ཆོས་བདག་ལུང་བསྟན་མུན་སེལ་སྒྲོན་མེ་ལས། རྫ་ཡི་བྲག་དམར་རྒྱུད་དུ་ནི༔ ཀུན་དགའ་ཞེས་བྱ་བྱི་ཕག་ལོ༔ ལྷ་ཡི་ལོ་ཙའི་ཟློས་གར་མཁན༔
འདུལ་བའི་བསྟན་པས་འགྲོ་ལ་མཛེས༔ ཞེས་པའི་ལུང་དོན་ལྟར་རབ་བྱུང་བཅུ་བཞི་པའི་ནང་རྫེ་ཐ་གནམ་མཚོ་དགོན་པའི་ལྷ་སྡེའི་སོག་པོ་ཚང་དུ་འཁྲུངས། སྐུ་ནར་སོན་སྐབས་རྫོགས་ཆེན་དང་ཞེ་ཆེན་དུ་གྲྭ་སར་ཕེབས་ནས་མདོ་དང་སྔགས་ཀྱི་ཆོས་ཚུལ་དུ་མ་མནོག་ཆོས་སུ་བཞེས། གཡུ་ཁོག་རྒྱ་སྤྲུལ་ལུང་རིག་གླིང་པ་དང་། གནམ་མཚོ་སྤྲུལ་སྐུ་འགྱུར་མེད་བྱང་ཆུབ་རྡོ་རྗེ། ཧོར་བླ་གཞན་ཕན་སོགས་ལས་སྨིན་གྲོལ་གྱི་གདམས་པ་དུ་མ་མནོས། ཁྱད་པར་རྒྱ་སྤྲུལ་དང་། ཧོར་བླ་གཉིས་ཀྱི་ལུང་ཟིན་ཆོས་བདག་ཏུ་གྱུར། གཡུ་མཁར་དགོན་དུ་དབྱར་གནས་མཁན་པོ་དང་མི་སེར་རྣམས་ལ་ཆོས་ཚོགས་གནང་། འཁྱིལ་ཆེན་གླག་ཚང་གནས་སུ་ཡུན་རིང་བཞུགས་ནས་སྒྲུབ་པ་ཉམས་བཞེས་མཛད། གཡུ་ཁོག་དཔོན་བླ་སོགས་ལ་གསང་བ་མན་ངག་གི་ཆོས་སྐོར་རྣམས་ཆིག་བརྒྱུད་མཛད། རྒྱ་སྤྲུལ་སྔོན་འགྲོའི་འགྲེལ་བ་སོགས་གསུང་ཆོས་དུ་མ་མངའ།
གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་166ནས་ 167 བར།
ཤར་མི་ཉག་པ།རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།