ་རབས་བཞི་པ་ཁྱེའུ་རིག་འཛིན་ཆེན་མོ་ཐུབ་བསྟན་འཕྲིན་ལས་ནོར་བུ་དང་། ལྔ་པ་ད་ལྟར་འཚོ་ཞིང་བཞུགས་པ་ཁྱེའུ་རིག་འཛིན་ཆེན་མོ་རིག་འཛིན་ཆོས་ཀྱི་དབང་ཕྱུག་འཕྲིན་ལས་རབ་རྒྱས་མཆོག་ཟུང་ལས་གཞན་རྣམས་སྐུ་ཕྲེང་རིམ་བྱོན་གྱི་རྣམ་ཐར་འདིར་མ་འཁོད་དོ། ། ཞེས་པ་ཙམ་ལས་རྣམ་ཐར་གྱི་ས་བོན་མ་རྙེད། རྗེས་ནས་རྙེད་སོན་བྱུང་ན་མཚམས་འདིར་འགོད་དགོས།
སྐུ་ཕྲེང་བཞི་པ་ཁྱེའུ་རིག་འཛིན་ཆེན་མོ་ཐུབ་བསྟན་འཕྲིན་ལས་ནོར་བུ།
ཁྱེའུ་རིག་འཛིན་ཆེན་པོ་སྐུ་ཕྲེང་བཞི་པ་ཐུབ་བསྟན་འཕྲིན་ལས་ནོར་བུ་ནི། མགོ་ལོག་ཨར་ཀྱང་གོང་མ་ཤ་ཚང་བདེ་པ་ཡབ་མཆོག་ཚང་ནོར་རྒྱས་དང་། མ་ཡུམ་ཉི་མ་ལོ་ལོ་གཉིས་ཀྱི་སྲས་སུ་འཁྲུངས། ཁོང་གི་ཞབས་ཞུ་བ་པད་ཚེ་ལོ་མ་༼ཐུབ་བསྟན་གཟའ་རོ་༽གཉིས་ཀྱིས་གདན་དྲངས་ནས། རིན་པོ་ཆེ་དགུང་ལོ་བཅོ་བརྒྱད་ཡན་མན་ལ་མགོ་ལོག་ཏུ་བྲོས། དགེ་གཟའ་མ་ཟེར་བའི་གསང་ཡུམ་ཞིག་བཞེས། དེ་རྗེས་དགེ་རྩེ་དཔལ་མགོན་གྱི་སྲས་མོ་དགེ་རྩེ་འབྲུག་གྲགས་ཀྱི་བུ་མོ་རྒྱ་ཇོ་ཟེར་བ་ཞིག་ཀྱང་གསང་ཡུམ་དུ་བསུས་ཏེ། སྲས་གཉིས་བྱུང་བའི་ཆེ་བར་སྲས་རྡོ་པ་ཞེས་ཞུ། ཡ་མཚན་ཅན་ཞིག་ཡོད་ཀྱང་རིག་གནས་གསར་བརྗེའི་སྐབས་འདས་གྲོངས་སུ་སོང། ཆུང་བ་ཆོས་ཉིད་དོན་རྟོགས་ནི་རྒྱལ་རོང་ནམ་ལྷུན་གྱི་ཡང་སྤྲུལ་ཡིན། འཁྲུངས་སྐབས་གསང་ཡུམ་ལ་མེ་མདའ་ཐེབས་ཏེ་གསང་ཡུམ་ཡང་འདི་ཉིད་ལ་གནོད་སྐྱོན་མ་བྱུང་བར་ད་ལྟར་ཡང་སྐུ་འཚོ་ཞིང་བཞུགས། རྫོགས་ཆེན་རིན་དགེན་མ་ཐུབ་བསྟན་ཆོས་རྡོར་ནས་ཁྱེའུ་རིག་འཛིན་ཆེན་མོ་སྐུ་གོང་མའི་ཡང་སྲིད་འཁྲུལ་མེད་དུ་ངོས་འཛིན་གནང་། མཚན་ལ་ཐུབ་བསྟན་འཕྲིན་ལས་ནོར་བུ་ཞེས་གསོལ། དཔལ་ལྡན་ས་སྐྱ་བའི་ཕུན་ཚོགས་ཕོ་བྲང་པ་འཇིག་བྲལ་བདག་ཆེན་མཆོག་སྒ་སྐྱེ་རྒུར་ཕེབས་དུས། ཁྱེའུ་རིག་འཛིན་ཆེན་པོ་དཔའ་བོ་ལས་རབ་རྩལ་སྐུ་དངོས་ཀྱི་རྣམ་པར་མཇལ་བར་མ་ཟད། མཎྜལ་རྟེན་གསུམ་ཡང་འབུལ་གནང་མཛད་ཚུལ་དུས་ཕྱིས་ཕུན་ཚོགས་ཕོ་བྲང་པ་སྐུ་དངོས་ཀྱིས་གསུངས། ནོར་གླིང་དགོན་གྱི་གཡས་ཕྱོགས་གསང་སྔགས་ཆོས་གླིང་ཞེས་པའི་ལུང་པ་དེར་ཡོད་པའི་གནས་མཆོག་གུ་རུའི་ལྷ་ཁང་གྲགས་པའི་མཚམས་ཁང་དུ་སྐུ་མཚམས་ལ་བཞུགས་ནས་རྩེ་གཅིག་སྒྲུབ་པ་ཉམས་ལེན་མཛད་པས་གྲུབ་པའི་གོ་འཕང་མཐོན་པོར་སླེབས་པ་དང་ལྷ་འདྲེ་བྲན་དུ་ཁོལ་བ། མངོན་ཤེས་དང་རྫུ་འཕྲུལ་ཐོགས་མེད་དུ་བརྡོལ་བའི་ངག་རྒྱུན་ཤིན་ཏུ་མང་།
