ཨ་ཚབ་བླ་མ་ཀུན་མཁྱེན་སྐྱབས་ནི།

བཀླགས་གྲངས། 91

ཡབ་ཝ་དགེ་ཚེ་དབང་རྣམ་རྒྱལ་དང་། ཡུམ་ཧོར་བཟའ་ཆོས་སྐྱིད་སྒྲོལ་མ་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ས་བྱི་༼༡༨༨༨ ༡༩༥༩༽ལོར་གཡུ་ཁོག་ཏུ་འཁྲུངས།

དགུང་གྲངས་བརྒྱད་ཀྱི་སྟེང་སྐུ་ཞང་ཧོར་བླ་གཞན་ཕན་བཟང་པོ་ལས་ཡི་གེ་འབྲི་ཀློག་སོགས་སྦྱངས། དགུང་ལོ་བཅུ་གསུམ་སྟེང་གཡང་ར་གནས་རྫོང་ཕྱུག་མོར་མཚམས་པ་བླ་མ་འཇམ་དབྱངས་ མདུན་དུ་བགྲང་བྱ་གསུམ་གྱི་རིང་སྨིན་གྲོལ་གྱི་གདམས་པ་གསན། དེ་ནས་རིམ་པར་འཇམ་དབྱངས་མཁྱེན་བརྩེ་དབང་པོ། རྫོགས་སྤྲུལ་ལྔ་པ། ཨ་འཛོམས་འབྲུག་པ་འགྲོ་འདུལ་དཔའ་བོ་རྡོ་རྗེ། མདོ་མང་གཏེར་ཆེན་རྡོ་རྗེ་བདེ་ཆེན་གླིང་པ། གཡུ་ཁོག་བྱ་བྲལ་བ་སོགས་ལས་ཟབ་ཆོས་དུ་མ་མནོས། ཐུན་མིན་གྱི་བླ་མ་ཀཿཐོག་མཁན་པོ་ངག་ཆུང་མདུན་མི་ལོ་བདུན་གྱི་རིང་གསང་བ་མན་ངག་གི་སྐོར་རྣམས་གསན་ནས་ཐུགས་ཉམས་སུ་བསྟར། གངས་རི་ཐོད་དཀར་སོགས་དབུས་གཙང་གི་གནས་ཆེན་རྣམས་མཇལ་སྐོར་བྱས། གཡུ་སྙིང་དབེན་རི་ནས་ཆུ་གཏེར་བཏོན། ཡོལ་རི་རིགས་གསུམ་མགོན་པོའི་གནས་སྒོ་ཕྱེས། སངས་རྒྱས་སྨན་བླའི་སྐུ་ཞིག་གཏེར་ནས་བཞེས། རྡོ་གྲུབ་ཀྱིས་མཛད་པར་གྲགས་པའི་གཏེར་ལུང་ཞིག་ཏུ། ཙ་གཡུ་གཉིས་ཀྱི་བར་མཚམས་སུ། བླ་མ་ཀུན་གཟིགས་ཞེས་བྱ་འབྱུང་། །ཤནྟ་རཀྵིའི་སྤྲུལ་པ་ཡིན། །བྱེ་བ་དྲུག་གི་འགྲོ་བ་འདྲེན། །ཞེས་ལུང་ཟིན་གྱི་སྐྱེས་བུར་གྲགས། འདས་ལོག་པ་རྣམས་ཀྱིས་གཡུ་ཁོག་བླ་མ་ཀུན་མཁྱེན་ཞེས་པ་ཉིན་རེ་བཞིན་ངན་སོང་དུ་བྱོན་ནས་སེམས་ཅན་གྲངས་མེད་བདེ་འགྲོར་འགོད་གྱིན་འདུག་ཅེས་གསུངས། མདོ་མཁྱེན་བརྩེའི་ཉེ་གནས་ཨ་ཞང་རྟ་རྫིའམ་མགོ་ལོག་པ་སྟོབས་ལྡན་རྡོ་རྗེའི་སྐྱེ་བར་གྲགས་པས་དེམ་པའི་དགོན་པར་ཡང་གཟིགས་རྟོག་བསྐྱར་གསོ་མཛད། ལྐོག་གྱུར་མཁྱེན་ཅིང་འཕོ་བ་ལ་རང་དབང་ཐོབ་པར་གྲགས། ཡོལ་རི་ནས་བགྲང་བྱ་དུ་མར་སྒྲུབ་པ་ཉམས་བཞེས་མཛད་ཅིང་། དོན་གཉེར་ཅན་རྣམས་ལ་སྔོན་འགྲོ་དང་། ཀློང་ཆེན་མཛོད་བདུན། ཡེ་ཤེས་བླ་མ་སོགས་ཆོས་ཁྲིད་རྒྱུན་དུ་གསུངས། ཞལ་སློབ་གཡུ་ཁོག་གི་བླ་གྲྭ་ཕལ་ཆེར་དང་། ས་འགོ་བླ་མ་ནོར་བུ་དྲི་མེད། གཡུ་རོང་བླ་མ་རིག་འཛིན་རྒྱ་མཚོ། བཀྲ་ཐོ་སོགས་བུ་སློབ་མང་དུ་བྱོན། དུས་འགྱུར་སྐབས་ཁོང་གིས། བླ་མ་རྒྱ་ཤུལ་དང་ཆ་ནང་སྤྲུལ་སྐུ་གཉིས་ནི་རྡུང་བསྡིག་ལ་ཞེད་ནས་བྲོས་སོང་མོད། ང་ནི་འབྲོ་ས་མི་ལོན་པས་སྡེ་བ་ཚོར་འདུག་རོགས་བྱེད་རྒྱུ་ཡིན་གསུངས། མནར་གཅོད་ཚབས་ཆེན་ཐེབས། དགུང་གྲངས་དོན་གཉིས་བཞེས་པ་ས་ཕག་ལོའི་ཧོར་ཟླ་བཅུ་གཉིས་པའི་ནུབ་གཅིག་མཚན་ཕྱེད་ཙམ་ལ་སྐུ་ལུས་དྲང་པོར་བསྲངས། འཕོ་བ་གསུངས་ནས་སྐུ་གཤེགས། སྐུ་གདུང་ཞུགས་འབུལ་བྱས་པས་སྒྲ་ཆེན་པོ་འུར་བ་དང་། མེ་ཏོག་གི་ཆར་བབ་པ་སོགས་རྟགས་མཚན་ངོ་མཚར་བ་སྣང་བར་མཛད་དོ།།

གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་204 ནས་ 209བར།

 

ཤར་མི་ཉག་པ།རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།

Menu