དཔོན་བླ་དགེ་འདུན་རྒྱ་མཚོ་ནི།

བཀླགས་གྲངས། 71

ཡབ་ཧོར་སྲས་བསོད་ནམས་དབང་འདུས་དང་། ཡུམ་གཡུ་མཚོ་གཉིས་ཀྱི་སྲས་སུ་རབ་བྱུང་བཅུ་བཞི་པའི་ལྕགས་སྤྲེལ་༼༡༨༦༠ ༡༩༢༨༽ལོར་སྐུ་འཁྲུངས།

དགུང་གྲངས་བཅུ་གསུམ་བཞེས་སྐབས་ཤིག་ལ་མེ་མདའ་ཁུར་ནས་འཁྱིལ་ཆེན་ནགས་ལུང་ནང་རི་དྭགས་རྔོན་དུ་སོང་ཚེ་བཅོས་མིན་གྱི་ངེས་འབྱུང་ཐུགས་ལ་འཁྲུངས་ནས་ཆོས་མཛད་ཅིང་བཞུགས། དེ་ནས་དབུས་གཙང་ཕྱོགས་ཀྱི་གནས་རི་རྣམས་མཇལ་སྐོར་མཛད་མཐར། ཀུན་མཁྱེན་ཀློང་ཆེན་པའི་གདན་ས་གངས་རི་ཐོད་དཀར་དུ་རྒྱལ་དབང་བཅུ་གསུམ་པའི་དབུ་བླ་རྒྱལ་རོང་བསྟན་འཛིན་གྲགས་པ་བླ་མར་བརྟེན་ནས་བགྲང་བྱ་ཉེར་ལྔའི་རིང་སྒྲུབ་པ་ཉམས་བཞེས་མཛད། བོད་གཞུང་གིས་གསོལ་ཕོག་སོགས་མཐུན་རྐྱེན་སྦྱར། བྱང་སེམས་དོན་ལྡན་རིན་པོ་ཆེ་ཞེས་མཚན་དུ་གྲགས། དེ་རྗེས་གཡུ་ཁོག་པའི་འགོ་བློན་ཚོས་ཨུ་ཚུགས་མཐར་སྐྱེལ་གྱིས་ཁོང་གཡུ་ཁོག་ཏུ་གདན་དྲངས། ཡུལ་དགོན་གཉིས་ཀྱི་རེ་ཞུས་ལྟར་བསྟན་སྲིད་གཉིས་ཀྱི་བདག་པོ་དང་། གདན་རབས་ལྔ་པའི་འགན་བཞེས་ནས། རྒྱུན་བཞུགས་ཀྱི་བཤད་གྲྭ་བཙུགས། རྫོགས་ཆེན་མཁན་པོ་འོད་ལུ་གདན་དྲངས་ནས་མདོ་སྔགས་ཀྱི་འཆད་ཉན་སྤེལ། གཡུ་སྙིང་དབེན་ཁྲོད་དུ་སྒྲུབ་གྲྭ་བ་གསར་འཛུགས་དང་དགོན་པའི་འདུ་ཁང་རྒྱ་བསྐྱེད།

མང་ཚོགས་ལ་ཆོས་འཚོགས་དང་རི་རྒྱ་རྔོན་ཁྲིམས་བསྡམས། མཛོ་མོའི་རྟོ་ལེ་བཤའ་མི་ཆོག་པའི་ལུགས་སྲོལ་བཙུགས། གཡུ་སྟོད་དུ་རི་བསང་ལ་ཕེབས་སྐབས་རྣམས་སུ་མདུན་ཆེན་མར་མདའི་དེའུའི་རྩེར་ཡུལ་ལྷ་རྡོ་རྗེ་གཡུ་ཁྲོམ་དངོས་སུ་བསུ་མར་བྱོན་པར་གྲགས། གངས་རི་ཐོད་དཀར་དུ་སྒྲུབ་པ་ཉམས་བཞེས་མཛད་སྐབས་གཡུ་ཁོག་པ་ཚོས་བྱ་བ་ཆེ་ཆུང་གང་བསྒྲུབ་སྒྲིབ་མེད་དུ་མཐོང་ཐུབ་པ་སོགས་ཀྱི་མངོན་མཁྱེན་ཡོད་པར་གསུངས། གཡུ་དགོན་དང་། གླག་ཚང་གནས། རྦེའུ་སྟོད་སོགས་སུ་སྐུ་མཚམས་ལ་བཞུགས། ཁོང་གངས་རི་ཐོད་དཀར་དུ་སྒྲུབ་པ་མཐར་ཕྱིན་པ་བྱུང་ན་འཇའ་ལུས་འཕོ་བ་ཆེན་པོའི་སྐུ་འགྲུབ་རྒྱུ་ཡིན་མོད། དེ་ལྟར་མ་བྱུང་བར་སྡེ་དགོན་བསྐྱངས་ཤིང་དམག་ཇག་གི་བྱ་བ་བསྒྲུབས་པས་ཁོང་སྐུ་འདས་པའི་རྗེས་སུ་དམངས་ཕལ་བ་ཞིག་གི་སྐྱེ་བ་ལན་གཅིག་ལེན་དགོས་འདུག དེ་ནས་རང་དབང་བའི་སྒོ་ནས་བྱ་དང་རི་དྭགས་ཀྱི་ལུས་རེ་བླང་ན་མ་གཏོགས་མི་ལུས་ལེན་རྒྱུ་མིན། ཡང་སྲིད་འཚོལ་མི་དགོས་གསུངས་ནས་དགུང་གྲངས་རེ་དགུ་བཞེས་པ་ས་འབྲུག་ཧོར་ཟླ་དང་པོའི་ཡར་ཚེས་བཅུ་གཅིག་ཉིན་སྐུ་དྲང་པོར་བསྲངས་ཏེ་དགོངས་པ་དབྱིངས་སུ་བསྡུས། གདུང་ཆུང་ངུར་གྱུར་པ། གདུང་དང་རིང་བསྲེལ་བབས་པ་སོགས་ངོ་མཚར་བའི་རྟགས་མཚན་དུ་མ་བྱུང་བར་གྱུར་ཏོ།།

Menu