མཉམ་མེད་རང་བྱུང་རྡོ་རྗེ་ནི།

བཀླགས་གྲངས། 35

ཡབ་ལྷ་རྩེ་ཀུན་ལོ་དང་། མ་ཡུམ་ལྷ་ལྕམ་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ཤིང་ཕོ་རྟའི་ལོའི་ཧོར་ཟླ་དགུ་པའི་ཡར་ཚེས་བཅུ་གསུམ་༼༡༩༥༤་༡༠་༠༢༽ཉིན་གསེར་ལྷ་རྩེའི་ཆུ་ཕྱར་རི་ཁྲོད་དུ་སྐུ་བལྟམས།

ལྷ་རྩེ་བླ་མ་ཨོ་རྒྱན་རིག་འཛིན་གྱིས་མཉམ་མེད་རང་བྱུང་རྡོ་རྗེ་ཞེས་མཚན་གསོལ།ཨ་འཛོམ་རྒྱལ་སྲས་འགྱུར་མེད་རྡོ་རྗེ་དང་། འབྲུག་སྤྲུལ་པདྨ་ཕྲིན་ལས་རྣམ་གཉིས་ཀྱིས་གཡུ་ཁོག་བྱ་བྲལ་བའི་ཡང་སྲིད་ཡིན་པར་ཐུགས་ཐག་བཅད། སྐུ་ན་ཆུང་ངུའི་དུས་སུ་ཁོང་གིས་ཚིག་བདུན་གསོལ་འདེབས་དང་། སྐུ་གསུམ་གསོལ་འདེབས་སོགས་ ཐོལ་བྱུང་དུ་གསུངས་པ་དང་། འགྲོ་དོན་སྐྱོང་ཚུལ་གྱི་རྩེད་མོ་རྩེ་བ་དང། སྐུ་གོང་མའི་སློབ་མ་རྣམས་ངོས་ཟིན་པ་སོགས་ཀྱིས་སྐྱེ་བོ་དུ་མ་དད་པའི་གནས་ལ་བཀོད། དགུང་གྲངས་བཞི་བཞེས་སྐབས་ཨ་འཛོམ་རྒྱལ་སྲས་མཆོག་གི་ཐུགས་བཀོད་ལྟར་གསེར་ལྷ་རྩེ་དགོན་དུ་ཁྲི་འདོན་མངའ་གསོལ་མཛད། ས་ཁྱི་ལོར་གཡུ་ཁོག་དཔོན་ལྷ་མགོན་ཆེད་ཕེབས་ཀྱིས་ན་བཟའ་གསོལ་ཞིང་སྐུ་བདག་མཛད། དུས་འགྱུར་སྐབས་སློབ་གྲྭར་ཞུགས་ནས་སློབ་འབྲིང་བར་སྦྱང་བརྩོན་མཛད། དགུང་གྲངས་ཉེར་བརྒྱད་བཞེས་སྐབས་༼༡༩༨༡༽གཡུ་དཔོན་དབང་ཆེན་བདུད་འདུལ་གྱིས་ན་བཟའ་གསོལ་ཞིང་སྐུ་བདག་བསྐྱར། ཁོང་གིས་སྔ་ཕྱིར་མི་ཉག་རྩ་ར་མཁན་ཆེན་ཆོས་ཀྱི་གྲགས་པ། པེ་ཝར་སྤྲུལ་སྐུ་འཆི་མེད་རྡོ་རྗེ། མཁན་ཆེན་འཇིགས་མེད་ཕུན་ཚོགས། མཁན་པོ་སྒེག་པ། ལྷ་སྒང་བླ་མ་པདྨ་ཚེ་རིང་། བྲག་དཀར་སྤྲུལ་སྐུ་པདྨ་རྡོ་རྗེ། པཎ་ཆེན་སྐུ་ཕྲེང་བཅུ་པ། གོང་ས་རྒྱལ་དབང་བཅུ་བཞི་པ་ཆེན་པོ། སེ་ར་ཡང་སྤྲུལ། གནུབ་ཟུར་མཁན་དཀོན་མཆོག་བཀྲ་ཤིས། བྲག་འགོ་དགེ་བཤེས་ཕྲིན་ལས་དོན་གྲུབ། གཟན་དཀར་ཐུབ་བསྟན་ཉི་མ། དིལ་མགོ་མཁྱེན་བརྩེ། དཔལ་སྤུང་སི་ཏུ། འཁོར་གདོང་གཏེར་ཆེན། བླ་མ་སྣང་གསལ། ཨ་ལག་དོན་ཡོད། མཁན་མཁྱེན་ཆུང་། ཡར་ལུང་བསྟན་པའི་ཉི་མ། རྡོ་གྲུབ་ཐུབ་བསྟན་ཕྲིན་ལས། དཔལ་ཡུལ་སྤྲུལ་སྐུ་ཐུབ་བཟང་། ཤུག་སྒང་རྨ་སྤྲུལ། སེ་ར་འཇིགས་དགའ་སོགས་རིས་སུ་མ་ཆད་པའི་སྐྱེས་བུ་དམ་པ་དུ་མ་གཙུག་ཏུ་བརྟེན་ནས་གཞུང་ཆེན་རིག་གནས་སྤྱི་དང་། མདོ་སྔགས་ཆོས་ཚུལ་དུ་མ་གསན་བསམ་ཉམས་བཞེས་མཛད།དགུང་གྲངས་སོ་གསུམ་བཞེས་པ་མེ་སྟག་༼༡༩༨༦༽ལོར་གཡུ་མཁར་དགོན་དུ་ཁྲི་གསོལ་དང་གཡུ་དགོན་གྱི་བསྟན་པའི་བདག་པོར་བསྐོས། དགུང་གྲངས་སོ་ལྔའི་སྟེང་ནས་བགྲང་བྱ་དུ་མའི་རིང་གསེར་ལྷ་རྩེ་དགོན་གྱི་བསྟན་པའི་འགན་བཞེས་དང་། གཡུ་དགོན་དུ་རྒྱ་བླ་མ་འཇམ་དབྱངས་ལུང་རིག་རྒྱ་མཚོ་རྒྱལ་ཚབ་བསྟན་བདག་ཏུ་མངའ་གསོལ་མཛད། གཞན་ཞལ་མཚར་གྱི་ཚུལ་དུ་ལུང་བསྟན་གསུང་བ། འཕོ་བ་རྟགས་ཐོན་འདེབས་པ་སོགས་ཁྱད་ཆོས་དུ་མ་མངའ། དེ་ལྟར་ཐུན་མོང་དང་ཐུན་མིན་གྱི་མཛད་པ་དུ་མས་བསྟན་འགྲོའི་དོན་མཛད་བཞིན་ཞབས་པད་འཚོ་གཞེས་སུ་བཞུགས་པའོ།།

གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་130 ནས་135   བར།

ཤར་མི་ཉག་པ། རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།

Menu