ཕྱི་ལོ་  ༢༠༡༧ ཟླ་ ༡༢  ཚེས་ ༡༨ གཟའ་ཟླ་བ།

གཏེར་སྟོན་བསམ་གཏན་སྙིང་པོ་ནི།

རབ་བྱུང་བཅུ་གཉིས་པའི་ཆུ་བྱི་༼༡༧༣༢ ༡༨༠༡༽ལོར་རྡོ་སྨད་དར་སྐུ་གྲོང་པའི་ཨ་འབྲོག་ཚང་དུ་སྐུ་འཁྲུངས།

སྐུ་འཁྲུངས་སྐབས་རྟགས་མཚན་སྣ་ཚོགས་བྱུང་བས་ཆུ་ལ་བསྐྱུར་ཚེ་ཆུས་མར་ལ་མ་ཁྱེར་ཡར་ལ་ཁྱེར་བས་མཚན་ཆུ་སྐྱེས་བཏགས། རྩང་ས་སྐྱ་དང་། ཁམས་རྫོགས་ཆེན་སོགས་སུ་གྲྭ་སར་ཕེབས། དབུས་གཙང་གི་གནས་རྣམས་ལ་མཇལ་སྐོར་མཛད། གཉགས་ཛྙ་ན་ཀུ་མ་རའི་སྤྲུལ་པར་གྲགས། དགུང་གྲངས་ཉི་ཤུ་བཞེས་པའི་ནུབ་གཅིག་དངོས་ཉམས་རྨི་ལམ་ལྟ་བུར་མཁའ་འགྲོ་སྡེ་ལྔས་དར་དཀར་གྱི་འདོ་ལུའི་སྟེང་ནས་གནས་མཆོག་པདྨ་འོད་ཀྱི་ཕོ་བྲང་དུ་ཁྲིད་ནས་རྒྱལ་དབང་ཨོ་རྒྱན་ཆེན་པོ་མཇལ། ཨོ་རྒྱན་ཆེན་པོས་རྩ་གསུམ་རྡོ་རྗེ་དྲག་གཏུམ་གྱི་དབང་བསྐུར། གཏེར་སྟོན་བསམ་གཏན་སྙིང་པོ་ཞེས་མཚན་གསོལ། རིག་འཛིན་གྱི་ཚོགས་གྲལ་དུ་ཆོས་ཀྱི་བགྲོ་གླེང་མང་དུ་མཛད། མཁའ་འགྲོ་ཡེ་ཤེས་མཚོ་རྒྱལ་གྱིས་མི་བརྗེད་པའི་གཟུངས་ཀྱི་བདུད་རྩི་བླུད། དེ་ནས་མི་ལོ་ལྔའི་བར་དུ་གསང་རྒྱ་མཛད་ཅིང་ཤིང་མོ་ཕག་གི་ལོ་ལ་བདེ་ཆེན་འོད་གསལ་གླིང་དུ་ཡི་གེར་ཕབ། ཤིང་ཁྱི་ལོར་བསོ་ཐོག་གནས་སུ་གུ་རུའི་རྣམ་ཐར་གསང་ཆེན་སྒྲོན་མེ། ཤིང་ཕག་ལོར་བ་ཐིམ་ཤིང་རྒྱལ་བའི་དབེན་གནས་ནས་མཚོ་རྒྱལ་སྒྲུབ་ཐབས་སོགས་གཏེར་ནས་བཏོན། སྔ་ཕྱིར་གནས་མཆོག་རྒྱལ་མོ་མུ་རྡོ་ནས་མི་ལོ་ལྔའི་རིང་སྐུ་མཚམས་བཅད་རྒྱ་ལ་བཞུགས། སྔར་ཁོང་ལ་རྩ་བའི་བླ་མས་ས་དབྱིབས་སླ་ང་འདྲ་བའི་གནས་སུ་ཁྱོད་ཀྱི་གདན་ས་ཡོད་གསུངས་པ་དེ་བཙལ་ཆེད་དགུང་གྲངས་ཉེར་དྲུག་བཞེས་པ་མེ་གླང་ལོར་གཡུ་ཁོག་ཏུ་བྱོན། སྒེགས་ཀྱི་བདར་རྡོའི་ཐང་དུ་སླེབས་སྐབས་གཡུ་སྙིང་དགྲ་བླ་མི་མགོན་དཀར་པོས་དངོས་སུ་བསུ་མ་བྱས། ངེས་ལེགས་ཟམ་ཁར་སྒར་བབས་ནས་བཞུགས་པའི་ནུབ་མོ་གཟིམ་ལམ་དུ་བླ་མས་ཁྱོད་ཀྱི་གདན་ས་ཕ་ཀི་རེད་ཅེས་ལུང་བསྟན་པ་ན་གཟིམ་ལས་སད་ཚེ་ཆུའི་ཕར་ངོས་ཀྱི་ངེས་ལེགས་དབེན་ཁྲོད་གཟིགས་པས་རྡོ་ཡི་མཎྚལ་གསུམ་བཞུགས་གནས་དེར་བརྩིགས་པས་ས་དེར་མཎྚལ་ལྷས་ཞེས་མིང་ཐོགས། དེ་ནས་ངེས་ལེགས་བསམ་གཏན་གླིང་རྟེན་བརྟེན་པར་བཅས་པ་གསར་ཏུ་བཏབ་ནས་གདན་ས་མཛད། ཆུ་རྟ་ལོའི་སྟོན་ཟླ་ར་བའི་ནང་ཡུལ་ལྷ་སྐུ་བླ་དུང་རྩེས་ཞལ་གཟིགས་ཤིང་བསྟན་པ་བསྲུང་བར་ཁས་བླངས། དགུང་གྲངས་སོ་བརྒྱད་བཞེས་པ་ས་གླང་ལོར་དར་སྐུ་དགོན་གསར་བསམ་གཏན་ནོར་བུའི་གླིང་གསར་འདེབས་མཛད། དགུང་གྲངས་བདུན་ཅུ་བཞེས་པ་ལྕགས་བྱ་ལོར་གཙང་རོང་ཡིད་དྭངས་དགོན་དུ་སྐུ་གཤེགས་པར་བཤད། གཏེར་ཆོས་སྐོར་སོགས་གླེགས་བམ་བཅུ་གསུམ་ཡོད་ཀྱང་དུས་འགྱུར་ཁྲོད་གཏོར་བརླགས་སུ་ཕྱིན་པས་དེང་སྐབས་གླེགས་བམ་གཉིས་ཙམ་བཞུགས་པ་གཏེར་གསར་ཆོས་མཛོད་ཆེན་མོའི་གྲས་སུ་བཞུགས།

གཡུ་ཁོག་ཡི་དམ་རྡོ་རྗེས་བྲིས་པའི་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལོ་རྒྱུས་ཐོར་བུའི་བང་སོ་དེབ་གཟུགས་ཅན། ལྡེབ་ངོས་248 ནས་ 250 བར།

 

ཤར་མི་ཉག་པ།  རྫོགས་ཆེན་མཁན་པོ་འཇམ་དཔལ་བསྟན་འཛིན་ནས་བསྒྲིགས།