ཁོང་དང་སྨིན་གླིང་ཁྲི་ཆེན་མཉམ་དུ་བཀའ་བརྒྱད་ཀྱི་སྐུ་མཚམས་བཞུགས། སྤྱི་ལོ་ ༡༩༥༤ ལོར་གུང་ཁྲན་གྱིས་དང་པོ་བསླུ་བྲིད་བྱས་ནས་ཆབ་སྲིད་ཨུ་ཡོན་གཞོན་པར་བསྐོ་བཞག་བྱས། སྐབས་དེར་གུང་ཁྲན་གྱིས་དམངས་གཙོ་བཅོས་བསྒྱུར་གྱི་ལས་འགུལ་འགོ་འཛུགས་བྱ་རྩིས་ཐོག དགོན་པ་གྲྭ་ཚང་དང་བླ་སྤྲུལ་དགེ་བཤེས་རྩ་མེད་གཏོང་རྒྱུའི་ཇུས་ངན་ལ་ཁས་ལེན་རྩ་ནས་མ་གནང་བས། གློ་བུར་དུ་འཛིན་བཟུང་གིས་བཙོན་ཁང་དུ་བཅུག འབའ་ལའི་ཁ་བདེ་ཟེར་བའི་བུད་མེད་རྫ་ཆུ་ཁ་རྫོང་གི་བུད་མེད་ཀྲུའུ་རིན་རྒན་པ་ཡིན་ཞིང། ཁོང་དང་རིན་པོ་ཆེའི་བར་སྔ་ས་ནས་གསང་བའི་འབྲེལ་བ་ཡོད་པ་མ་ཟད་ཕྲུ་གུའི་མིང་ལ་རིག་འཛིན་དབང་མོ་ཟེར་ཡང་གྲགས་མི་ཆེ་ལ་རྒྱུན་ལྡན་ཤའོ་ལེང་ཟེར་བའི་བུ་མོ་ཞིག་ཀྱང་ཡོད་པས། ཁོ་མོས་བླ་མ་ལ་ས་གནས་ཉེན་རྟོག་པས་རིང་མིན་སྐུ་ཉིད་སྐྲོང་འཆར་ཡོད་པས་བྲོས་ཐབས་དགོས་པའི་གསང་བརྡ་འབྱོར། སྐབས་དེར་དགེ་རྩེ་ཨ་རིག་རྫ་བའི་མི་ཁ་ཤས་ཤིག་སླེབས་ནས་རྫ་ཆུ་ཁ་རྫོང་ལ་བླ་མ་འདི་ཉིད་ཀྱི་མདུན་དུ་ཐུག་ཙམ་ཆོག་པའི་ཆོག་མཆན་ཞུས་པ་ལྟར་བཀའ་ཁྲོལ་ཐོབ་པས། ཁོ་ཚོས་བཙོན་དུ་མུ་མཐུད་ནས་བཞུགས་ན་སྲོག་ཉེན་ཡོད་པས་བྲོས་ཐབས་དགོས་ཚུལ་ཞུས་དོན་བཞིན་དེ་ནུབ་བཙོན་ཁང་གཏོར་ནས་བྲོས་བྱོལ་ལ་ཕེབས། ཟླ་བ་གཉིས་ལྷག་རིང་དགྲ་བོ་དང་དམར་འཛིང་དྲག་པོ་བྱུང།
རིག་གནས་གསར་བརྗེའི་སྐབས་ཁྱེའུ་རིག་འཛིན་ཆེན་མོའི་སྐུ་རབས་གོང་མ་༼སྐུ་ཕྲེང་གསུམ་པ་༽ཁྱེའུ་རིག་འཛིན་ཆེན་མོ་ནམ་མཁའ་དྲི་མེད་དཔལ་སྐུ་དམར་གདུང་དུ་བཞུགས་ཡོད་པ་དེ་ཉིད། ཞབས་ཞུ་བ་ཐུབ་བསྟན་དང་པད་ཚེ་གཉིས་ཀྱིས་མཚན་མོར་ལྐོག་ཏུ་གདན་དྲངས་ནས་འགྲོ་སྐབས་རྒྱ་མིས་བཟུང་། བཙན་པོ་དབང་ཡོད་ཀྱིས་པུར་སྒམ་ཁ་ཕྱེས་ནས་སྐུ་གདུང་ཕྱི་ལ་བཏོན་རྗེས་ཁྱི་ལ་སྟེར་ཤུལ་ཕྱག་ལག་ཙམ་ཞིག་ལུས་ཡོད་པ་དེ་ཉིད། དུས་ཕྱིས་སྲིད་ཇུས་གུ་ཡངས་བྱུང་སྐབས་ནང་རྟེན་དུ་བྱས་ནས་གསེར་གདུང་བཞེངས་པ་ད་ལྟར་གཞིས་དགོན་ནོར་གླིང་དུ་ཡོད། ༡༩༦༦ ལོར་དགེ་རྩེ་ཨ་རིག་གི་ས་ཆ་སྒོའམ་གཡག་སྙིང་དུ་གྲགས་པ་དེར་ཁོང་གི་རྗེས་སུ་རང་འགུལ་གྱིས་འོངས་པའི་དད་ལྡན་བོད་རིགས་སྟོང་ཕྲག་མང་པོ་དང་མཉམ་དུ་དགྲ་བོའི་མེ་མདའི་ཁར་ཞི་བར་གཤེགས།
གུ་བཀྲའི་ཆོས་འབྱུང་ལས། ཤར་མི་ཉག་པ། འཇམ་དཔལ་བསྟན་འཛིན་ནས་སྤེལ།
