༄༅། ། འཇམ་དབྱངས་གང་བློ་མ་བཞུགས་སོ། །

རྟེན་འབྲེལ་ལམ་ཡག ་འཆམས་ལུགས་བཞུགས། མི་གོས་དཀར་པོ་ཅན། ཞྭ་པདྨ་ཁ་འབུས་ལྟ་བུ། མེ་ལོང་དར་སྣ་རྨ་བྱའི་སྒྲོས་བརྒྱན། །ལག་གཡས་སྦ་དབྱུག་རྩེ་ལ་དར་སྣ་དྲིལ་བུ་བཏགས་པ་ཐོགས་ཏེ་འཆམས་ནས་འདི་སྐད་ཟེར་རོ། །ཨ་ལ་ལ། ཨ་ལ་ལ། བཀྲ་ཤིས་སོ། །ཡག་གོ། །ང་ད་ནང་ཟངས་མདོག་དཔལ་རིའི་ཕོ་བྲང་ནས་འོང་ངོ་། །ལྷ་ཨོ་རྒྱན་པདྨས་མངགས་པ་རང་ཡིན་ནོ། །ཁྱོད་གར་སོང་བཀྲ་ཤིས་བརྗོད་ཅིག་གསུངས་སོ། །ཨ་ལ་ལ་སྔར་ལྟར་མ་འཆི་མེད་ཡེ་ཤེས་མཚོ་རྒྱལ་ཕེབས་བྱུང་། ཞྭ་པདྨ་ཁ་འབུས་མགོ་ལ་བསྐོན་བྱུང་། འདི་སུས་མཐོང་བཀྲ་ཤིས་ལ་ཉེ་ཡག་གོ་གསུངས་སོ། །ལག་བཀྲ་ཤིས་ཚངས་པའི་སྦ་དབྱུག་ལྡེམ་མོ། །འདི་སུས་མཐོང་བཀྲ་ཤིས་ལ་ཉེ་ཡག་གོ་གསུངས་སོ། །འཆམས་བཀྲ་ཤིས་གཡས་བྲོ་གཡོན་བྲོ་གྱིལ་གྱིལ། །འདི་སུས་མཐོང་བཀྲ་ཤིས༴ ངག་བཀྲ་ཤིས་གླུ་རྟ་རིང་ཐུང་སྤེལ་མ། །འདི་སུས་ཐོས༴ ཨ་ལ་ལ་སོགས། ཕྱོགས་བཅུ་ན་སངས་རྒྱས་བཞུགས་སོ། །བཀྲ་ཤིས་སོ། །བཀྲ་ཤིས་སོ། །ཞིང་ཀུན་ན་དམ་ཆོས་སྒྲོགས་སོ། །བཀྲ་ཤིས༴ ས་ཐམས་ཅད་དགེ་འདུན་ཁྱབ་བོ། །བཀྲ་ཤིས༴ བཀྲ་ཤིས་པས་ནམ་མཁའ་ཁྱབ་བོ། །དགེ་ལེགས་པས་བར་སྣང་༴ བདེ་སྐྱིད་པས་ས་སྟེང་ཁྱབ་བོ། །ཨ་ལ༴ པདྨ་ཁ་འབུས་ཞྭ་མོ། །པདྨ་འབྱུང་གནས་དབུ་ཞྭ། །མི་ལ་འཆི་བ་མེད་པའི། །འཆི་མེད་རྟེན་འབྲེལ་འགྲིགས་སོ། ཨ་ལ༴ རྩེ་ལ་རྨ་བྱའི་སྒྲོ་གུར། །འཇའ་ཚོན་འོད་ལྔའི་ཚོམ་བུ། །རིགས་འཛིན་བླ་མའི་བཀྲ་ཤིས། །རྟེན་འབྲེལ་དེ་རིང་འགྲིགས་སོ། །ཨ་ལ༴ བར་ན་མེ་ལོང་འོད་གསལ། །མེ་ལོང་གསལ་གྲིབ་མེད་པ། །ཡི་དམ་འཇམ་དབྱངས་བཀྲ་ཤིས། །རྟེན་འབྲེལ་དེ་རིང་༴ དེ་ལ་དར་སྣ་ལྔ་ལྡན། །རིགས་ལྔའི་མཁའ་འགྲོའི་སྤྲིན་ཕུང་། །མ་རྒྱུད་མཁའ་འགྲོའི༴ རྟེན་འབྲེལ༴ །ལུས་ལ་གོས་དཀར་གྱོན་པ། །འགོ་བའི་ལྷ་སྲུང་བཟང་ངོ་། མི་འབྲལ་ཁ་འཛིན་མཛད་བའི། རྟེན་འབྲེལ༴ ལག་ན་སྦ་དབྱུག་ཐོགས་པ། །སྦ་ལྡེམ་ལྷ་ཡི་ནོར་བུ། །ལྷ་སྲུང་ངོ་སོ་མཐོ་བའི། །རྟེན་འབྲེལ༴ །དེ་ལ་དར་སྣ་བཏགས་པ། །སྲིད་པའི་ཕྱ་གཡང་ཕྱུག་མོ། །འབོད་ཅིང་འབོད་ཅིང་འདུ་བའི༴ །རྟེན་འབྲེལ༴ །དེ་ལ་དྲིལ་ཆུང་བཏགས་པ། །ལྷ་སྲུང་དགྱེས་པའི་བཞད་སྒྲ། །རྒྱལ་ཁ་ཐོ་ལེས་ཐོབ་པའི། །རྟེན་འབྲེལ༴ ང་བཀྲ་ཤིས་ལ་ཉེ་བཟང་པོ། ། རྟེན་འབྲེལ་ལམ་ཡག ་འཆམས་ན། །སུ་དང་འཕྲད་ཀྱང་ཁ་དགེ། །གང་དང་འཕྲད་ཀྱང་བཀྲ་ཤིས། །བླ་མའི་ཆོས་ར་གསུང་དུས། །ང་དང་ཐུག་ན་བསྟན་པ་དར། །མི་དཔོན་ཁྲིམ་སར་འཛིན་དུས། །ང་དང་ཐུག་ན་ཆུས་སྲིད་རྒྱས། །སྐྱེ་བོ་དོན་གཉེར་འགྲོ་དུས། །ང་དང་ཐུག་ན་ཇི་བསམ་འགྲུབ། །དགའ་སྐྱིད་སྟོན་མོ་བྱེད་དུས། །ང་དང་ཐུག་ན་ཡར་དར་འོང་། །ཨ་ལ༴ །ང་ རྟེན་འབྲེལ་ལམ་ཡག ་ཟེར་བ། །ནད་པར་ཐུག་ན་སོས་ལྟས་ཡིན། །ནད་པ་ཡར་སོས་ཧ་བགད་བྱེད། །གཤིན་པོ་བསྡུར་དུས་ཤི་སྒབ་ཆོད། །གསོན་པོ་མི་འཆི་ཚེ་རིང་ཡིན། །སྡུག་བསྔལ་ཅན་གྱི་སྡུག་མཐའ་སང་། །སྐྱིད་པའི་ཉི་མ་ཤར་ལྟས་ཡིན། །ཨ་ལ་ལ། །དམག་ཇག་འགྲོ་ན་གཡུལ་རྒྱལ་ཡིན། །སོ་ནམ་འདེབས་ན་འབྲུ་འཕེལ་ཡིན། །བག་མར་འགྲོ་ན་སྐྱིད་མཐུན་ཡིན། །ཚོང་པ་འགྲོ་ན་ཚོང་ཡག་ཡིན། །ལམ་འགྲིམ་འགྲོ་ན་བྱེས་ཡག་ཡིན། །ཨ་ལ་ལ༴ ། ཁྱེད་འདི་ན་ཚོགས་པའི་ལྷ་ཕྲུག་རྣམས། །ང་ རྟེན་འབྲེལ་ལམ་ཡག ་འཆམ་དུས་འདིར། །ཁ་དགེ་བའི་དགེ་ཚིག་བརྗོད་དང་རྟེན་འབྲེལ་ཡག །ལས་དགེ་བའི་ཟས་ནོར་བྱིན་དང་རྟེན་འབྲེལ་ཡག །སེམས་དགེ་བའི་དགའ་སྤྲོ་གྱིས་དང་རྟེན་འབྲེལ་ཡག །

སྐུ་ཚབ་མངའ་གསོལ་ཁྲི་འདོན།

སྤྱི་ཟླ་༩ པའི་ཚེས་༡༤ ཉིན་སྐྱབས་རྗེ་རིན་པོ་ཆེ་མཆོག་ནས། སྲས་ཨོ་རྒྱན་རིག་འཛིན་དང། མཁན་པོ་འཇམ་དཔལ་བསྟན་འཛིན་གཉིས་ཁོང་གི་རྒྱལ་ཚབ་ཏུ་མངའ་གསོལ་གསལ་བསྒྲགས་སྤེལ་རྒྱུའི་ཆེད་དུ་ཁྲི་འདོན་མཛད་སྒོ་སྟབས་བདེ་ཞིག་སྤེལ་སོང་། དེ་ཉིན་ཞོགས་པ་དུས་ཚོད་༩ ཕྱེད་ཐོག་སྐྱབས་རྗེ་མཆོག་སྟོན་འཁོར་གཟིམ་ཆུང་ནས་ཆིབས་བསྒྱུར་གྱིས་དགོན་ནང་ཞབས་སོར་འཁོད། དགོན་པས་ཁོང་རྣམ་གཉིས་ལ་ཁྲུས་བཀར་སྒོ་སོགས་ཆོ་ག་ཁག་གསུང་ཤིང་   སྤྲུལ་སྐུ་ཐུབ་བསྟན་དང་། སྤྲུལ་སྐུ་བསོད་ནམས་ཐབས་མཁས་གཉིས་ནས་མནྟལ་ཕུལ་ཤིང་རིམ་པས་དགེ་འདུན་པ་ཡོངས་ནས་ཁ་བཏགས་ཕུལ་སོང་། སྐབས་དེེར་༧སྐྱབས་རྗེ་རིན་པོ་ཆེ་ནས་རྒྱལ་ཚབ་མངའ་གསོལ་དང་འབྲེལ་བའི་བཀའ་སློབ་གནང་དོན།

ཡ་དེ་རིང་མང་པོ་ཞུ་ཡ་མེད། དེ་རིང་མཁན་པོ་འཇམ་དཔལ་ལགས་དང་། ཨོ་རྒྱན་རིག་འཛིན་གཉིས་ངའི་ཚབ་ཏུ་མངའ་གསོལ་གནང་ནས་ཁྲི་འདོན་མཛད་སྒོ་སྟབས་བདེ་ཞིག་སྤེལ་བ་ཡིན། དུས་ཚོད་མང་པོ་མེད་རྐྱེན་སྟབས་བདེ་ཞིག་ལས་གྲ་སྒྲིག་པོ་བྱུང་མ་སོང་ཡང་། གང་ལྟར་ངའི་ཚབ་ཏུ་ཁོང་གཉིས་བསྐོས་པ་ཡིན། དགོན་པའི་ལས་དོན་གང་ཡིན་གྱི་འགན་ཆ་ཚང་ཁོང་གཉིས་ལ་སྤྲད་ཚར་བ་ཡིན། ད་ནས་བཟུང་སྟེ་ཁོང་གཉིས་ནས་སྤྱི་ཡོངས་ནས་ལྟ་གི་རེད། ཁྱེད་ཚོ་ཚང་མས་ཁོང་གཉིས་ལ་ཡིད་ཆེས་དང་། རྒྱབ་སྐྱོར་གནང་དགོས། ང་ནང་བཞིན་ཁོང་གཉིས་ལ་བརྩི་བཀུར་གནང་དགོས། ཁོང་གཉིས་ལ་ཇི་ལྟར་རྒྱབ་སྐྱོར་གནང་ན་དེ་བཞིན་ང་ཚོའི་དགོན་པ་ཡར་རྒྱས་སུ་འགྲོ་གི་རེད། དགོན་པ་ཡར་རྒྱས་སུ་འགྲོ་བ་ལ་ཚང་མ་ཐུགས་མཐུན། ཁྲིམས་གཙང་གནང་དགོས་པ་ཧ་ཅང་གལ་ཆེན་པོ་རེད། མཁན་པོ་རྣམ་པ་དང་། སྤྲུལ་སྐུ་རྣམ་པ། སློབ་དཔོན་རྣམ་པ། བླ་མ་རྣམ་པ་དང་། གཞན་གྲྭ་བ་སུ་ཡིན་ཡང་དགོན་པ་དང་། བསྟན་དང་འགྲོ་བའི་དོན་དུ་ཤུགས་རྒྱབ་རོགས། ད་དུང་སྤྲུལ་སྐུ་ཁ་ཤས་ཞིག་ཁྲི་འདོན་གནང་ཡ་ཡོད་དང་། གཙོ་བོ་དང་པོ་ཁྱེད་རང་ཚོས་སློབ་སྤྱོང་མཐར་ཕྱིན་པ་གནང་དགོས། སློབ་སྦྱོར་མཐར་ཕྱིན་སོང་ན་གཞན་གང་ཡང་དཀའ་ལས་ཡོད་མ་རེད། ཁྱེད་རྣམ་པས་འགྲོ་དོན་ཡོང་མིན་གཙོ་བོ་ཁྱེད་རང་ཚོ་ལ་རག་ལས་ཡོད། ཁྱེད་རང་ཚོའི་ཀུན་སྤྱོད་དང་། སློབ་སྦྱོང་ལ་རག་ལས་ཡོད། ང་ཚོའི་ངོས་ནས་རྒྱབ་ནོན་དང་དཔུང་རོགས་གང་དགོས་རྗེས་ནས་རིམ་པས་བྱེད་ཡོང་ཤེས་སོང་ངམ། ད་དེ་བས་ཅང་མེད། ཡ་ད་དེ་ཡིན། ཐུགས་རྗེ་ཆེ།