རབ་བྱུང་བཅོ་ལྔ་པའི་ཤིང་ཕོ་རྟའི་༼༡༨༩༤ ༡༩༥༨༽ལོར། ཡབ་རྒྱ་ཧྲེ་ཁུས་ལུ་དང་། ཡུམ་ཨ་ཤེར་མ་གཉིས་ཀྱི་སྲས་སུ་ཧོར་བྲག་འགོ་ཕྱོགས་སུ་འཁྲུངས།
བྱིས་པའི་དུས་ཀུན་བཟང་རྣམ་རྒྱལ་གྱིས་སྐུ་གོང་མ་རིག་འཛིན་རྒྱ་མཚོའི་ཞལ་འདོན་གླེགས་བམ་གསུང་བཞིན་ཡོད་སྐབས། ཁོང་གིས་གླེགས་བམ་དེ་ཚུར་ཕྲོགས་པ་ལ། མས་བསྡིག་པས། འདི་ཁོའི་མ་རེད། ངའི་ཁ་ཏོན་རེད་ཅེས་སྔོན་གནས་རྗེས་དྲན་གྱི་གསུང་བྱོན་པ་ལ། ཀུན་བཟང་རྣམ་རྒྱལ་གྱིས་ཁོང་མ་འདས་སྤྲུལ་སྐུར་ངོས་བཟུང་། དབོན་པོ་སྨིན་གྲོལ་གྱིས་ཡོངས་འཛིན་དང་སྐུ་བདག་མཛད། དགུང་གྲངས་བཅུ་སྐོར་ནས་གཡུ་ཁོག་ཏུ་ཕེབས་ནས་བཞུགས། གཡུ་ཁོག་ཏུ་རིགས་གསུམ་མགོན་པོའི་སྤྲུལ་པའི་སྐྱེས་ཆེན་གསུམ་ཞལ་འཛོམ་པ་ལས་སྤྱན་རས་གཟིགས་ཀྱི་རྣམ་སྤྲུལ་དུ་གྲགས། རྫོགས་ཆེན་དུ་ཕེབས་ནས་རྫོགས་སྤྲུལ་ལྔ་པ་སོགས་ལས་སྨིན་གྲོལ་མནོས། རྫོགས་སྤྲུལ་ལྔ་པས་མི་འགྱུར་ནམ་མཁའི་རྡོ་རྗེའི་དབུ་ཞྭ་སོགས་གནང་ནས་བླ་མའི་མཚན་གནས་བསྩལ། ཕྱིས་སུ་གསེར་ཡག་ཡེ་སྒར་དུ་གཡུ་ཁོག་བྱ་བྲལ་བའི་མདུན་ནས་མན་ངག་རྫོགས་ཆེན་གྱི་སྐོར་རྣམས་གསན་བསམ་མཛད་ནས་ཕྱིར་གཡུ་ཁོག་ཏུ་ཕེབས་ནས་ལོ་གསུམ་བཅད་རྒྱར་བཞུགས། དེ་ནས་སླར་ཡང་བྱ་བྲལ་བའི་མདུན་ཆེད་ཕེབས་ཀྱིས་རྟོགས་འབུལ་དང་མན་ངག་ཞུན་ཐར་བཅད་ནས་གཡུ་ཁོག་ཏུ་འབྱོན་ཁར། གཡུ་ཁོག་བླ་མས་ཕྱག་གཉིས་ཀྱིས་ཁོང་གི་དབུ་ལ་བྱུག་བྱུག་མཛད་ཅིང་། ཁྱེད་བླ་མ་ཆ་ནང་སྤྲུལ་སྐུ། ཉིན་ལ་བྱོན་ནས་རྟ་བརྒྱ་ལོན་པར་ཤོག སྲིབ་ལ་བྱོན་ནས་དྲེལ་བརྒྱ་ལོན་པར་ཤོག ཉིན་སྲིབ་བར་ནས་མཛོ་བརྒྱ་ལོན་པར་ཤོག གསུངས་པ་དཀོར་གྱི་ཉེས་དམིགས་ཀྱི་གདམས་ངག་ཏུ་གོ་ནས་གཡུ་དགོན་གྱི་དུས་མཆོད་ཁག་དང་། སྤྱི་བ་དང་དགེ་བསྐོས་སོགས་གསར་བསྐོའི་སྐབས་ཙམ་མ་གཏོགས་དུས་རྒྱུན་སྐུ་མཚམས་ཁོ་ནར་བཞུགས། སྐུ་ན་ཆུང་དུས་ནས་ཕྱག་མོ་དགོངས་བརྟགས་འཁྲུལ་བ་མེད་པར་དོན་དངོས་ཐོག་ཏུ་ཁེལ་བས་ཁོང་ཉིད་ཐུགས་བརྟགས་ཞུ་ཡུལ་གཙོ་བོར་གྱུར། སྐབས་ཤིག་ནོར་བུ་ལྷ་རྩེའི་དེའུར་རྫེ་ཐ་རྒྱལ་ངན་གནས་འཆའ་བ་མཁྱེན་ནས་དེར་ཙིའུ་དམར་རྟེན་མཁར་བརྩིགས། གསོལ་བསྡུས་སྐྱེ་མེད་ཆོས་སྐུ་མཛད་ནས་རྒྱལ་ངན་གནས་དབྱུང་། ས་སྟག་ལོར་ཆུ་དབར་མཚོ་མདའ་ཙཱ་རི་གཉིས་པའི་གནས་སྒོ་ཕྱེས། དུས་འགྱུར་ཅུང་མ་བྱུང་གོང་སྟེ་ས་ཁྱི་ལོའི་ཉིན་ཞིག ད་ནི་མི་ཡུལ་འདིར་བསྡད་པ་ལ་དགོས་པ་མི་འདུག་པས་ཤི་བ་དགའ། གསུངས་ནས་སྐུ་ལྟེམ་པ་མེད་པར་སེང་གེ་ཉལ་སྟབས་སུ་བཞུགས་ནས་གཤེགས་སོ། །འདས་མཆོད་ཀྱི་མཇུག་རྫོགས་མཚམས་སུ་དུས་འགྱུར་གྱི་ཟིང་ཆ་མངོན་པར་གྱུར་བའོ།།
གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་210 ནས་ 213 བར།
ཤར་མི་ཉག་པ།རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།