སྤྱི་ལོ་༢༠༡༧ཟླ་༡༠ཚེས་༡༩བོད་ཟླ་༨ཚེས་༣༠གཟའ་སྐར་འཕྲོད་སྦྱོར་ཕུན་ཚོགས་ཉིན་གྱི་ཞོགས་པ་དུས་ཚོད་༨/༤༠ནས་སྔ་འགྱུར་རྙིང་མའི་དབུ་འཛིན་དྲུག་པ་༧སྐྱབས་རྗེ་རིན་པོ་ཆེའི་སྐུ་གདུང་ཞུགས་འབུལ་གྱི་ཆོ་ག་དངོས་སུ་དབུ་འཛུགས་གནང་ཡོད་པ་རེད།
ཚོགས་མགོན་དུ་སྔ་འགྱུར་བའི་བླ་ཆེན་༸སྐྱབས་རྗེ་འབྲུག་ནམ་མཁའི་སྙིང་པོ་རིན་པོ་ཆེ་དབུས།ཏིས་མགོ་མཁྱེན་བརྩེ་ཡང་སྲིད་རིན་པོ་ཆེ།རྣམ་གླིང་མཁན་སྤྲུལ་ཀྱང་ཁང་རིན་པོ་ཆེ།སྨིན་གླིང་མཁན་ཆེན་རིན་པོ་ཆེ་སོགས་སྔ་འགྱུར་བའི་བླ་ཆེན་རྣམ་པ་ཕྱོགས་བཞི་རུ་ཆ་བསྒོས་ཀྱིས།བྱང་གཏེར་འགྲོ་བ་ཀུན་སྒྲོལ།ཐུགས་རྗེ་ཆེན་པོ་བདེ་གཤེགས་ཀུན་འདུས།གནམ་ཆོས་བདེ་ཆེན་ཞིང་སྒྲུབ།སྨིན་གླིང་རྡོར་སེམས་བཅས་ཀྱིས་ཆོ་གའི་སྒོ་ནས་སྐུ་གདུང་རིན་པོ་ཆེ་ཞུགས་འབུལ་གནང་ཡོད་པ་རེད།དེ་བཞིན་རིས་སུ་མ་ཆད་པའི་དགོན་སྡེ་ཁག་གི་སྐུ་ཚབ་མཁན་སྤྲུལ་བླ་སློབ་རྣམ་པ།གཞན་དགའ་ལྡན་ཕོ་བྲང་གི་སྐུ་ཚབ།དཔལ་ལྡན་ཆོས་རིག་བཀའ་བློན།སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ།རྙིང་མའི་སྤྱི་འཐུས་མཁན་པོ་འཇམ་དཔལ་བསྟན་འཛིན་སོགས་གཞུང་འབྲེལ་དང་གཞུང་འབྲེལ་མ་ཡིན་པའི་སྐུ་ཚབ་འཐུས་མི།འབྲེལ་ཡོད་རྒྱ་བལ་འབྲུག་སོགས་ནས་ཕེབས་པའི་དད་ལྡན་མི་མང་སྟོང་ཕྲག་བརྒལ་བ་འདུ་འཛོམས་གྱིས་ཞུགས་འབུལ་གྱིས་ལས་རིམ་རྣམས་དུས་ཚོད་༡༢ཙམ་ལ་མཇུག་ཡོངས་སུ་གྲོལ་ཡོད་པ་རེད།
ཕྱི་ཚེས་༢༠་ནས་ཉིན་གསུམ་རིང་ལ་སྐྱབས་རྗེ་ནམ་སྙིང་རིན་པོ་ཆེ་དབུས་དགེ་འདུན་པས་ཉིན་གསུམ་རིང་བླ་མ་མཆོད་པའི་ཆོ་ག་ནོར་བུའི་འཕྲེང་བ་འཚོགས་རྒྱུ་ཡིན་པ་རེད།
༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་ནི་བོད་དབུས།ལྷོ་ཁ་ས་ཁུལ་ཡར་འབྲོགས་སྣ་དཀར་རྩེའི་ཕུན་དཀྱིལ་ཞེས་པའི་ཁྱིམ་དུ་ཡབ་རྣམ་རྒྱལ་རྡོ་རྗེ་དང་།ཡུམ་རྡོ་རྗེ་སྒྲོལ་མ་གཉིས་ཀྱི་སྲས་སུ་ཕྱི་ལོ་༡༩༢༦ལོར་སྐུ་འཁྲུངས་ཤིང།རྡོ་བྲག་རིག་འཛིན་ཆེན་པོ་སྐུ་ཕྲེང་དགུ་པ།ཐུབ་བསྟན་ཆོས་དབང་མཉམ་ཉིད་རྡོ་རྗེ་མཆོག་གིས་རིན་པོ་ཆེ་མཆོག་ལ་སྟག་ལུང་རྩེ་སྤྲུལ་སྐུ་ཕྲེང་གསུམ་པར་ངོས་འཛིན་གནང་བ་དང།དགུང་ལོ་ལྔ་ནས་སྟག་ལུང་རྩེ་གྲྭ་ཚང་དུ་ཆོས་ཞུགས་གནང་འགོ་བཙུགས།ཡོངས་འཛིན་ཀུན་བཟང་མཆོག་གི་མདུན་ནས་ཡི་གེ་འབྲི་ཀློག་སོགས་དང།སྨིན་གླིང་རྡོར་འཛིན་རྣམ་གྲོལ་རྒྱ་མཚོའི་སྐུ་མདུན་ནས་དགེ་ཚུལ་གྱི་བསླབ་སྡོམ་བཞེས་རྗེས་རིམ་བཞིན།དགེ་བའི་བཤེས་གཉེན་བཅུ་ཕྲག་ལྷག་བསྟེན་པ་སོགས་རྒྱལ་བསྟན་སྤྱི་དང་བྱེ་བྲག་ཏུ་སྔ་འགྱུར་རྙིང་མའི་བསྟན་པ་རྒྱ་མཚོའི་མངའ་བདག་ཏུ་གྱུར་པ་མ་ཟད།ཁྱད་པར་དུ་༢༠༡༢ནས་བཟུང་རིན་པོ་ཆེ་མཆོག་གིས་རྙིང་མའི་དབུ་འཁྲིད་ཀྱི་མཚན་གནས་བཞེས་གནང་ཡོད་པ་རེད།ཕྱི་ལོ་༢༠༡༥ཟླ་༡༢ཚེས་༢༣ཉིན་གནས་མཆོག་རྡོ་རྗེ་གདན་དུ་དགོངས་པ་ཆོས་དབྱིངས་སུ་འཐིམས།།
ཤར་མི་ཉག་པ།འཇམ་དཔལ་བསྟན་འཛིན་ནས།