ཝ་ཤུལ་མཁན་པོ་སངས་རྒྱས་སྨན་བླ་སྐྱབས་ནི།

བཀླགས་གྲངས། 44

ཝ་ཤུལ་ཡོན་ལོ་དང་། མ་ཡུམ་ལྗིབ་ཉལ་མཁའ་འགྲོ་གཉིས་ཀྱི་སྐྱེད་ཁྱིམ་དུ་རབ་བྱུང་བཅོ་ལྔ་པའི་མེ་སྟག་༼༡༩༢༦ ༢༠༠༣༽ལོར་གཡུ་ཁོག་ཏུ་འཁྲུངས།

རྫོགས་ཆེན་མཁན་པོ་ཆོས་ཚ་དང་། དོན་གྲུབ་དབང་རྒྱལ་གྱི་དུས་གཡུ་མཁར་བཤད་གྲྭར་ཆོས་ཞུགས་མཛད་ནས་ཐོས་བསམ་མཛད། རྒྱ་ཤུལ་ཆོས་དཔལ་རྒྱ་མཚོ་ལས་སྨིན་གྲོལ་གྱི་གདམས་པ་དུ་མ་མནོས། རྫོགས་ཆེན་དུ་ཕེབས་ནས་མཁན་ཆེན་ངག་དབང་ནོར་བུ་དང་། འཇིགས་བྲལ་བྱང་ཆུབ་རྡོ་རྗེ། མཁན་ཆེན་ཡོན་ཏན་མགོན་པོ། པདྨ་ཚེ་དབང་སོགས་ལས་མདོ་སྔགས་རིག་གནས་ཀུན་ལ་གསན་སྦྱང་དང་། སྔ་འགྱུར་བཀའ་གཏེར་ཆོས་ཚུལ་དུ་མའི་སྨིན་གྲོལ་རྒྱབ་བརྟེན་དང་བཅས་པ། ཁྱད་པར་མཁན་མགོན་རིས་ལས་ཡང་ཏིག་ཡིད་བཞིན་ནོར་བུའི་ཐུན་མིན་གྱི་ཁྲིད་རྒྱུན་སོགས་ཀྱང་མནོག་ཆོས་སུ་བཞེས། མཐོང་བ་བརྒྱུད་པའི་ཕྱག་བཞེས་ལ་མཁས་པའི་ཕུལ་དུ་ཕྱིན། དུས་འགྱུར་གྱི་ཁྲོད་སོགས་སུ་ཡང་རྩ་བའི་བླ་མའི་བཀའ་ལྟར་ཀུན་མཁྱེན་འདས་མཆོད་ཆགས་མེད་མཛད། བསྟན་པ་ཡང་དར་གྱི་དུས་སུ་གཡུ་དགོན་གྱི་བསྟན་འཛིན་སྐྱེས་ཆེན་དག་དང་ལྷན་དུ་གདན་ས་བསྐྱར་གསོའི་ཕྱག་ལས་ལ་ཞུགས་ཤིང་། ཁྱད་པར་དུས་མཆོད་རྣམས་ཀྱི་ཕྱག་དཔེ་དང་། ཟིན་བྲིས། འཆམ་ཡིག་སོགས་འཚོལ་སྡུད་མཛད་པ་དང་། དཀྱིལ་འཁོར་འབྲི་འགོད་དང་གཏོར་མ་བཅའ་གཤོམ། འབག་བཟོ་དང་འཆམ་གོས་དྲུབ་པ། སེར་སྦྲེང་བྱོན་བཞུགས་ཀྱི་སྒོ་ཡིག་འབྲི་བ་ཡན་ཆད་ཀྱིས་མཛད་ཕྲིན་བསྐྱངས། སྔ་ཕྱིར་རྫོགས་ཆེན་ཀུན་བཟང་སྤྲུལ་སྐུ། ཁྱབ་བདག་པདྨ་སྐལ་བཟང་། མཁན་ཆེན་པདྨ་ཚེ་དབང་། གཟན་དཀར་ཐུབ་བསྟན་ཉི་མ། མཁན་ཆེན་ཟླ་བའི་འོད་ཟེར། རྡོ་གྲུབ་བསྟན་པའི་ཉི་མ། འབྲུག་སྤྲུལ་ཐུབ་བསྟན་ཉི་མ། མཁན་ཆེན་འཇིགས་མེད་ཕུན་ཚོགས། ཨ་སྐྱོང་རྟོགས་ལྡན་སོགས་ལས་བཀའ་གཏེར་མན་ངག་གི་སྨིན་གྲོལ་དང་གདམས་ཁྲིད་རྒྱ་ཆེར་གསན། གཟན་དཀར་རིན་པོ་ཆེའི་བཀའ་གསུང་ལྟར་སི་ཁྲོན་བོད་ཡིག་སློབ་གྲྭ་རྟའུར་བཙུགས་སྐབས་བགྲང་བྱ་དུ་མའི་རིང་དགེ་རྒན་གྱི་ཕྱག་ལས་གནང་། དེ་ནས་གཡུ་མཁར་བཤད་གྲྭ་བསྐྱར་དུ་ཚུགས་སྐབས་མཁན་རབས་བཅུ་གཉིས་པའི་ཁྲི་ལ་བཞུགས་ཤིང་འདུལ་བ་གཞི་གསུམ་གྱི་ཕྱག་སྲོལ་དང་། མདོ་སྔགས་རིག་གཞུང་དུ་མའི་འཆད་ཁྲིད་སྤེལ། གཡུ་སྙིང་དབེན་པའི་རི་ཁྲོད་དུ་སྐུ་མཚམས་ལ་བཞུགས་པའི་ཐུན་མཚམས་རྣམས་སུ་དོན་གཉེར་ཅན་གྱི་སློབ་མའི་ཁྱུ་ཚོགས་ལ། སྔོན་འགྲོའི་ཁྲིད་ཡིག་དང་སྦྲེལ་བའི་འབུམ་ལྔའི་བསགས་སྦྱང་དང་། བསྐྱེད་རྫོགས་ཟིན་བྲིས་དང་སྦྲེལ་ནས་ཆོ་གའི་ཕྱག་ལེན་སོགས་རྒྱུ་མཚན་དང་བཅས་པའི་སྒོ་ནས་སློབ་ཁྲིད་གནང་ཤིང་སྐྱེད་བསྲིང་མཛད་པའི་བླ་སྤྲུལ་བགྲང་གིས་མི་ལོང་བ་བྱོན། དགུང་གྲངས་གྱ་གཅིག་བཞེས་པ་ཆུ་རྟ་ལོའི་རྒྱལ་ཟླའི་ཚེས་གཅིག་ཉིན་གཟིམ་མལ་དུ་སྐུ་ལུས་དྲང་པོར་བསྲང་། ཕྱག་གཉིས་མཉམ་བཞག་མཛད་ནས་ཞི་བར་གཤེགས་སོ།

གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་156 ནས་ 158 བར།

 

ཤར་མི་ཉག་པ།རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།

Menu