༄༅། །དཔལ་ལྡན་རྡོ་རྗེ་སེམས་དཔའ་ལ་བརྟེན་ནས་སྡིག་སྒྲིབ་སྦྱོང་ཞིང་དོན་གཉིས་སྒྲུབ་ཐབས་ཀྱི་མན་ངག་ཙིནྟ་མ་ཎི་ཞེས་བྱ་བ་བཞུགས་སོ།
སྐྱབས་སེམས་སྔོན་དུ་འགྲོ་བར་བྱས་ལ། ཨཿ རང་མདུན་མཆོད་སྤྲིན་རྒྱ་མཚོའི་དབུས། །པད་དཀར་ཟླ་བའི་གདན་སྟེང་དུ། །རིགས་འདུས་དཔལ་ལྡན་རྡོ་རྗེ་སེམས། །དཀར་གསལ་ཟླ་བ་རྒྱས་པའི་མདངས། །ཞལ་གཅིག་ཕྱག་གཉིས་རྡོར་དྲིལ་བསྣམས།
།ལོངས་སྐུའི་ཆས་རྫོགས་དཀྱིལ་ཀྲུང་བཞུགས། །ཡེ་ཤེས་འོད་ཟེར་ཕྱོགས་བཅུར་འཕྲོ། །དྭངས་བའི་ཡིད་ངོར་ལྷམ་མེར་གསལ། །ཀྱེ་མ་བླ་མ་རྡོ་རྗེ་སེམས། །སྔོན་གྱི་དམ་བཅའ་ཉེར་དགོངས་ནས། །བདག་སོགས་ཉམ་ཐག་སེམས་ཅན་རྣམས། །ཐུགས་རྗེས་རྗེས་སུ་འཛིན་པར་མཛོད། །ཐོག་མེད་དུས་ནས་ད་བར་དུ། །ལུས་ངག་ཡིད་ཀྱི་སྡིག་ལྟུང་རྣམས། །ཇི་ལྟར་ཁོང་དུ་དུག་སོང་ལྟར། །གནོང་འགྱོད་དྲག་པོས་མཐོལ་ཞིང་བཤགས། །ཕྱིན་ཆད་སྲོག་ལ་བབས་གྱུར་ཀྱང་། །མི་འོས་ལས་རྣམས་མི་བགྱིད་ན། །འཛུམ་པའི་སྤྱན་གྱིས་གཟིགས་མཛོད་ལ། །མཇམ་མཉེན་ཕྱག་གིས་དབུགས་དབྱུངས་སྩོལ། །བདག་དང་སེམས་ཅན་ཐམས་ཅད་ཀྱི།། དམ་ཚིག་ཉམས་ཆག་ཀུན་དག་ཅིང་། །མཆོག་དང་ཐུན་མོང་དངོས་གྲུབ་ཀུན། །ད་ལྟ་ཉིད་དུ་འགྲུབ་པར་མཛོད། །ཅེས་གསོལ་འདེབས་ཀྱི་ཚུལ་དུ་སྟོབས་བཞི་ཚང་བའི་སྒོ་ནས། ཨོཾ་བཛྲ་ས་ཏྭ་ཧཱུྂ། འབུམ་ཕྲག་བཞི་བཟླས་ན་རྩ་བའི་དམ་ཚིག་ཉམས་པའང་བྱང་བར་འགྱུར་རོ། ས་མ་ཡ། མཐར་བསྔོ་བ་དང་བཀྲ་ཤིས་བྱའོ། ཞེས་པ་འདི་མེ་གླང་ཟླ ༣ ཚེས་ ༡༡ ལ་ངག་དབང་བློ་གྲོས་མཚུངས་མེད་པའི་རིག་ཁམས་དྭངས་བའི་རྩལ་ལས་ཤར་བ་ལྟར་སློབ་བུ་ཚུལ་ཁྲིམས་དྲི་མེད་ཀྱིས་བྲིས་པ་དགེ་ལེགས་སུ་གྱུར་ཅིག། སྤྱི་ལོ་ ༡༩༩༧ ཟླ ༤ ཚེས ༡༧་ལའོ།