སྤྲུལ་པའི་གཏེར་སྟོན་ཆེན་པོ་རཏྣ་གླིང་པ་ནི། ཞིག་པོ་གླིང་དང་། འགྲོ་འདུལ་གླིང་། ཞེས་སྐུ་གཅིག་ལ་མཚན་གསུམ་དུ་གྲགས། མངའ་བདག་ཉང་དང་གུ་རུ་ཆོས་དབང་གི་ལུང་བསྟན་ནས་ཇི་ལྟར་གསུངས་པ་བཞིན་དུ། ལྷོ་བྲག་གྲུ་ཤུལ་ཞེས་པའི་ཆར་ཡབ་ཕྱུག་པོ་མདོ་སྡེ་དར་དང་། ཡུམ་སྲི་ཐར་སྨན་ཞེས་པའི་སྲས་སུ་རབ་བྱུང་བརྒྱད་པའི་ཆུ་ལུག་ ༡༤༦༣ ལོ་སྐུ་འཁྲུངས། སྐུ་ན་ཆུང་དུས་ཀྱི་མཚན་ལ་རིན་ཆེན་དར་ཞེས་གསོལ། དགུང་ལོ་དྲུག་གི་དུས་ཡབ་ཀྱིས་ཡིག་ཀློག་བསླབས་པས་ཚེགས་མེད་དུ་མཁྱེན་ཅིང་། ཡི་གེ་འབྲི་བ་སོགས་མ་བསླབས་པར་མཁས་པར་མཁྱེན། དགུང་ལོ་བཅུ་ཙམ་ནས་དག་པའི་སྣང་བ་འབའ་ཞིག་ཤར་ནས་མཚན་ལམ་དུ། པཎྜི་ཏ་དང་ཨ་ཙརྱ་འགས་དབང་བསྐུར་བ་དང་། ཆོས་འཆད་པ་དང་། སྐུ་གསུང་འགའི་རྟེན་ཤོག་སེར། པུ་ཏི་མང་པོ་དང་། རྡོ་རྗེ་དྲིལ་བུ་ལྷ་སྐུ་སོགས་རྙེད་པའི་མཚན་ལམ་ཡང་ཡང་དང་། དགུང་ལོ་བཅུ་གསུམ་དུ་རྒྱ་གར་རྡོ་རྗེ་གདན་གྱི་བཀོད་པ་རྣམས་གསལ་པོར་དྲན།
གཞན་ཡང་སྔོན་སྦྱངས་ཀྱི་སྟོབས་ཀྱིས་བཟོ་དང་། གསོ་བ། སྒྲ། སྙན་ངག་སོགས་དང་ཐ་ན་གླུ་བྲོ་ཚུན་ལ་ཁྱད་དུ་མཁས་ཏེ། དེ་དག་ཀྱང་གཏེར་ལུང་ལས། ཤེས་བྱ་དང་ཡོན་ཏན་ནི་སྔོན་སྦྱངས་ཀྱི་ལས་སད་པས་མ་བསླབས་པར་རང་བྱུང་དུ་ཤེས་ནས་མཆི། ཤར་གྲོལ་གྱི་མཚང་རིག་པས་སྤྱོད་པའི་ཚུལ་མི་འཚོལ། ཤེས་རབ་ཀྱི་བློ་ཁ་བྱེ་བས་མདོ་སྔགས་ཀྱི་དོན་ལ་མཁས་པ། སྦྱངས་པ་སྔོན་དུ་སོང་བས་རྟོགས་པ་ཐོད་རྒལ་དུ་ཤར་བ། ཐབས་ཤེས་ཀྱི་རྩལ་རྒྱས་པས་གཅོད་བྱེད་ཀྱི་ལན་མི་ཟློག་པ། རིག་པ་ལ་དྲུང་ཐོན་པས་མཐུན་འཇུག་གི་སྤྱོད་པ་མི་མཁས་པ། གཏད་མེད་ཀྱི་ཉམས་ཤར་བས་གྱོང་ཚིག་རང་གར་སྨྲ་བ། ཐབས་ལྡན་གྱི་དཔའ་བོ་ཡིན་པས་རིགས་བཟང་གི་བུད་མེད་འདུ་བ། ཚངས་པའི་དབྱངས་མངའ་བས་གདུལ་བྱའི་ཡིད་འཕྲོག་པ། གཟུགས་དང་ལང་ཚོ་ལྡན་ཞིང་ཐམས་ཅད་ཆོ་རོལ་དུ་སྨྲ་བ། རྫུན་ཆེ་བརྟག་པར་དཀའ་ཞིང་གཞན་གྱིས་དགོངས་པ་མི་ལོན་པ། ངེས་མེད་ཀྱི་ཚུལ་སྤྱོད་ཅིང་གསང་སྤྱོད་ཉམས་སུ་ལེན། རྟགས་དང་ནུས་པ་ལྡན་ཡང་སྦས་ཚུལ་རྣལ་མར་སྤྱོད་པ་ཅིག་འབྱུང་། ཞེས་པ་ལྟར་བྱུང་ཞིང་། དགུང་ལོ་ཉེར་གཉིས་ནས་སྲིད་ཀྱི་བྱ་བ་མཛད་ཅིང་དགུང་ལོ་ཉེར་བདུན་བཞེས་པའི་མེ་བྱའི་ལོར། ན་ཁ་ཞིག་ན་ཅུང་ཟད་གཟིམས་ཤིང་མནལ་བའི་ཚེ། དབུ་སྔས་སུ་ཁམས་པའི་བྱ་བྲལ་བ་ཡིན་ཟེར་བའི་ཞྭ་དང་ན་བཟའ་ཐམས་ཅད་སེར་པོར་བྱས་པ་ཞིག་གིས། ཁྱོད་ཀྱི་ཡུལ་འདིར་རི་བོ་ཁྱུང་ཆེན་ལྡིང་བ་བྱ་བ་ཡོད་དམ་ཟེར། ཁྱུང་ཆེན་ལྡིང་བྱ་བ་མེད། བྲག་ཡ་གི་ལ་ཁྱུང་ཆེན་ཟེར་བ་ཡིན་བྱས་པས། འོ་ན་བྲག་འགག་བྱ་བ་ཡོད་དམ་ཟེར། ཡོད་བྱས་པས། དེ་ན་ཨོ་རྒྱན་པདྨའི་གཏེར་ཁ་ཟབ་མོ་ཞིག་ཡོད་པ་ཡིན། དེའི་ཁ་བྱང་ང་ལ་ཡོད་ཟེར་ནས་རས་ཁུག་ཅིག་གི་ནང་ནས་དར་ནག་པོས་དྲིལ་བའི་ཤོག་སེར་གསུམ་བསྟན་བྱུང་། གཟིགས་པས་རང་ཉིད་ཀྱི་ལུང་བསྟན་དུ་འདུག