གཏེར་ཆེན་བསམ་གཏན་ཡེ་ཤེས་གླིང་པའི་རིགས་སྲས་སུ། རབ་བྱུང་བཅོ་ལྔ་པའི་ཤིང་རྟ་༼༡༨༩༤ ༡༩༥༩༽ལོར་གཡུ་ཁོག་ཏུ་སྐུ་འཁྲུངས།
སྐུ་ན་ཆུང་དུས་ནས་ཡབ་ལས་འབྲི་ཀློག་སྦྱང་བ་དང་སྨིན་གྲོལ་མནོས། མཁར་བ་བླ་མ་ངག་དབང་ནོར་བུས་མཁར་བ་ཡེ་ཤེས་རྡོ་རྗེའི་ཡང་སྤྲུལ་དུ་ངོས་འཛིན་ཁྲི་གསོལ་མཛད། ནགས་རྟ་བླ་མ་མདོ་སྡེ་རྒྱ་མཚོ་དང་། འཁོར་གདོང་བླ་མ་མགོན་དབང་། ཤུག་ཆུང་སྤྲུལ་སྐུ་ཚུལ་ཁྲིམས་བཟང་པོ། ཡབ་རྗེ་ཧོར་བླ་གཞན་ཕན་སོགས་ལས་ཟབ་རྒྱས་ཆོས་ཚུལ་སྤྱི་དང་། ཁྱད་པར་གཡུ་ཁོག་བྱ་བྲལ་ལས་ཡང་གསང་རྫོགས་པ་ཆེན་པོའི་མན་ངག་གི་སྐོར་རྣམས་གསན་བསམ་ཉམས་བཞེས་མཛད། གཡུ་ཁོག་ཏུ་རིགས་གསུམ་སྤྲུལ་པའི་སྐྱེས་ཆེན་གསུམ་ཞལ་འཛོམས་པའི་ཡ་གྱལ་གསང་བདག་ཕྱག་རྡོར་གྱི་སྤྲུལ་པར་གྲགས། སྐུ་མཆེད་གཡུ་སྤྲུལ་རྡོ་རྗེ་རྒྱལ་མཚན་དང་ལྷན་དུ་འཁོར་ལོ་གདོང་དུ་ཕེབས་ནས་ཡུན་རིང་བཞུགས། ཡི་དམ་ལྷག་པའི་ལྷ་དུ་མའི་བསྙེན་ཚད་དང་། ཁྱད་པར་གཤིན་རྗེའི་བསྙེན་པ་ཨྱེ་རིང་མ་དུང་ཕྱུར་ལྗགས་བཟླས་མཛད། རྒྱལ་བཀའ་ཆེན་མོའི་བཀླག་ལུང་དང་། བྱང་གཏེར་སྐོར་སོགས་དབང་ལུང་མན་ངག་གི་ཁྲིད་དང་བཅས་པས་སློབ་མའི་ཁྱུ་ཚོགས་བསྐྱངས། ཞལ་སློབ་ཨ་ཁྱའི་བླ་མ་ཀར་ཆོས། བྱ་བྲལ་ཆོས་དབྱིངས་ཁྱབ་བརྡལ། ས་འགོ་ནོར་བུ་དྲི་མེད་སོགས་བྱུང་། གཡུའི་ཆུ་དབར་ཏཱ་རེའི་གནས་སུ་སྐུ་མཚམས་ལ་བཞུགས། དུས་འགྱུར་སྐབས་ཏེ་དགུང་གྲངས་རེ་དྲུག་བཞེས་པ་ས་ཕག་ལོའི་ཉིན་གཅིག་ལོག་སྤྱོད་པ་རྣམས་ཀྱིས་བླ་སྤྲུལ་འགའ་ཞིག་ལ་རྡེག་འཚོག་བསམ་ལས་འདས་པ་བཏང་ནས་ཁོང་དང་བླ་མ་གཞན་པ་འགའ་ལ་གཟིགས་སུ་བཅུག་ནས། སང་ཉིན་ཁྱེད་ཅག་ལ་འདི་ལྟར་བྱེད་རྒྱུ་ཡིན་ཞེས་འཇིགས་སྐུལ་བཏང་། དེ་ནུབ་ཉེ་གནས་ལྷ་མཚམས་ཀྱིས་ད་ནི་ཁྱེད་ལ་ཡང་རྡུང་རྡེག་བྱེད་ངེས་པར་འདུག ཞིང་བརྗེ་ནུས་ན་རན་འདུག་ཞུས་པས། ཁོང་གིས་ཀྱང་འདའ་བར་ཞལ་བཞེས་གནང་ནས། ཆོས་སྐྱོང་གཤེགས་གསོལ་མཛད། ནུབ་ཇ་གསོལ་འཕྲོས་ཉེ་གནས་ལ། ད་ང་འཆི་ཨེ་ཐུབ་བལྟ་རྒྱུ་ཡིན། གལ་ཏེ་སང་ཉིན་ང་ཙོག་པུར་ཤི་ཡོད་ན་ཆོས་དབྱིངས་མཛོད་ཀྱི་གླེགས་བམ་དེ་ངའི་མགོ་ཐོག་ཏུ་ཞོག ཉལ་ནས་ཤི་ཡོད་ན་གླེགས་བམ་སྙིང་གའི་ཐད་དུ་ཞོག་གསུངས། ཉེ་གནས་ཀྱིས་དེ་ནུབ་བླ་མ་འདས་ཐུབ་མིན་དང་། གལ་ཏེ་མ་འདས་ན་ཕྱི་ཉིན་རྡུང་རྡེག་བྱེད་པའི་སེམས་ཁྲལ་བཅས་གཟིམ་ཁང་གི་གས་སྲུབ་ཞིག་ནས་ལྐོག་བལྟ་བྱས་པས། མཚན་ཕྱེད་ཙམ་དུ་ཁོང་སྐུ་དྲང་སྲོང་ཙོག་པུའི་བཞུགས་སྟངས་ཀྱིས་ནང་དབྱིངས་གདོད་མའི་ཕ་མཁར་དུ་གཤེགས་སོ། ཕྱི་ནང་སྔ་བར་ལོག་སྤྱོད་པ་ཚོས་བླ་མ་གང་དུ་སོང་ཟེར་བར། ནང་དུ་ཡོད་བྱས་པས། ཁོ་ཚོས་བལྟས་ཚེ་བླ་མ་འདས་ཟིན་པས་སྐུ་གདུང་ལ་རྡོག་པས་འཕུལ་བ་ཙམ་ལས་བྱ་ཐབས་མ་བྱུང་ངོ།།
གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་ 213ནས་214 བར།
ཤར་མི་ཉག་པ། རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།