རྡོ་རྗེ་སློབ་དཔོན་ཁྲི་འདོན་མཛད་སྒོ།

སྤྱི་ལོ ༢༠༢༤ ཟླ ༧་ཚེས ༡༦ བོད་རབ་གནས་ཤིང་འབྲུག་ལོའི་སྤྲེལ་ཟླའི་ཚེས ༡༠ ཉིན་མ་ཧཱ་གུ་རུའི་ཚོགས་འབུམ་ཉིན་ཐ་མར་རྡོ་རྗེ་སློབ་དཔོན་གྱི་ཁྲི་འདོན་མཛད་སྒོ་ཞིག་སྤེལ་ཡོད། དེ་ཉིན་རྡོ་རྗེ་སློབ་དཔོན་ལྔ་ཁྲི་འདོན་བྱས། འབྲས་ལྗོངས་ནས་གསུམ་དང་། འབྲུག་ནས་གཉིས་བཅས་ཡིན། འབྲས་ལྗོངས་ནས་བླ་མ་བསམ་གཏན། མིག་དམར་ཚེ་རིང་། ཉི་མ་འོད་ཟེར། འབྲུག་ནས་ཀརྨ་ཤེས་རབ། ཉི་མ་ཚེ་རིང་བཅས། ཚེས་༡༠ ཉིན་རྒྱབ་དུས་ཚོད ༡་ སྐར་མ་༣༥ ཐོག་བཤད་གྲྭའི་འདུ་ཁང་ནས་ཚུར་སྤོས་སྣེའི་གདན་ཞུས་ཏེ་བགེགས་སྤྲད་ཁྲུས་གསོལ་བྱས་རྗེས། རིམ་པས་གདུང་སྲས་ཨོ་རྒྱན་རིག་འཛིན་མཆོག་ནས་བླ་ཞུ་གསོལ། ལས་ཐོག་མཁན་པོ་འཇམ་དཔལ་བསྟན་འཛིན་མཆོག་ནས་རྡོ་རྗེ་སློབ་དཔོན་གྱི་ལག་ཁྱེར་ཕུལ་རྗེས་བཞུགས་ཁྲི་ལ་མངའ་གསོལ་གནང་ནས་སྐུ་གསུམ་མནྟྲལ་ཕུལ། རིམ་པས་དགེ་འདུན་པ་དང་མང་ཚོགས་ནས་མཇལ་དར་ཕུལ་རྗེས་བཀྲ་ཤིས་བདེ་ལེགས་ངང་མཐའ་གྲུབ། ཉེ་བའི་ཆར་བླ་མ་རྡོ་རྗེ་སློབ་དཔོན་མངའ་གསོལ་གནང་བ་ཐེངས་གཉིས་པ་དེ་ཡིན། སྤྱི་ལོ ༢༠༡༢ ལོར་མཁན་པོ་འཇིགས་མེད་དང་། བླ་མ་རྡོ་རྗེ་རྣམ་དག་གཉིས་ལ་བླ་མའི་ཕྱག་ཁྱེར་ཕུལ་ཡོད་པ་བཅས།

སྐྱབས་རྗེ་རིན་པོ་ཆེ་དགོན་ནང་ཞབས་སོར་འཁོད་པ།

སྤྱི་ལོ ༢༠༢༤ ཟླ ༩་ཚེས་༩ ཉིན་སྐྱབས་རྗེ་རྫོགས་ཆེན་ཡིད་བཞིན་ནོར་བུ་དགོན་ནང་ཞབས་སོར་འཁོད་ཡོད།

སྤྱི་ཚེས་༡༣ ཉིན་ཞོགས་པ་དུས་ཚོད་༩ ཐོག་དགེ་འདུན་པ་རྣམ་ཀྱིས་སྒོ་ཆེན་གཡས་གཡོན་ནས་གཙུག་ལག་ཁང་བར་དུ་ཕྱག་ཏུ་དར་དཀར་དང་མེ་ཏོག་སྣ་མང་། འཕན་གདུགས་རྒྱལ་མཚན། སིལ་སྙན། རོལ་མོ། རྒྱ་གླིང་དང་། དུང་དཀར་ཆེ་ཆུང་སོགས་མཆོད་ཆས་སྣ་ཚོགས་ཐོགས་ཏེ་སེར་འཕྲེང་སྟར་སྒྲིག་གིས་ཕེབས་བསུ་རྒྱ་གང་ཆེ་ཞུས། རིན་པོ་ཆེ་བཞུགས་ཁྲི་ལ་འཁོད་རྗེས་ཚོགས་ཆེན་དབུ་མཛད་ནས་བཀྲ་ཤིས་བརྒྱད་པས་སྣ་དྲངས་ཏེ་ཆོ་ག་གསུང་འདོན་དང་། དེ་ནས་རིན་པོ་ཆེས་བཀའ་ཆོས་དང་བཀའ་དབང་གནང་ཞིང་། དབང་སྐུར་ཟབ་མོ་ཐོབ་པའི་བཀའ་དྲིན་གཏང་རག་དང་། བསྟན་དང་འགྲོ་བའི་དོན་དུ་ཡུན་རིང་བཞུགས་ཕྱིར་དགོན་གཞུང་ནས་བརྟན་བཞུགས་བསྟར་འབུལ་ཞུས། སྐབས་འདིར་རིན་པོ་ཆེ་དགོན་ནང་ཕེབས་ཏེ་བཀའ་དབང་དང་། མཁན་སློབ་རྒན་གྲས་ཁག་ལ་རྫོགས་ཆེན་སེམས་ཁྲིད་འབོག་རྒྱུ། སྐུ་ཚབ་གསར་བསྐོ། དགེ་འདུན་པ་ཡོངས་ལ་ལུགས་གཉིས་ལམ་སྟོན་ཟབ་མོ་བཅས་གནང་ཡོད་པ་རེད་འདུག

རྒྱན་དྲུག་མཆོག་གཉིས།

ཀླུ་སྒྲུབ་དང༌།
འཕགས་པ་ལྷ།
ཐོགས་མེད།
དབྱིག་གཉེན།
ཕྱོགས་གླང༌།
ཆོས་གྲགས་བཅས་རྒྱན་དྲུག་དང༌།

བསྟན་པའི་རྩ་བ་མཆོག་ཏུ་གྱུར་པ་འདུལ་བའི་སྡེ་སྣོད་ལ་ཤིན་ཏུ་མཁས་པའི་སློབ་དཔོན་ཤཱཀྱ་འོད་དང་།
ཡོན་ཏན་འོད་རྣམ་གཉིས་ནི་མཆོག་གཉིས་སོ།

The Six Ornaments and the Two Supreme Ones. The six ornaments are Nagarjuna, Aryadeva, Asanga, Dignaga, Vasubhandu and Dharmakirti.

The two supreme ones are Shakyaprabha and Gunaprabha.