དེ་ནས་ཁྱིམ་དུ་གདན་དྲངས་ནས་ཟས་སྣ་དང་ཆང་སོགས་དྲངས་ནས་ཐུགས་སྒྲུབ་གསང་འདུས་དང་། བླ་མའི་རྣལ་འབྱོར་གྱིས་ལུང་ཞུས། ཨོ་རྒྱན་དངོས་ཡིན་སྙམ་པ་བྱུང་གསུངས། རྣལ་འབྱོར་པ་དེས། ངའི་ཁ་བྱང་འདི་དང་ཁྱེད་རང་རྟེན་འབྲེལ་འགྲིག་པ་དུས་འཛོམས་པ་འདྲ། ཁྱོད་ཀྱི་གཏེར་འདོན་དུས་ལོ་གསུམ་ན་ཡོད་པས། དེའི་བར་དུ་འདི་འདྲ་ཡོད་ཀྱི་ཚིག་ཟུར་ཙམ་ཡང་མ་ཟགས་པར་གྱིས། ཐོག་ནས་ཀྱང་རང་ཉམས་སུ་ལེན་པ་མ་གཏོགས་གཞན་ལ་ཤིན་ཏུ་གསང་དགོས་པར་བཤད་པས། ཁྱོད་རང་ཁ་ལས་མ་འཛག་པར་གྱིས། བཏོན་ནས་གཏེར་ལུང་ལྟར་སྤྱོད། ང་ལ་གཏེར་གྱི་རྒྱུས་ཆེན་པོ་ཡོད་པ་ཡིན་གསང་སྒོ་འཚོལ་ན་བདུད་ཀྱི་སྒོ་ཉལ་བར་ཆད་ཡོད་པས། ང་དང་མ་འཕྲད་ན་དེ་ཚུག་མཛོད་སོགས་གསུངས། འབུལ་བ་དང་གསོལ་ཆས་སོགས་ཕུལ་ཀྱང་གང་ཡང་མ་བཞེས་པར་གཤེགས། དེར་རྣལ་འབྱོར་པ་དེ་སླར་བཙལ་ཡང་མ་རྙེད། དེར་གཏེར་གྱི་ཁ་བྱང་ཡིན་པར་ཤེས་ནས་རེ་ཞིག་གསང་རྒྱ་དགོས་པའི་དོན་གྱིས་ཁ་བྱང་རྣམས་གུ་རུའི་སྐུ་མཐོ་གང་པ་ཞིག་བཞེངས་ནས་དེའི་ནང་རྟེན་དུ་བཅུག རྗེ་ཉིད་སྤག་ཤི་བྲོ་བའི་ཚུལ་མཛད་ནས། གྲུ་ཤུལ་སྟོད་སྨད། གཉལ། ཡར་ལུང་། རྩེད་ཐང་རྣམས་སུ་ཕེབས། དེ་སྐབས་ཡེ་ཤེས་ཀྱི་མཁའ་འགྲོ་མ་མི་མོའི་རྣམ་པ་ཞིག་གིས་ཟས་སྟེར་བའང་བྱུང་། དེ་ནས་ལྷ་ས་དང་བསམ་ཡས་ལ་སོགས་པར་ཕེབས། མཆིམས་ཕུར་སོང་གསུངས་པའི་མནལ་ལམ་བྱུང་། དེ་ནས་ཡུལ་དུ་སླེབས་ནས་ཁ་བྱང་ལས། །གནམ་ལོ་ཆུ་བྱི་གཏེར་སྟོན་སུམ་ཅུའི་ལོ། །སྤྲེལ་ཟླའི་ཚེས་བཅུ་སུརྱ་ཤར་མཚམས་སུ། །ཞེས་སོགས་གསུངས་པས་སྟོན་པ་མགོན་རྒྱལ་དང་བགྲོས་ནས། ཆུ་ཚན་དགོན་པར་བླ་མ་རྟོགས་ལྡན་ཡེ་ཤེས་བཟང་པོ་ཞེས་པ་གཏེར་སྟོན་ཉིད་ཀྱི་རྩ་བའི་བླ་མར་བཞུགས་པ་ཞིག་ཡོད་པ་དེར་ཁ་བྱང་གཟིགས་སུ་ཕུལ་ནས་ལོ་རྒྱུས་ཞུས་པས། བླ་མ་ཐུགས་མཉེས་ནས་ངོ་མཚར་ཆེ། ད་ཤིན་ཏུ་ནས་གསང་ཞིང་གཟབ་པ་དགོས་གསུངས། དེ་ནས་བ་ཇོ་སྟོན་པ་འདོན་རོགས་སུ་ཁྲིད་ནས་ཚེས་བཅུའི་ནུབ་གཏེར་རྟགས་བཙལ་ནས་ས་དམིགས་ནས་བརྐོས་པས་དངོས་སུ་རྡོ་ཆར་འབེབས་པ་བྱུང་། གུ་རུ་ལ་གསོལ་བ་བཏབ་པས་རྡོ་ཆར་ཆད་གཏེར་ཚེས་བཅོ་ལྔ་ལ་འདོན་དགོས་པའི་ལུང་བསྟན་བྱུང་བ་ལྟར་བཅོ་ལྔའི་ནམ་ལངས་ནས་ས་ཐིག་བཙལ་ནས་བརྐོས་པས་བསེའི་གའི་གའུ་སྨུག་པོ་ཞིག་བྱུང་། གཏེར་ཚབ་བཅུག་ནས་གཏེར་སྒྲོམ་ཞལ་ཕྱེས་ནས་ཤོག་སེར་ལ་རྟེན་འབྲེལ་བརྟགས་པས་སེམས་དཔའ་སུམ་བརྩེགས་བྱུང་སྟེ་རྟེན་འབྲེལ་ལེགས་པར་དགོངས། དེ་ནས་ལོ་གསུམ་བར་དུ་གསང་དམ་བྱས། དེ་ནས་ཆུ་ཚན་དགོན་པར་བླ་མ་རྟོགས་ལྡན་པར་གཟིགས་སུ་ཕུལ་བས་ཐུགས་ཤིན་ཏུ་མཉེས་ནས་རྩ་གསུམ་སྒྲུབ་སྐོར་གྱི་ལུང་ཡང་ཕུལ། སྒྲུབ་པ་མཛད་པས་རྟགས་དང་ཡོན་ཏན་བསམ་གྱིས་མི་ཁྱབ་པ་བྱུང་ངོ་། །
གཞན་ཡང་འབྲི་ཐང་ཀོ་རོ་བྲག་ཏུ་ཕེབས་ནས་རྟ་ཕག་ཡབ་ཡུམ་སྒྲུབ་པ་དང་ཟུང་འཇུག་ཏུ་སྒྲུབ་པ་སོགས་ལས་ཚོགས་དང་བཅས་པ་དང་། བྲག་དམར་བཙན་མཁར་རི་མོ་ཅན་ནས་ཚེ་སྒྲུབ་རྡོ་རྗེ་ཕྲེང་བའི་སྒྲུབ་སྐོར་རྣམས་སྤྱན་དྲངས། དགུང་ལོ་སོ་གཅིག་པ་ཆུ་གླང་ལོ་ལུག་ཟླའི་ཚེས་བཅུ་གཉིས་ལ་མཁར་ཆུ་དཔལ་གྱི་ཕུག་རིང་ནས་ཟབ་གཏེར་འདོན་པའི་དུས་སྐས་རིང་བཅུ་གསུམ་ཙམ་གྱི་དཔང་ཡོད་པའི་བྲག་རིར་བྱ་འཕུར་པ་ལྟར་སྐད་ཅིག་ལ་ཕེབས། གུ་རུ་རིན་པོ་ཆེ་དངོས་སུ་གཟིགས། རིག་འཛིན་གུ་རུ་ཆོས་ཀྱི་དབང་ཕྱུག་ཀྱང་མདུན་གྱི་ནམ་མཁར་ཡིག་བདུན་བསྐུལ་ཞིང་བཞུགས་པ་གཟིགས། དེ་ཉིན་ཚེ་ཆུ་རྙེད་ཅིང་དཔོན་སློབ་ཀུན་གྱིས་གསོལ། ཕྱིས་བྲག་དེར་ཆུ་རྗེས་ཀྱང་མི་འདུག རྫ་ལ་བྱས་པའི་གཏེར་སྒྲོམ་ནས་ཕྱག་ཆེན་ཉི་མའི་སྙིང་པོའི་སྐོར་དང་། གདམས་པ་གཅེས་པ་རྣམ་བརྒྱད། དམ་རྫས་ཁྱད་འཕགས་སོགས་སྤྱན་དྲངས། དེ་ནུབ་ཉམས་སྣང་ལ་གུ་རུ་རིན་པོ་ཆེ་ཨ་ཙ་ར་གཞོན་ནུའི་ཆ་བྱད་ལ་འཁོར་རིག་འཛིན་མཁའ་འགྲོའི་ཚོགས་དང་བཅས་པས་དབང་བསྐུར་ཚོགས་ཀྱི་འཁོར་ལོ་བསྐོར་ནས་ངོ་སྤྲོད་མཛད་པའི་དག་སྣང་བྱུང་། ཤིང་ཡོས་ ༡༤༨༣ ལོར་རྒྱལ་བའི་དབང་པོ་ཀརྨ་པ་མཐོང་བ་དོན་ལྡན་མཇལ་བར་ཕེབས་ནས་བཀའ་ཆོས་མང་དུ་གསན། དགུང་ལོ་སོ་དྲུག་པ་ལ་ཆོས་རྗེ་རིན་པོ་ཆེ་ཟླ་བ་གྲགས་པ་དང་མཇལ་ཏེ་ཐུགས་ཡིད་གཅིག་འདྲེས་སུ་གྱུར་ཞིང་རྫོགས་པ་ཆེན་པོའི་ཆོས་ཀ་མང་དུ་གསན། ས་ལུག་ ༡༤༩༩ ལོར་སྤྲུལ་པའི་མཁའ་འགྲོ་ལྔས་དར་གྱི་མདོ་ལི་ལ་སྤྱན་དྲངས་ནས་ཟངས་མདོག་དཔལ་གྱི་རི་བོར་ཕེབས་པའི་དག་སྣང་བྱུང་། ཨོ་རྒྱན་རིན་པོ་ཆེ་དང་མཇལ་བས་ཡན་ལག་བདུན་པ་དང་། གུ་རུ་རིན་པོ་ཆེ་རིག་འཛིན་དཔའ་བོ་ཌཱཀྐིའི་ཚོགས་དང་བཅས་པ་ལ་བསྟོད་པ་དོན་གསལ་སྒྲོན་མེ་མཛད། ནུབ་གཅིག་སྔགས་སྲུང་མ་སྨུག་ནག་ཞིང་དབྱུག་དང་སྙིང་འཛིན་པ་ཞིག་གིས་སྨན་རྩེར་བྱོན་པར་བསྐུལ་བས་དེར་ཕེབས་པར་དགོངས་སོ། །བུ་མོ་དར་གྱི་ཐོད་ཅན་ལྔས་ཨོ་རྒྱན་ཡབ་ཡུམ་ཡང་ལེ་ཤོད་དུ་ཕེབས་ཡོད་པས་དེར་གཤེགས་པར་ཞུས་པ་ལྟར་སྐད་ཅིག་ལ་བྱ་འཕུར་བ་བཞིན་དེར་ཕེབས། ཨོ་རྒྱན་རིན་པོ་ཆེ་པཎ་ཆེན་གཞོན་ནུ་བཅུ་དྲུག་ལོན་པའི་ལང་ཚོ་ཅན་ལ་འཁོར་ཌཱཀྐི་སྔགས་འཆང་རིག་འཛིན་གྲུབ་ཐོབ་པཎ་ཆེན་སོགས་ལས་ཅན་བཅུ་གསུམ་གྱིས་བསྐོར་ནས་བཞུགས་པ་དང་མཇལ། ཞབས་སྤྱི་བོར་བླངས་ཤིང་རྗེས་སུ་འཛིན་པར་གསོལ་བ་བཏབ་པས་མཐར་ཐུག་དོན་གྱི་ངོ་སྤྲོད་གནང་སྟེ་སྙན་བརྒྱུད་ཡང་ལེ་ཤོད་ལ་བྱ་བ་ཡོད། དེ་སྐབས་དཔལ་ཆེན་ཆུ་བོ་རིར་གྲུབ་ཐོབ་ཐང་སྟོང་རྒྱལ་པོ་ལ་གཏེར་རྫས་འབུལ་བར་མངགས་པས། གྲུབ་ཐོབ་ཆེན་པོས་གཏེར་རྫས་རྣམས་ཆུར་ཕོངས་ཤིག་གསུངས་ནས་དབང་མེད་དུ་གཙང་པོར་སྐྱུར་དུ་བཅུག ཕྱིར་ནང་ཙ་ན་གཏེར་རྫས་ཁྱེར་ཤོག་གསུངས། གཙང་པོར་འཕངས་ཚུལ་ཞུས་ཀྱང་མ་གསན་པར་ད་ལྟ་ཁྱེར་ཤོག་གསུངས་པ་ལྟར་ཕྱིན་པས་ཅི་ཡང་མ་ཉེས་པར་འཇའ་འོད་ཀྱི་དབུས་ན་འདུག་པ་བླངས་ནས་ཕུལ་བས་ཐུགས་མཉེས་ཏེ་གཏེར་སྟོན་ཟེར་བ་དེ་འདྲ་དགོས་པ་ཡིན། ངས་ཁྱེད་རྣམས་ཡིད་ཆེས་ཕྱིར་དེ་ལྟར་བྱས་པ་ཡིན་གསུངས། སླར་ཞུ་མཆིད་ཆེ་བརྗོད་སོགས་རྒྱ་ཆེ་མཛད་ཅིང་ཐུགས་ཡིད་གཅིག་འདྲེས་སུ་གྱུར། དེ་ནས་འཕན་ཡུལ་སྨན་རྩེར་ཕེབས། ཆོས་བདག་ལུང་ཟིན་རྣམས་ལ་གཏེར་ཆོས་སྨིན་གྲོལ་གནང་ནས་དོན་ལྡན་དུ་མཛད། ལྷོ་བྲག་ཁོན་མཐིང་བསམ་ཡས་བྱང་ཆུབ་ཆེན་པོ་དང་། གཉལ་སླད་དགེ་རི་བྲག གུང་ཐང་མཁར། ནེ་རིང་སེང་གེ་རྫོང་སོགས་ནས་སྔ་ཕྱིར་གཏེར་ཁ་བསམ་གྱིས་མི་ཁྱབ་པ་བཞེས་ཏེ་ཁྱོན་དྲིལ་གཏེར་ཁ་ཆེན་པོ་ཉེར་ལྔ་སྤྱན་དྲངས། གཏེར་ལུང་ལས། སློབ་དཔོན་དོན་ལྡན་སྐྱེས་བུ་དེ། །སོ་བདུན་སྐེག་ལ་མ་འདས་ན། །གཏེར་ཁ་ཉི་ཤུ་རྩ་ལྔ་དབང། །ཞེས་སོགས་ཀྱི་སྐུ་ཚེའི་བར་ཆད་རྣམས་ལས་ཡོངས་སུ་གྲོལ།
གཏེར་སྟོན་རང་གི་ཞལ་ནས་ཀྱང་། མཐའ་ཡི་མིར་སྐྱེས་རིན་ཆེན་དཔལ་བཟང་ལ། །སྔོན་སྦྱངས་ལས་འཕྲོ་སྨོན་ལམ་དཀར་བའི་མཐུས། །མཐའ་དབུས་ཀུན་ནས་གཏེར་ཁ་ཉེར་ལྔ་ཕྱེ། །ཉམས་དང་རྨི་ལམ་བཟང་རྟོགས་ཙམ་དུ་ཡང་། །ཨོ་རྒྱན་རྗེ་དང་ལན་གྲངས་ཉེར་ལྔ་མཇལ། །དབང་དང་བསྙེན་བསྒྲུབ་དབྱངས་དང་ཕྱག་ལེན་སོགས། །རང་བཟོ་མ་ཡིན་གུ་རུའི་ཕྱག་ལེན་མཐོང། །བཀའ་གཏད་རྗེས་གནང་དབང་བཞིའི་ཆུ་བོ་བབ། །གཟུ་ལུམ་རང་བཟོ་རྣམས་དང་ཅུང་མི་འདྲ། །ཞེས་སོགས་གསུངས་སོ། །ཙ་རི་དང་ཀོང་པོར་ཕེབས་དགོས་པའི་མཁའ་འགྲོའི་བསྐུལ་མའང་བྱུང་། ཇོ་ཤཱཀ་རྣམ་གཉིས་ལ་མར་ཁལ་སྟོང་ཕྲག་ལ་སོགས་པའི་མཆོད་འབུལ་མཛད། དེ་ནས་གཉལ་སྟོད་སྨད་བརྒྱུད་ཆོས་ཀྱི་རྒྱལ་པོར་བསྐུར་ཏེ་གདན་འདྲེན་པར་ཕེབས་ནས་སྐྱེ་བདུན་སྨན་སྒྲུབ་སོགས་ཀྱི་འགྲོ་དོན་མཛད། ཙ་རིར་ཕེབས་འཆར་སྐབས་ཀོང་ཡུལ་སྤྱི་དང་ཙ་རིའི་གནས་སོགས་གཟིགས་སྣང་བྱུང་བ་དང་། ཕྱིས་དངོས་སུ་ཕེབས་སྐབས་དང་ཁྱད་པར་ཅུང་ཟད་ཀྱང་མ་བྱུང་། སྔར་མཚན་ལམ་དུ་བསྐུལ་མ་གནང་མཁན་ཌཱཀྐི་བདུན་པོ་དེ་དག་ཕྱིས་ཀོང་པོར་ཕེབས་དུས་དངོས་སུ་མཇལ། དེ་ཡང་གཏེར་ལུང་ལས། ཁྱུང་ཆེན་རི་དང་མཁར་ཆུའི་ཟབ་གཏེར་འདོན། །གསང་བའི་མཚན་ཡང་ཞིག་པོ་གླིང་པ་ཡིན། །གུང་ཐང་དགེ་རི་རྫོང་གསུམ་གཏེར་ཁ་འདོན། །གསང་བའི་མཚན་ཡང་རཏྣ་གླིང་པར་གྲགས། །བསམ་ཡས་གནས་སྐས་བུམ་ཐང་གཏེར་ཁ་འདོན། །གསང་བའི་མཚན་ཡང་འགྲོ་འདུལ་གླིང་པར་གྲགས། །ཞེས་གསུངས་པ་ལྟར། སྐུ་གཅིག་ལ་གླིང་པ་གསུམ་གྱི་མཚན་དུ་གྲགས་པ་སྟེ། རྟེན་འབྲེལ་རབ་དང་མཆོག་དང་ཕུལ་དུ་གྱུར་པས་སྐུ་ཐོག་གསུམ་གྱི་གཏེར་སྐལ་སྐུ་ཚེ་འདི་ཉིད་ལ་བཏོན་པ་ཡིན་ཞེས་ཀུན་མཁྱེན་ལྔ་པ་རིན་པོ་ཆེས་གསུངས་སོ། །
གཞན་ཡང་ཕུར་སྒྲུབ་ཐུགས་སྒྲུབ་སྨན་སྒྲུབ་སྐྱེ་བདུན་སྒྲུབ་ཆེན་སོགས་ཀྱིས་འགྲོ་དོན་སྐྱོང་སྐབས་སོགས་སྐལ་ལྡན་རྣམས་ལ་བསྩལ་བའི་དུས་དང་གཏེར་གདན་དྲངས་པའི་དུས་སོགས་ལ་སྐུ་ལུས་མི་སྣང་བ་དང་། རི་བྲག་ལ་ཟང་ཐལ་དུ་གཤེགས་པ་སོགས་རྫུ་འཕྲུལ་དུ་མ་དང་། ལྐོག་གྱུར་སྒྲིབ་མེད་དུ་གཟིགས་པའི་མངོན་ཤེས་དང་ངོ་མཚར་བའི་ལྟས་ཀྱི་རྣམ་གྲངས་འཇའ་ཚོན་སྣ་ཚོགས་ཀྱི་དྲ་བར་འབྲེལ་བ་དང་། མེ་ཏོག་ཁ་དོག་སྣ་ཚོགས་ལག་པས་བཟུང་དུ་བཏུབ་པའི་ཆར་དང་། སྤོས་དང་སྨན་གྱི་དྲིས་རྒྱང་རིང་ཚུན་ལ་ཁྱབ་པ་སོགས་བྱུང་བ་ནི་རེ་རེ་ནས་བརྗོད་ཀྱིས་མི་ལངས་ཏེ་མཐའ་ཡས་སོ། དབང་དང་སྒྲུབ་ཆེན་གང་ལའང་བར་ཆད་ཀྱི་རྣམ་པ་ཅུང་ཟད་ཀྱང་འོང་མ་མྱོང་གསུངས་ཏེ། ངོ་མཚར་ཡ་མཚན་སྒྲུབ་རྟགས་ལས། །བར་ཆད་ཕྲ་མོའང་འོང་མ་མྱོང། །ཞེས་གསུངས་པ་ལྟར་རོ།།
གསུང་གི་ལེགས་བཤད་སྐོར་ལ་གསུང་མགུར་དང་། རྩོད་བཟློག ཆོས་འབྱུང་། དབང་ཁྲིད་ཞལ་གདམས་སོགས་བསྟན་བཅོས་ཀྱང་མང་དུ་མཛད། བརྒྱུད་འཛིན་སློབ་མའི་ཚོགས་ཀྱང་། ཐུགས་སྲས་སྙིང་གི་བུ་བཞི། ཉེ་བའི་བུ་བཞི། མཆོག་གི་བུ་ལྔ། དཀྱིལ་འཁོར་འཛིན་པའི་བུ་བརྒྱད། ཆོས་བདག་ཉི་ཤུ་རྩ་ལྔ། བཀའ་ལུང་རྫོགས་པ་བརྒྱ་དང་བརྒྱད། ཆོས་ཀྱིས་འབྲེལ་བ་ཁྲི་ཕྲག་ལྔ། ཕྲ་མོའི་རིགས་ནམ་མཁའི་སྐར་མ་དང་གྲངས་མཉམ་སྟེ་གཙོ་ཆེ་བ་འགའ་ཞིག་སྨོས་ན། ༧རྒྱལ་བའི་དབང་པོ་ཀརྨ་པ་མཐོང