རྒྱལ་རོང་གཏེར་སྟོན་རིག་འཛིན་གསང་སྔགས་གླིང་པ་ནི།

བཀླགས་གྲངས། 48

རབ་བྱུང་བཅུ་བཞི་པའི་མེ་སྦྲུལ་༼༡༨༥༧༽ལོར་མདོ་ཆེན་ཕྱོགས་སུ་ཕ་ཡབ་དོན་ལུ་ཞེས་པའི་སྲས་སུ་འཁྲུངས། མཁའ་འགྲོ་ཡེ་ཤེས་མཚོ་རྒྱལ་དང་།

མཁར་ཆུ་དཔལ་གྱི་དབང་ཕྱུག་ཟུང་དུ་འཇུག་པའི་རོལ་གར་དུ་གྲགས། རྟེན་སྔགས་འཆང་རྡོ་རྗེ་འཛིན་པར་བཞུགས། དགུང་གྲངས་ཉེར་གཅིག་བཞེས་པ་མེ་གླང་ཧོར་ཟླ་དྲུག་པའི་ཚེས་ལྔ་ལ། ཡུལ་དབུས་བྲག་དམར་གཡའ་མ་ལུང་གི་བྲག་རི་ཁྱུང་ཆེན་གཤོག་པ་བརྐྱངས་འདྲ་ནས། སྒྲོལ་མ་འཇིགས་པ་ཀུན་སྐྱོབས་ཀྱི་ཆོས་སྐོར་དང་། ལོ་དེའི་ཧོར་ཟླ་དགུ་པའི་ཚེས་བཅུ་ལ་ལྷ་སའི་ལྕགས་པོ་རིའི་བྲག་རི་གླང་པོས་ཆུ་འཐུང་པ་འདྲ་བ་ནས། རྐྱེན་བཟློག་རྡོ་རྗེ་ཕ་ལམ་སོགས་ཟབ་ཆོས་འགའ་ཞིག་གཏེར་ནས་སྤྱན་དྲངས། དེ་ནས་གཡུ་ཁོག་ཏུ་ཕེབས་ནས་ཡུན་རིང་བཞུགས། རབ་བྱུང་བཅོ་ལྔ་པའི་ལྕགས་འབྲུག་ཧོར་ཟླ་དང་པོའི་ཚེས་ཉེར་ལྔ། དཔའ་བོ་མཁའ་འགྲོ་འདུ་བའི་དུས་བཟང་གི་ཉི་ཤར་འབྲུག་གི་དུས་ཚོད་དང་བསྟུན་ནས་མཁའ་སྤྱོད་གནས་ལུང་དཔལ་གྱི་རི་བོའི་གཡས་ཟུར། བྲག་རི་སེང་ཆེན་འགྱིང་འདྲའི་ལྟོ་བ་ནས། དམ་རྫས་ཡེ་ཤེས་ཀློང་དགུའི་བཅུད་ལེན་མྱོང་གྲོལ་རིལ་བུ་ཁྱད་འཕགས་དུ་མ་དང་། རྡོ་རྗེ་ཕུར་པ་གསང་བ་སྤུ་གྲིའི་ཆོས་སྐོར་གྱི་ཤོག་སེར་བཅས། གཡུ་ཁོག་རྒྱ་སྤྲུལ་ལུང་རིག་གླིང་པའི་གཙོས་སྐལ་ལྡན་ཆོས་ཀྱི་བདག་པོ་དུ་མ་དང་། གཡུ་ཁོག་མི་དབང་བསོད་ནམས་དབང་འདུས་སོགས་ཆེ་དྲེགས་མང་པོའི་གཙོས་འདུས་པ་གྲངས་ལས་འདས་པའི་མངོན་སུམ་མིག་གི་དབང་པོའི་སྤྱོད་ཡུལ་དུ་གྱུར་བར་ཁྲོམ་གཏེར་དུ་བླངས་ཤིང་། འདུས་པའི་སྡེ་ཆེན་པོར་དམ་རྫས་རིལ་བུ་གཏེར་བྲག་ནས་སྐྱོགས་ཆུང་གིས་བཅུས་ཤིང་ཕུལ། ཕུར་པའི་ཆོས་སྐོར་རྣམས་དུས་ཕྱིས་ནག་ཟླའི་ཚེས་ཉེར་བརྒྱད་ནས་གཡུ་ཁོག་དཔོན་གྱི་བཀྲ་ཤིས་པའི་འདུན་སར་ཌཀྐིའི་ཤོག་སེར་ལས་བོད་ཡིག་ཏུ་ཕབ། ཀཿཐོག་སི་ཏུ་ཆོས་ཀྱི་རྒྱ་མཚོ་དང་། རྒྱ་སྐོར་སྤྲུལ་སྐུ་ཀུན་བཟང་ཐེག་མཆོག་བསྟན་པའི་རྒྱལ་མཚན་རྣམ་གཉིས་རྗེ་འདི་ཉིད་ཀྱི་སྐུ་སྲས་ཡིན་པར་བཤད།

གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་169ནས་ 171 བར།

 

ཤར་མི་ཉག་པ།རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།

Menu