ྋགྲུབ་དབང་རྫོགས་ཆེན་རིན་པོ་ཆེ་སྐུ་འཕྲེང་དང་པོ་པདྨ་རིག་འཛིན་མཆོག་དང་ྋརྒྱལ་དབང་ལྔ་པ་ཆེན་པོ་མཆོག་ལ་ཐུན་མིན་གྱི་འབྲེལ་ལམ་ཡོད་པ་གཞིར་བཟུང་བཀའ་སློབ་ལམ་སྟོན་གང་གནང་བ་བཞིན་གྲུབ་དབང་མཆོག་མདོ་ཁམས་ཉི་མ་ཤར་ཕྱོགས་སུ་ཞབས་བསྐྱོད་ཀྱིས་རྫོགས་ཆེན་རུ་དམ་དགོན་ཕྱག་བཏབ་གནང་ནས་རིམ་བཞིན་སྐུ་འཕྲེང་བདུན་གྱི་རིང་བུ་དགོན་སུམ་བརྒྱ་ལྷག་གསར་འཛུགས་གནང༌།
རྫོགས་སྤྲུལ་ལྔ་པ་དང་དྲུག་པ་གཉིས་ལ་རང་གཞུང་ནས་གཟིགས་པ་ཆེན་པོས་མ་ཧ་པཎྡྲྲི་ཏ་ཨེར་ཏི་ནི་ཧོ་ཐོག་ཐུ་ཞེས་པའི་གཟེངས་བསྟོད་ཡང་གནང་མྱོང༌། ཁྱད་པར་ྋརྫོགས་སྤྲུལ་བདུན་པ་འཇིགས་མེད་བློ་གསལ་དབང་པོ་མཆོག་ཆུང་དུས་ནས་ྋརྒྱལ་དབང་ཐམས་ཅད་མཁྱེན་པས་བདག་གཉེར་གནང་བ་མ་ཟད་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་གི་སྐྱབས་མགོན་དམ་པར་ཆེད་མངགས་གནང་བ་ལྟར་ཕྱི་ལོ་༡༩༩༢ ལོར་རྫོགས་ཆེན་བྱེས་དགོན་དབུ་འབྱེད་མཛད་སྒོ་བསྐྱངས་ནས་རིམ་བཞིན་བཤད་གྲྭ་ཤྲཱི་སེང་སོགས་འཛུགས་སྐྲུན་གྱིས་རྒྱལ་བསྟན་སྤྱི་དང་ཡང་སྒོས་ྋགྲུབ་དབང་རྫོགས་ཆེན་པའི་བསྟན་པར་ཞབས་འདེགས་ཞུ་བཞིན་པ་དང༌། ཁྱད་པར་ྋརྒྱལ་དབང་ཐམས་ཅད་མཁྱེན་པའི་ཐུགས་བཞེད་ཁོ་ན་ལྷུར་བཞེས་ནས་ཀོ་ལེ་གྷལ་དོན་ལྡན་གླིང་གཞིས་ཆགས་ལ་རོགས་རམ་བརྗོད་མཐའ་བྲལ་བ་གནང་ཡོད་པ་རེད་འདུག