གྲུབ་པའི་དབང་ཕྱུག་ལྕམ་བླ་དཀོན་མཆོག་ནི།

བཀླགས་གྲངས། 33

རབ་བྱུང་བཅུ་གསུམ་པའི་ནང་ལྕམ་པ་སྡེ་བར་སྐུ་འཁྲུངས། སྐུ་ན་ཆུང་དུས་ནས་ཡི་གེ་འབྲི་ཀློག་སོགས་སྦྱང་བ་མཛད།

སྐབས་ཤིག་ཁོང་གི་ཁྱིམ་གྱི་རྟ་རྣམས་བོར་བ་བཙལ་དུ་ཕྱིན་པས། དུད་ཁྱིམ་ཞིག་གི་བུད་མེད་ཀྱིས་ཇག་པ་རྟ་འདེད་ཞིག་ད་ནང་སྔ་མོ་ནས་སོང་། ད་ས་རུབ་ཁར་ཁྱོད་རྐང་ཐང་དབྱུག་དྲུད་ཞིག་གིས་རྗེས་ཟིན་དཀའ་ཟེར། དོ་ནུབ་འདིར་གནས་ཚང་གཡོར་གསུངས་ནས་དེར་བཞུགས། བུད་མེད་དེས་ཁྱེད་བནྡེ་ཚོ་ལ་མཐུ་འདྲ་བྱེད་རྒྱུ་ཡོད་ན་མ་གཏོགས་སང་ཉིན་ཁྱེད་ཇག་པ་ཚོར་ཐུག་ཀྱང་ཡ་ལན་མི་ཟིན་ཟེར་བ་དང་། ཁོང་གིས། ཁྱེད་ཚང་ལ་ཡི་གེ་འདྲ་ཨེ་ཡོད་གསུངས་པས། དེས་ངེད་ཚང་ལ་མོ་འདྲེ་བཀར་བ་ཟེར་བའི་ཡི་གེ་ཞིག་ཡོད་ཟེར། འོ་ན་དེ་ཁྱེར་ཤོག་གསུངས། མོ་གླུད་དགུ་ཅན་གྱི་གླུད་ཆོག་དེ་བཏོན་ནས་བུད་མེད་དེར་གླུད་ཡས་འདི་ད་ནང་རྟ་འདེད་འགྲོ་སའི་ཕྱོགས་སུ་འཕོངས་གསུངས་ནས་གཟིམ་བསྡད། ནམ་གུང་ཙམ་ལ་རྟའི་འཚེར་སྐད་དང་རྨིག་སྒྲ་མང་པོ་གྲགས། ཕྱི་ཉིན་སྔ་མོ་སྒོར་བྱོན་ནས་གཟིགས་པས་ཇག་པ་རྣམས་ངག་སྨྲ་མི་ཤེས་པར་གྱུར་པ་རྟ་རྣམས་ཀྱིས་བསྐོར་ནས་འདུག བྱིན་རླབས་མཛད་ནས་སྐད་ཆ་དྲིས་པས། མདང་སུམ་ནམ་གུང་ཙམ་ལ་བུད་མེད་དགུ་བྱུང་ནས་ངུ་འབོད་དང་ཐུ་བ་བརྡབས་རྐྱེན་འདི་ལྟར་གྱུར་སོང་ཟེར། ཇག་པ་རང་སར་བཏང་། རྟ་རྣམས་དེད་ནས་ཁྱིམ་དུ་ཕེབས། སྐུ་མཆེད་ལྕམ་བླ་འགྱུར་མེད་རྒྱལ་མཚན་དང་ལྷན་དུ་རྫོགས་ཆེན་སོགས་སུ་གྲྭ་སར་བྱོན། རྫོགས་སྤྲུལ་གསུམ་པ་དང་། ནམ་མཁའ་ཚེ་དབང་མཆོག་གྲུབ་སོགས་ལས་ཟབ་རྒྱས་ཀྱི་གདམས་པ་ཅི་རིགས་པ་གསན་བསམ་ཉམས་བཞེས་མཛད། གཡུ་ཁོག་ཏུ་ཕེབས་ནས་ར་ཆགས་ལུང་དུ་དབུ་སྐྲ་ནགས་ཀྱི་ཡལ་ག་ལ་བཏགས་ནས་ལོ་དགུར་བཅད་རྒྱར་བཞུགས། འཇིག་རྟེན་ཕལ་པའི་སྣང་ངོར་སུ་དང་མི་མཐུན་པའི་སྤྱོད་པ་ཅན་དུ་བཞུགས་ཀྱང་། ནང་ཉམས་དང་རྟོགས་པའི་ཡོན་ཏན་མངོན་པར་ཕྱུག དུད་ཁྱིམ་ཞིག་ལ་བུ་རྒྱུད་མེད་པས་ཁོང་ལ་བུ་རྒྱུད་འབྱུང་བའི་ཐབས་ཞུས་པས། ཁོང་ཕེབས་ཤིང་སྦྲའི་མཐོངས་ནས་མར་ཁྱིམ་དུ་བབས། རྒྱེད་པུའི་རྩར་སྐྱག་པ་གསུམ་བཏང་ནས་བྱོན་སོང་བས་ཕྱིས་སུ་དེ་ཚང་ལ་བུ་གསུམ་སྐྱེས་པར་གྲགས། སྐབས་ཤིག་ད་ང་ཤི་སོང་ན་བདུན་ཚིགས་འདོན་བྱེད་ཀྱི་ཆ་རྐྱེན་སོགས་གང་ཡང་མེད་པས་ཤི་ཆོས་རང་གིས་བསྒྲུབ་དགོས་གསུངས་ནས་ཞེ་དགུའི་བདུན་ཚིགས་ཁོང་རང་ཉིད་ཀྱིས་མཛད། ཉིན་ཞིག་མེ་ཏོག་ལུང་དུ་ཡོད་པའི་ནད་པ་ཞིག་ལ་གཅོད་གསུང་བར་བསུ་མ་འབྱོར་བ་ན། ཁོང་གིས་ཀྱང་འབྱོན་པར་ཞལ་བཞེས་མཛད་ནས་མེ་ཏོག་ལུང་པའི་ཕུར་སླེབས་ཚེ། རྡོ་ལེབ་ཞིག་གི་སྟེང་དུ་བཞུགས་ནས། བསུ་མ་ལ་ཁྱོད་ཀྱིས་ངའི་ཊ་དྲིལ་སོགས་ཁྱིམ་དུ་ཁྱེར་དང་། ང་འདིར་ཅུང་ཙམ་འདུག་དགོས་གསུངས། ཁོ་ཁྱིམ་དུ་སླེབས་ནས་ཕྱིར་བལྟས་ཚེ་ལུང་པའི་ཕུ་ན་བྱ་རྒོད་མང་པོ་འཕུར་བ་མཐོང་། སླར་ཕྱིན་པས་བླ་མ་སྐུ་གཤེགས་པར་མ་ཟད་སྐུ་གདུང་བྱ་རྒོད་ཀྱིས་ཟོས་ཟིན་པར་གྲགས་སོ།།

གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་161 ནས་ 163 བར།

 

ཤར་མི་ཉག་པ།རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།

Menu