ལུང་རྟོགས་བསྟན་པའི་དབང་ཕྱུག་ནི།

བཀླགས་གྲངས། 84

ཡབ་རྒྱལ་རོང་སོ་མང་གི་དཔོན་རིགས་ཤིག་དང་། ཡུམ་ང་ཞེས་ལྷ་མོ་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ས་ཕག་༼༡༨༩༩ ༡༩༦༤༽ལོར་རྒྱལ་རོང་སོ་མང་དུ་འཁྲུངས།

ལོ་དེའི་ནང་ཧོར་བླ་ཡུལ་དེར་ཕེབས་སྐབས། རང་གི་བླ་མའི་ཡང་སྲིད་དུ་གཟིགས་ནས་ཕྱིས་དགུང་གྲངས་བཞི་བཞེས་སྐབས་ཝ་གོ་སིདྡྷི་དགོན་དུ་གདན་དྲངས། རིག་འཛིན་ལུང་རིག་གླིང་པའི་ཡང་སྲིད་དུ་ངོས་འཛིན་གསལ་བསྒྲགས་དང་། ཁྲི་གསོལ་མཛད། སྐབས་དེར་རྒྱ་ལྷ་མོ་ཚེ་རིང་གིས་གཡུ་ཁོག་རྒྱ་སྤྲུལ་བའི་ཡང་སྲིད་ཡིན་མིན་བརྟགས་ཆེད་སྐུ་གོང་མའི་ཐུགས་དམ་གྱི་རྟེན་སྒྲོལ་མའི་སྐུ་མཐོ་གང་བ་དང་། མུ་ཏིག་གི་མཎྚལ་ཞིག་ཡོད་པ་གཉིས་པོ་སྐུ་འདྲ་དང་མཎྚལ་གཞན་པ་ཁ་ཤས་ཀྱི་གྲས་སུ་བཞག་ནས་ཁྱེད་ལ་གང་དགོས་ཞུས་པས། ཁོང་གིས་སྐུ་གོང་མའི་སྐུ་འདྲ་དང་མཎྚལ་གཉིས་པོ་ཁོ་ན་བླངས་པས་རྒྱ་ལྷ་ཐུགས་མཉེས། དཔལ་ཡུལ་བླ་མ་མཚན་ལྡན་ཡོངས་འཛིན་དུ་བསྐོས། ཕུ་དུམ་བླ་མ་དཀོན་མཆོག ཉག་རོང་རས་པ་སོགས་ལས་སྨིན་གྲོལ་གྱི་གདམས་པ་དུ་མ་མནོས། ར་ཧོར་དང་རྫོགས་ཆེན་སོགས་སུ་གྲྭ་སར་ཕེབས་ནས་གཙུག་ལག་རྒྱ་མཚོར་སྦྱང་བ་མཛད། ཐུན་མོང་སྐྱེ་བོའི་སྣང་ངོར་རྟེན་སྔགས་འཆང་། ཆང་དང་དུ་བ། ཉལ་ཐ་དང་བུད་མེད་སོགས་ལ་འཛེམ་མེད་དུ་རོལ་བ་སོགས་ཕལ་བའི་མཛད་སྤྱོད་ཅན་དུ་བཞུགས་ཀྱང་། ནང་ཉམས་རྟོགས་ཡོན་ཏན་དཔལ་གྱིས་མངོན་པར་མཐོ་བའི་རྟགས་སུ་སྔོན་གནས་རྗེས་དྲན་སོགས་ཐུན་མིན་གྱི་རྟགས་མཚན་དུ་མ་ མཚན་གྱི་རྣམ་གྲངས་འཇམ་དབྱངས་དཀོན་མཆོག་ཆོས་འཕེལ་དང་། ལུང་རྟོགས་བསྟན་པའི་དབང་ཕྱུག རྒྱལ་རོང་སོ་མང་ནས་གདན་དྲངས་ཕྱིར་ཡུལ་བ་ཚོས་སོ་མང་སྤྲུལ་སྐུ་དང་། ཝ་གོ་དགོན་དུ་བཞུགས་ཕྱིར་ཝ་གོ་རྒྱ་སྤྲུལ་ཡང་ཟེར།དབུས་གཙང་གི་གནས་ཆེན་རྣམས་སུ་མཇལ་བསྐོར་བྱས། སྐུ་གོང་མའི་གདན་ས་གཡུ་མཁར་དགོན་དང་། བཀོད་ལེགས་དགོན་གཉིས་སུ་ཡང་ཁྱུག་ཙམ་ཕེབས་གཟིགས་མཛད་པར་ཐོས། གཙོ་ཆེར་ཝ་གོ་དགོན་དང་ཕུ་དུམ་དགོན་གཉིས་ལ་གཟིགས་སྐྱོང་མཛད། དུས་འགྱུར་སྐབས་པེ་ཅིན་དུ་ཐེངས་གཉིས་ཕེབས་དགོས་བྱུང་། ཐེངས་རྗེས་མའི་སྐབས་མཐའ་མིས་ཟས་དུག་དྲངས་བས་རྐྱེན་བྱས་ནས་དགུང་གྲངས་རེ་དྲུག་བཞེས་པ་ཤིང་འབྲུག་གི་ལོ་མགོར་སེང་གེ་ཉལ་སྟབས་ཀྱིས་བཞུགས་ནས་གཟུགས་སྐུའི་བཀོད་པ་དབྱིངས་སུ་བསྡུས། དེར་གནས་ཚོས་སྐུ་གདུང་ཤིང་སྒྲོམ་ཞིག་ཏུ་བཅུག་ནས་ས་འོག་ཏུ་སྦས། ཕྱིས་བསྟན་པ་ཡང་དར་གྱི་སྐབས་སུ་སྐུ་གདུང་ས་འོག་ནས་སླར་སྤྱན་དྲངས་སྐབས་གདུང་སྒྲོམ་སྟེང་འཇའ་ཤར་བ་དང་། ལ་ཧེ་ནས་ཞུགས་འབུལ་བྱེད་སྐབས་སྒྲ་ཆེན་པོ་འུར་བ་དང་། ཐོག་མའི་གདུང་དུད་གཡུ་ཁོག་ཕྱོགས་སུ་ཡུན་རིང་བར་བསྐྱོད་པ་སོགས་ངོ་མཚར་བའི་རྟགས་མཚན་དུ་མ་དེར་གནས་ཀུན་གྱི་མཐུན་སྣང་དུ་མངོན་པར་བྱས་སོ།།

གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་217 ནས་ 220 བར།

 

ཤར་མི་ཉག་པ།རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།

Menu