་བ་དོན་ལྡན། སྣེ་གདོང་གོང་མ་ཆེན་པོ་ཀུན་དགའ་ལེགས་པའི་འབྱུང་གནས། འབྲུག་པ་རྒྱལ་དབང་ཆོས་རྗེ་སྨྱོས་མཐིང་མ་བ། ཡར་ལུང་སྤྲུལ་སྐུའི་བརྒྱུད་པ་སོགས། མདོར་ན་གངས་ཏི་སེ་ནས་རྒྱལ་མོ་རོང་གི་བར་དངོས་སློབ་དང་ཡང་སློབ་ཀྱིས་ཁྱབ། དབུས་གཙང་རུ་བཞིའི་བླ་ཆེན་དང་མི་ཆེན་ཕལ་མོ་ཆེ་འདིའི་ཞབས་ལ་མ་གཏུགས་པ་མེད་པ་དང་འདྲ། མཐར་དགུང་ལོ་དོན་བཞི་པ་རབ་བྱུང་དགུ་པའི་མེ་སྤྲེལ་༼༡༥༣༦༽ལོར་ངོ་མཚར་བའི་ལྟས་དུ་མ་དང་བཅས་གཟུགས་སྐུའི་བཀོད་པ་ཉེ་བར་བསྡུས་ཏེ་ཟངས་མདོག་དཔལ་རིར་གཤེགས། སྐུ་གདུང་རིལ་པོ་བཞུགས་པའི་གདུང་རྟེན་བཀྲ་ཤིས་འོད་འབར་འགྲོ་བ་རྣམས་ཀྱི་བསོད་ནམས་ཀྱི་ཞིང་དུ་བཞུགས།
གུ་བཀྲའི་ཆོས་འབྱུང་ལས། ཤར་མི་ཉག་པ། འཇམ་དཔལ་བསྟན་འཛིན་ནས་སྤེལ།
༈ མཁས་བཙུན་བླ་མ་ནམ་མཁའ་ཚེ་དབང་མཆོག་གྲུབ་ནི། དེ་ཡང་འཕགས་པ་རྣམས་གཟོད་མ་ནས་རང་ཉིད་བྱང་ཆུབ་ཀྱི་བདུད་རྩི་བརྙེས་སུ་ཟིན་ཀྱང་།
༈ དཔོན་སློབ་གཉིས་པ་སྤྲུལ་བའི་སྐུ་རིན་པོ་ཆེ་པདྨ་གསང་སྔགས་བསྟན་འཛིན་ནི། སྤྱིར་ས་ལམ་རིམ་བགྲོད་ཀྱི་གང་ཟག་རྣམས་གཅིག་རྗེས་གཅིག་མཐུད་ཀྱིས་ལུས་བླངས་པ་ལ་སྐྱེ་བ་བཞེས་པའི་སྒྲ་དོན་སྦྱར་བ་དང་།
༈ དབོན་རིན་པོ་ཆེ་འགྱུར་མེད་པདྨ་ཀུན་གྲོལ་རྣམ་རྒྱལ་ནི། ཡུལ་ནག་ཤོད་དུ་གྲུབ་པའི་དབང་ཕྱུག་ཁྱབ་བདག་ནམ་མཁའ་འོད་གསལ་གྱི་དབོན་རྒྱུད་དུ་རབ་བྱུང་བཅུ་གཉིས་པའི་མེ་ཕོ་ཁྱི།
རྫོགས་ཆེན་སྐུ་ཕྲེང་དང་པོ་གྲུབ་དབང་པདྨ་རིག་འཛིན་མཆོག་རང་དོན་གྱི་རྟོགས་པ་མཐར་ཕྱིན་ནས་གཞན་དོན་དུ་བཤད་སྒྲུབ་ཀྱི་སྡེ་དང་སྐལ་བཟང་གི་གདུལ་བྱ་རྣམས་ཆོས་ཀྱིས་སྐྱོང་བའི་འཕྲིན་ལས་རྒྱ་ཆེར་མཛད་ནས་འོག་མིན་དུ་གཤེགས་པའི་རྗེས།
འཇམ་མགོན་མི་ཕམ་རྣམ་རྒྱལ་རྒྱ་མཚོ་མཆོག་ནི།
རང་བྱུང་བཅུ་བཞི་པའི་མེ་རྟ་སྤྱི་ལོ ༡༨༤༦ ལོར་རྫ་ཆུ་ཁར་ཡབ་འཇུ་མགོན་པོ་དར་རྒྱས་དང་། ཡུམ་སྲིང་ཆུང་མའི་སྲས་སུ་སྐུ་འཁྲུངས། མདོ་སྔགས་རིག་གནས་དང་བཅས་པར་མཁྱེན་རབ་ཀྱི་རྩལ་འབར་ཞིང་གསར་རྙིང་མཁས་གྲུབ་ཀུན་གྱི་ཡང་རྩེར་སོན།
མི་འགྱུར་ནམ་མཁའི་རྡོ་རྗེའི་ལུང་བསྟན་ནང་། ལྕགས་ཀོང་བའུ་སྣོད་བཟང་སྦར་བུ་མཛེས།། ཞེས་ལྕགས་ཁུང་ལ་འཁྲུངས་རྒྱུ་དང་། ཡབ་ཡུམ་བཅས་དངོས་འཛིན་གསལ་བར་མཛད་པ་ལྟར། ཡབ་བདུད་འཇོམ་རྡོ་རྗེ་གྲོ་ལོད་རྩལ་དང་། ཡུམ་ཤ་ཟ་ཊཀྐཱིའི་རིགས་བསོད་ནམས་མཚོ་གཉིས་ཀྱི་སྲས་སུ་རབ་བྱུང་བཅུ་བཞི་པའི་ནང་ངོ་མཚར་བའི་ལྟས་དང་བཅས་ཏེ་སྐུ་འཁྲུངས།